ភ្នំពេញៈ ការិយាល័យអ្នកនាំពាក្យរាជរដ្ឋាភិបាលកម្ពុជាបានចេញសេចក្ដីប្រកាសព័ត៌មានកាលពីម្សិលមិញបានអះអាងថា ការសម្រេចបង្កើតអង្គភាពអ្នកនាំពាក្យរាជរដ្ឋាភិបាល មានបំណងពង្រឹង និងបន្តនូវការចូលរួមកសាងប្រទេសជាតិ នៅក្នុងរបបលទ្ធិប្រជាធិបតេយ្យសេរីពហុបក្ស ពហុមតិ និងអធិបតេយ្យជាតិរបស់ប្រជាពលរដ្ឋគ្រប់និន្នាការ។
សេចក្ដីប្រកាសព័ត៌មានដដែលនេះបានឲ្យដឹងថា៖ «សម្ដេច ហ៊ុន សែន មានឥរិយាបថស្វែងយល់ និងស្ដាប់រាល់មតិមហាជន អាស្រ័យហេតុដូចនេះ អ្វីដែលជាព័ត៌មាន មិនត្រឹមតែជាជ្រុងមួយពីរាជរដ្ឋាភិបាលនោះទេ ក៏ប៉ុន្តែពីសាធារណជន ក៏ដូចជាអ្នកតាំងខ្លួនជាអ្នកអត្ថាធិប្បាយសង្គមផងដែរ។ ក្រុមទាំងនោះត្រូវតែជាអ្នកសុចរិត ទទួលខុសត្រូវផ្សព្វផ្សាយព័ត៌មានពិត ប្រកបដោយគុណធម៌ និងសីលធម៌ ដែលអាចទទួលយកបានពីគ្រប់ភាគី ក្នុងកិច្ចពង្រឹងរួមគ្នាកសាងជាតិ»។
សេចក្ដីប្រកាសនេះបានឲ្យដឹងថា អង្គភាពអ្នកនាំពាក្យរាជរដ្ឋាភិបាល គឺស្ថិតនៅក្នុងបំណង និងគោលដៅពង្រឹងការដឹង និងការយល់របស់មហាជន ដែលលោកជាចំណែកមួយដ៏មានប្រសិទ្ធភាព និងជាម្ចាស់អំណាច មិនត្រឹមតែចូលរួមក្នុងកិច្ចកសាងការពារអធិបតេយ្យជាតិប៉ុណ្ណោះទេ ក៏ប៉ុន្តែជាការរួមចំណែកដ៏ធំមួយនៃការងារអភិបាលកិច្ចល្អ និងការប្រឹងប្រែងរបស់រាជរដ្ឋាភិបាល ក្នុងកិច្ចកំណែទម្រង់ស៊ីជម្រៅ។
អង្គភាពនេះ មានទិសដៅសម្រាប់សាធារណជនក្នុងកិច្ចពង្រឹងថែរក្សាវប្បធម៌ឆ្លើយឆ្លង (2 way communication) និងវប្បធម៌សន្ទនា ដែលជាទស្សនៈដ៏ឧត្តុងឧត្តមលោក ហ៊ុន សែន រួមគ្នាទាំងថ្នាក់ជាតិ និងថ្នាក់ក្រោមជាតិ ដែលមានកិច្ចសហការដ៏ជិតស្និទ្ធជាមួយស្ថាប័នជំនាញគ្រប់វិស័យរបស់រដ្ឋ។
ជាមួយនេះផងដែរ វេទិកាសាធារណៈ សន្និសីទសារព័ត៌មានក្នុងរូបភាពរបាយការណ៍ ឬកម្រងទស្សនៈនៃការយល់ដឹងពីបណ្ឌិត អ្នកជំនាញ ក៏ដូចជាអ្នកអត្ថាធិប្បាយសង្គមពាក់ព័ន្ធទៅនឹងការងារជាតិ។ កិច្ចការទាំងអស់នេះ ក៏ត្រូវបានលើកតម្កើងយ៉ាងទូលំទូលាយ ដែលជាប្រយោជន៍សាធារណជន ក្នុងកិច្ចរួមគ្នាកសាងការពារជាតិខ្មែរតែមួយ៕