អតីតសង្ឃពេលសមត្ថកិច្ចចាប់ខ្លួន ក្រោយពេលផ្សឹករួច។ រូបថត ប៉ូលិស
មណ្ឌលគិរី: សមត្ថកិច្ចនគរបាលខេត្តមណ្ឌលគិរីកំពុងរៀបចំសំណុំរឿងបញ្ជូនអតីតសង្ឃម្នាក់ទៅសាលាដំបូងខេត្តនៅថ្ងៃនេះ ក្រោមបទចោទប៉ុនប៉ងមនុស្សឃាតគិតទុកជាមុន បន្ទាប់ពីឃាត់ខ្លួនករណីចាក់សម្លាប់ព្រះសង្ឃ ១ អង្គ ប្រពឹត្តកាលពីថ្ងៃ ២៤ មីនានៅវត្តដេអេក្នុងភូមិចុងផាង ឃុំពូជ្រៃ ស្រុកពេជ្រាដា ដោយសារទំនាស់ពាក្យសម្ដីគ្នា។
លោក ឡោ សុខា ស្នងការនគរបាលខេត្តមណ្ឌលគិរីបានប្រាប់ភ្នំពេញប៉ុស្ដិ៍កាលពីម្សិលមិញថា ករណីនេះសមត្ថកិច្ចជំនាញបានសាកសួរជនសង្ស័យរួចរាល់ហើយ ដោយកំពុងកសាងសំណុំរឿងតាមនីតិវិធីត្រៀមបញ្ជូនទៅសាលាដំបូងខេត្តមណ្ឌលគិរីនៅព្រឹកថ្ងៃទី ២៦ ខែមីនានេះដើម្បីឲ្យតុលាការចាត់វិធានការបន្ត។
លោកបានបញ្ជក់ថា៖ «អតីតព្រះសង្ឃអង្គនេះត្រូវបញ្ជូនទៅតុលាការ ហើយជាប់គុកយ៉ាងហោចណាស់ក៏ ១០ ឬ ២០ ឆ្នាំដែរ ព្រោះករណីមនុស្សឃាត ហើយយើងបានចោទប្រកាន់គាត់ថា ប៉ុនប៉ងមនុស្សឃាតគិតទុកជាមុន ប៉ុន្ដែតុលាការលោកចោទយ៉ាងណាទៀត ខ្ញុំអត់ដឹងទេ។ អ៊ីចឹងប្រហែលនៅថ្ងៃទី ២៦ ខែមីនាពេលព្រឹកនេះយើងបញ្ជូនទៅដល់តុលាការតែម្ដង ព្រោះការរៀបចំនីតិវិធីផ្សេងៗគឺធ្វើរួចរាល់ហើយ»។
.jpg)
អតីតព្រះសង្ឃឈ្មោះ ធឿននី អាយុ ៣៩ ឆ្នាំត្រូវបានសមត្ថកិច្ចស្រុកពេជ្រាដា ចាប់បញ្ជូនខ្លួនមកកាន់ស្នងការដ្ឋានខេត្តមណ្ឌលគិរី បន្ទាប់ពីគណៈសង្ឃខេត្តមណ្ឌលគិរីចាប់ផ្សឹកករណីចាក់សម្លាប់ព្រះសង្ឃ ១ អង្គព្រះនាម ថ្លាង វុធ ព្រះជន្ម ២៤ ព្រះវស្សាគង់នៅវត្តដេអេជាមួយគ្នាក្នុងភូមិចុងផាង ឃុំពូជ្រៃ កាលព្រឹកថ្ងៃ ២៤ មីនា។
នេះបើតាមលោក តាក់ យ៉េន អធិការនគរបាលស្រុកពេជ្រាដាកាលពីថ្ងៃអង្គារ។
លោក តាក់ យ៉េន បានប្រាប់ភ្នំពេញ-ប៉ុស្ដិ៍ថា មុនពេលរងរបួសព្រះសង្ឃរងគ្រោះព្រះនាម ថ្លាង វុធ បានទាស់ពាក្យសម្ដីគ្នាតិចតួចជាមួយអតីតព្រះសង្ឃ ឈ្មោះ ធឿន នី ដែលផ្ដើមពីការចំអន់គ្នាលេងដោយព្រះសង្ឃរងគ្រោះបានហៅព្រះសង្ឃដៃដល់ថា មុខដូចមនុស្សញៀនថ្នាំ។ ក្រោយមក ព្រះសង្ឃដៃដល់បានខឹងខ្លាំងទើបឈានដល់ការចាក់សម្លាប់គ្នាបែបនេះ។
លោក តាក់ យ៉េន បញ្ជាក់ថា៖ «នៅមុនពេលបញ្ជូនទៅស្នងការដ្ឋាន មន្ត្រីជំនាញខាងខ្ញុំនេះបានសាកសួរចម្លើយរួចធ្វើតេស្តរកសារធាតុញៀនដែរ តែគាត់គ្មានជាតិញៀនក្នុងខ្លួនទេ»។
លោក យ៉ាន សាណី នាយប៉ុស្ដិ៍នគរបាលរដ្ឋបាលឃុំពូជ្រៃ ស្រុកពេជ្រាដា បានថ្លែងថា ព្រះសង្ឃរងគ្រោះបានសុគតតាមផ្លូវពេលបញ្ជូនទៅមន្ទីរពេទ្យខេត្តមណ្ឌលគិរី បន្ទាប់ពីរងរបួសធ្ងន់ដោយសារការចាក់នឹងកាំបិតចិតបន្លែចំនួន ៣ កាំបិតដោយត្រូវត្រង់ពោះ ១ កាំបិត ដើមទ្រូង ១ កាំបិត និងកៀនក្លៀក ១ កាំបិតទៀត។
លោកបន្តថា ព្រះសង្ឃបង្កមានទីកន្លែងកំណើតនៅភូមិត្របែក ឃុំទឹកជ្រៅ ស្រុកតំបែរ ខេត្តកំពង់ចាម។ រីឯព្រះសង្ឃរងគ្រោះមានទីកន្លែងកំណើតភូមិទឹកជ្រៅ ឃុំទឹកជ្រៅ ស្រុកតំបែរ ខេត្តកំពង់ចាម ហើយបានមកគង់នៅវត្តដេអេ ជាមួយគ្នា។
លោកបញ្ជាក់ថា៖ «ក្រោយកើតហេតុព្រះសង្ឃរងគ្រោះត្រូវព្រះសង្ឃដូចគ្នាដឹកទៅសង្គ្រោះនៅមន្ទីរពេទ្យបង្អែកខេត្ត តែដោយស្ថានភាពរបួសធ្ងន់ធ្ងរពេក ក៏សុគតនៅពាក់កណ្តាលផ្លូវ»។
ព្រះសង្ឃ ១ អង្គគង់នៅវត្តដេអេដែលមានព្រះជន្ម ២៤ ព្រះវស្សា សុំមិនបញ្ចេញព្រះនាមមានថេរដីកាថា នៅល្ងាចថ្ងៃទី ២៣ ខែមីនា មុនពេលកើតហេតុព្រះសង្ឃរងគ្រោះ និងព្រះសង្ឃដៃដល់បានចំអន់គ្នាលេងដោយព្រះសង្ឃរងគ្រោះបានហៅព្រះសង្ឃដៃដល់ថា មុខដូចមនុស្សញៀនថ្នាំ។ ពេលនោះក៏មានការទាស់សម្ដីគ្នាឮៗ ប៉ុន្ដែមានព្រះសង្ឃ ១ អង្គផ្សេងទៀតមកឃាត់ក៏ស្ងាត់រៀងៗខ្លួនវិញ។
ព្រះអង្គមានថេរដីកាបន្តថា លុះដល់ម៉ោងជាង ៩ ព្រឹកថ្ងៃទី ២៤ ខែមីនា ស្រាប់តែឮសំឡេងស្រែកឲ្យគេជួយ ហើយក៏មានការភ្ញាក់ផ្អើល និងឃើញព្រះសង្ឃរងគ្រោះដួលហូរឈាមទើបនាំគ្នាដឹកទៅសង្គ្រោះនៅមន្ទីរពេទ្យ ប៉ុន្ដែបានសុគតតាមផ្លូវ។ រីឯព្រះសង្ឃដៃដល់មិនបានរត់គេចខ្លួនទេ។
ព្រះអង្គបញ្ជាក់ថា៖ «ក្រោយមកមានសមត្ថកិច្ច និងគណៈសង្ឃខេត្តមណ្ឌលគិរីចុះមក ដើម្បីស៊ើបអង្កេតដោយគណៈសង្ឃខេត្តបានផ្សិកព្រះសង្ឃដែលចាក់សម្លាប់គេហ្នឹងរួចក៏ប្រគល់ជូនសមត្ថកិច្ចតែម្ដង។ ពេលគេជជែកគ្នាឮៗហ្នឹងអាត្មានៅក្បែរហ្នឹងដែរ តែអាត្មាមិនហ៊ានឃាត់គេទេ»៕
