សហជីព ៦ អំពាវនាវ​ឲ្យ​បក្ស ២ ចរចា​ប្រាក់​ខែ​កម្មករ​ដោះលែង ២១ នាក់


20140520_04
កម្មករដែលតវ៉ាដំឡើងប្រាក់ខែ១៦០ដុល្លារត្រូវសមត្ថកិច្ចចម្រុះឃាត់ខ្លួននិងប្រើហិង្សា rfa

ភ្នំពេញៈ ថ្នាក់​ដឹក​នាំ​សហព័ន្ធ​សហជីព​ចំនួន ៦ បាន​អំពាវនាវ​ស្នើ​សុំ​ឲ្យ​គណបក្ស​នយោបាយ​ចំនួន​ពីរ​ដែល​មាន​ការ​គាំទ្រ​ច្រើន​ពី​ប្រជា​ពលរដ្ឋ​ឲ្យ​ជួយ​អន្តរាគមន៍​ទៅ​លើ​ការ​ចរចា​លើ​ប្រាក់​ឈ្នួល​សម្រាប់​កម្មករ និង​ដោះលែង​មនុស្ស​ចំនួន ២១ នាក់​ដែល​កំពុង​ជាប់​ឃុំ​នៅ​ក្នុង​ជំនួប​ចរចា​រវាង​គណបក្ស​ទាំង​ពីរ​សា​ជា​ថ្មី។

នៅ​ក្នុង​សេចក្តី​ថ្លែង​ការណ៍​រួម​មួយ​របស់​សហព័ន្ធ​សហជីព​ទាំង ៦ ដែល​បាន​ចេញ​កាល​ពី​ថ្ងៃ​ម្សិលមិញ​បាន​លើក​នូវ​ការ​សំណូមពរ​ចំនួន ៣ ចំណុច​ដោយ​សុំ​ឲ្យ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​ធ្វើ​ការ​ចរចា​គ្នា​ដោយ​ឈរ​លើ​គោល​ការណ៍​ផល​ប្រយោជន៍​ជាតិ​ជា​ធំ ឯកភាព​ជាតិ សាមគ្គី​ជាតិ។

សេចក្តី​ថ្លែង​ការណ៍​បន្ត​ទៀត​ថា៖ «សូម​ឲ្យ​គណបក្ស​ទាំង​ពីរ​និង​សមាជិក​រដ្ឋសភា​ជួយ​អន្តរាគមន៍​តាម​ផ្លូវ​ច្បាប់​ដើម្បី​ឲ្យ​មាន​ការ​ដោះលែង​អ្នក​ទាំង ២១ នាក់​ដែល​កំពុង​ជាប់​ឃុំ ឲ្យ​ពួក​គាត់​មាន​សេរីភាព​ឡើង​វិញ ហើយ​រាជ​រដ្ឋាភិបាល​បន្ត​ការ​ចរចា​ជាមួយ​ភាគី​ពាក់ព័ន្ធ ដើម្បី​ឲ្យ​កម្មករ​ទទួល​បាន​នូវ​ប្រាក់​ខែ​គោល​សមរម្យ ដែល​អាច​រស់​នៅ​បាន»។

ថ្នាក់​ដឹក​នាំ​សហព័ន្ធ​សហជីព​ទាំង ៦ ក៏​បាន​សំណូមពរ​ឲ្យ​គណបក្ស​ទាំង​ពីរ​ជួយ​អន្តរាគមន៍​ដក​ពាក្យ​បណ្តឹង​ពី​តុលាការ​ដែល​ប្តឹង​ថ្នាក់​ដឹក​នាំ​សហជីព និង​បញ្ឈប់​ការ​ធ្វើ​ទុក្ខ​បុក​ម្នេញ​គ្រប់​រូបភាព​មក​លើ​មេ​ដឹក​នាំ​និង​សកម្មជន​សហជីព។

សហព័ន្ធ​សហជីព​ទាំង ៦ រួម​មាន​សម្ព័ន្ធ​សហជីព​ចលនា​កម្មករ​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា​សហព័ន្ធ​សហជីព វាយនភ័ណ្ឌ​ឧស្សាហកម្ម​កាត់​ដេរ​កម្ពុជា សហព័ន្ធ​សហជីព​មិត្តភាព​កម្មករ សហព័ន្ធ​សហជីព​យុវជន​ឯករាជ្យ និង​សម្ព័ន្ធ​សហជីព​ជាតិ។

ជាមួយ​គ្នា​នេះ​ដែរ កម្មករ​ប្រមាណ​ជា ៥០០ នាក់​មក​ពី​រោងចក្រ តុងជើ ក្នុង ស្រុក​ជើងព្រៃ ខេត្ត​កំពង់ចាម បាន​អំពាវនាវ​ឲ្យ​ក្រសួង ក៏​ដូចជា​រាជ​រដ្ឋាភិបាល​ដំឡើង​ប្រាក់​ឈ្នួល​អប្បបរមា​ជូន​កម្មករ​ចំនួន ១៦០ ដុល្លារ​ក្នុង ១​ខែ និង​ដោះលែង​មនុស្ស ២១ នាក់​ក្នុង​ពេល​ដែល​កម្មករ​ទាំង​នេះ​បាន​កំពុង​តែ​តវ៉ា​ទាមទារ​លក្ខខណ្ឌ​ការងារ​របស់​ពួក​គេ​ចំនួន ១៨ ចំណុច​កាល​ពី​ព្រឹក​ថ្ងៃ​ចន្ទ​ម្សិលមិញ។

លោក ហ្វា សាលី ប្រធាន​សម្ព័ន្ធ​សហជីព​ជាតិ បាន​និយាយ​ថា អំឡុង​ពេល​ដែល​កម្មករ​នៅ​រោងចក្រ តុងជើ នេះ​ធ្វើ​ការ​តវ៉ា​ទាមទារ​លក្ខខណ្ឌ​ការងារ​ក្នុង​រោងចក្រ​នេះ ពួក​គេ​ក៏​បាន​ធ្វើ​ការ​ទាមទារ​ឲ្យ​រាជ​រដ្ឋាភិបាល​ដំឡើង​ប្រាក់​ឈ្នួល​ដល់​កម្មករ​ឲ្យ​បាន ១៦០ ដុល្លារ។

លោក​ថា ពាក់​ព័ន្ធ​នឹង​ការ​ទាមទារ​លក្ខខណ្ឌ​ការងារ​នេះ រោងចក្រ​ក៏​បាន​ទទួល​យក​នូវ​ការ​ទាមទារ​ចំនួន ១៦ ចំណុច​ក្នុង​ចំណោម ១៨ ចំណុច​ដោយ​រួម​មាន​ដូច​ជា​មិន​បង្ខំ​ឲ្យ​ធ្វើ​ការ​ថែម​ម៉ោង បើក​ប្រាក់​ឈ្នួល​រៀងរាល់​ថ្ងៃ ទី​១០ មិន​កាត់​ប្រាក់​ពេល​ឈឺ និង​មាន​ចំណុច​មួយ​ចំនួន​ទៀត ប៉ុន្តែ​ចំណុច​ដែល​មិន​ទាន់​ដាច់​ស្រេច​នឹង​គ្នា​នោះ​គឺ​ប្រាក់​ថ្លៃ​ធ្វើ​ដំណើរ និង​លុយ​ព្រីម។

មន្រ្តី​រោងចក្រ​មួយ​រូប​បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ឲ្យ​ដឹង​ថា កម្មករ​បាន​ចូល​ធ្វើ​ការ​វិញ​ហើយ​កាល​ពី​រសៀល​ម្សិលមិញ៕

ព័ត៌មានថ្មីៗ