អភិបាលខេត្តកោះកុង កំណត់តំបន់មួយចំនួនឱ្យអនុវត្តកាតព្វកិច្ច ពាក់ម៉ាស់ និងរក្សាគម្លាតសុវត្ថិភាព ដើម្បីបង្ការការឆ្លងជំងឺកូវីដ ១៩
កោះកុង អភិបាលខេត្តកោះកុង លោកស្រី មិថុនា ភូថង បានដាក់ឱ្យប្រជាពលរដ្ឋនៅតាមតំបន់សំខាន់ៗមួយចំនួនត្រូវអនុវត្តនូវកាតព្វកិច្ចពាក់ម៉ាស់ និងរក្សាគម្លាតសុវត្ថិភាពនៅទីសាធារណៈ និងឯកជនដែលមានមនុស្សច្រើន។
សេចក្តីជូនដំណឹងនៅថ្ងៃទី ១៩ ខែឧសភា ស្តីពីការអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពនៅទីសាធារណៈ និងឯកជនដែលមានមនុស្សច្រើនបានកំណត់ពីទីសាធារណៈ និងឯកជនដែលមានមនុស្សច្រើនមួយចំនួនស្ថិតនៅ ក្នុងខេត្តកោះកុង ដូចជា ផ្សាររដ្ឋ និងឯកជនទាំងអស់ គ្រឹះស្ថានសិក្សាសាធារណៈ និងឯកជន វត្តអារាម ព្រះវិហារស៊ូវ៉ាវ និងស្នាក់ការថ្វាយបង្គំ តំបន់សេដ្ឋកិច្ចពិសេសខេត្តកោះកុង ទីតាំងច្រកទ្វារព្រំដែនអន្តរជាតិចាំយាម ធនាគារ និងគ្រឹះស្ថានមីក្រូហិរញ្ញវត្ថុ ភោជនីយដ្ឋាន អាហារដ្ឋាន និងហាងកាហ្វេ (ការចេញចូល) និងសណ្ឋាគារ និងផ្ទះសំណាក់។
លោក សុខ សុទ្ធី អភិបាលរងខេត្តកោះកុង បានប្រាប់កាសែត ភ្នំពេញ ប៉ុស្តិ៍ នៅថ្ងៃទី ២០ ឧសភាថា ការអនុវត្តកាតព្វកិច្ចពាក់ម៉ាស់ និងរក្សាគម្លាតសុវត្ថិភាពបុគ្គលនេះ បានចាប់ផ្តើមអនុវត្តចាប់ពីថ្ងៃទី ១៩ ខែឧសភាមក ហើយការអនុវត្តនេះធ្វើរហូតដល់មានការជូនដំណឹងជាថ្មី។
លោកបានមានប្រសាសន៍ថា៖ «មកទល់ពេលនេះ ខេត្តកោះកុងមានអ្នកឆ្លងវីរុសកូវីដ ១៩ ក្នុងសហគមន៍ចំនួន ១៦ នាក់ហើយ ហើយសម្រាប់រដ្ឋបាលខេត្ត ក្រៅពីការដាក់ឱ្យអនុវត្តនូវវិធានការពាក់ម៉ាស់និងរក្សាគម្លាតសុវត្ថិភាព យើងក៏បានបន្តការពង្រឹងនៅតាមច្រកចូលខេត្តផងដែរ ដោយត្រូវធ្វើការវាស់កម្ដៅ និងធ្វើតេស្តរហ័សរកមេរោគកូវីដ ១៩ ផងដែរ»។
លោក សុខ សុទ្ធី បានបញ្ជាក់ថា អាជ្ញាធរមិនតម្រូវឱ្យមានការដាក់ធ្វើចត្តាឡីស័កសម្រាប់អ្នកដំណើរចូលមកក្នុងខេត្តកោះកុងទេ ប៉ុន្តែត្រូវធ្វើតេស្តរហ័សចំពោះអ្នកដែលចូលមកហើយបើរកឃើញនឹងបញ្ជូនទៅសម្រាកព្យាបាលភ្លាមៗផងដែរ។
គួរបញ្ជាក់ផងដែរថា កន្លងមកនេះ ក្រសួងសុខាភិបាលបានដាក់រាជធានីភ្នំពេញនិងខេត្តចំនួន៦ផ្សេងទៀត ត្រូវអនុវត្តវិធានការពាក់ម៉ាស់និងរក្សាគម្លាតសុវត្ថិភាពដើម្បីការពារវីរុសកូវីដ ១៩។ ក្នុងនោះមានខេត្តកំពង់ចាមខេត្តតាកែវ ខេត្តកំពង់ស្ពឺ ខេត្តបន្ទាយមានជ័យ ខេត្តព្រះសីហនុ និងខេត្តសៀមរាម។
ជាមួយគ្នានេះដែរ អភិបាលខេត្តឧត្តរមានជ័យ លោក ប៉ែន កុសល្យ បានសម្រេចបង្កើតក្រុមការងារដើម្បីរៀបចំគ្រប់គ្រង និងចាត់ចែងសាកសព ដែលមានផ្ទុកមេរោគកូវីដ ១៩ ក្នុងភូមិសាស្ត្រខេត្តឧត្តរមានជ័យ។
លោកបានឱ្យដឹងថា ក្រុមការងារនេះត្រូវរៀបចំយន្តការចាក់ស្តែងអនុវត្តការរក្សាសុវត្ថិភាពក្នុងការគ្រប់គ្រងសពអ្នកជំងឺកូវីដ ១៩ ឱ្យបានសមស្របតាមបទដ្ឋានវេជ្ជសាស្ត្រនិងនិយាម វប្បធម៌ ប្រពៃណី និងសាសនា ក្នុងបរិបទនៃជំងឺកូវីដ ១៩។
យោងតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី ២០ ខែឧសភា បានរកឃើញអ្នកឆ្លងវីរុសកូវីដ ១៩ បន្ថែមទៀតរហូតដល់ ៤១៥ នាក់ មានអ្នកដែលបានព្យាបាលជាសះស្បើយចំនួន ៧៤៥ នាក់ និងអ្នកបានទទួលមរណភាពដោយសារជំងឺនេះថ្មីបន្ថែមទៀតចំនួន ៥ នាក់។
ក្រសួងសុខាភិបាលបានឱ្យដឹងទៀតថា ករណីឆ្លងថ្មីនេះ មានអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ ចំនួន ៤១១ នាក់ និងអ្នកដំណើរពីបរទេសចំនួន ៤ នាក់។
គិតត្រឹមព្រឹកថ្ងៃទី ២០ ខែ ឧសភា ឆ្នាំ ២០២១ ប្រទេសកម្ពុជាមានអ្នកឆ្លងវីរុសកូវីដ ១៩ សរុប កើនឡើងដល់ ២៣ ៦៩៧ នាក់ ក្នុងនោះអ្នកដែលបានព្យាបាលជាសះស្បើយមានចំនួន ១៥ ៧០០ នាក់ ឯអ្នកស្លាប់បានកើនឡើងរហូតដល់ ១៦៤ នាក់ផងដែរ៕
