ភ្នំពេញៈ លោក ជា សុមេធី អភិបាលខេត្ដព្រៃវែងបានអះអាងថា លោកកំពុងជំរុញវិស័យកសិកម្ម និងវិស័យរោងចក្រក្នុងខេត្ដនេះបន្ថែមដើម្បីបន្ថយការធ្វើចំណាកស្រុក ខណៈមានពលរដ្ឋ ២២ ម៉ឺននាក់ក្នុងចំណោមជាង ១ លាននាក់ ក្នុងខេត្តនេះបានធ្វើចំណាកស្រុកទៅក្រៅប្រទេស និងទៅខេត្តផ្សេងក្នុងប្រទេស។
លោក ជា សុមេធី ថ្លែងបែបនេះក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្ដព្រៃវែង» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅទីស្ដីការគណៈរដ្ឋមន្ដ្រីពីម្សិលមិញ។
លោកបានថ្លែងថា ខេត្ដព្រៃវែងមានសក្ដានុពលចម្បងលើវិស័យកសិកម្ម។ ក្នុងចំណោមពលរដ្ឋ ១ ២៤៥ ១២៧ នាក់ គឺមានប្រមាណ ៧៨,៦ ភាគរយជាគ្រួសារកសិករ និងជាខេត្ដជាប់លេខ ១ លើវិស័យកសិកម្មសម្រាប់ឆ្នាំ ២០១៩-២០២០ នៅទូទាំងប្រទេស។
លោកថា៖ «សព្វថ្ងៃរដ្ឋបាលខេត្ដព្រៃវែងបានរៀបចំផែនការ ៣ ឆ្នាំរកិល (២០១៩-២០២១) ដើម្បីជំរុញ និងលើកទឹកចិត្ដបងប្អូនប្រជាពលរដ្ឋលើវិស័យកសិកម្មដែលជាវិស័យចម្បងជាងគេក្នុងការបង្កើតការដាំដំណាំដាំដុះ ចិញ្ចឹមសត្វ រួមមាន មាន់ ត្រី ទា ជ្រូក និងគោ ជាដើម។ អ្វីដែលសំខាន់ជាងគេនោះគឺយើងត្រូវខិតខំយ៉ាងណាដើម្បីស្វែងរកទីផ្សារជូនដល់ប្រជាពលរដ្ឋក្នុងការលក់ចេញនូវផលិតផលកសិកម្មដែលផលិតបាន»។
លោកអភិបាលបញ្ជាក់ថា៖ «នៅពេលយើងរកទីផ្សារបានដល់ការលក់ចេញរបស់ពួកគាត់ហើយ ខ្ញុំជឿថា កំណើននៃការនាំចេញផលិតផលកសិកម្មក្នុងខេត្ដនឹងមានការកើនឡើងច្រើនជាងមុន។
ពលរដ្ឋខេត្ដព្រៃវែងគឺជាមនុស្សឧស្សាហ៍ណាស់ក្នុងការធ្វើការងារកសិកម្ម»។
លោក ជា សុមេធី បានឱ្យដឹងថា លោកកំពុងកៀរគរវិនិយោគិនដើម្បីមកវិនិយោគក្នុងខេត្ដព្រៃវែង។ វិស័យកសិកម្មឈានទៅមុខហើយ ប៉ុន្ដែនៅឡើយតែវិស័យមួយចំនួនទៀតដូចជាវិស័យរោងចក្រជាដើម។
លោកបានបន្តថា នៅពេលមានការវិនិយោគលើវិស័យរោងចក្រនឹងកាត់បន្ថយការធ្វើចំណាកស្រុក។ លោកអភិបាលអះអាងថា៖ «ជាក់ស្ដែងនៅក្នុងខេត្ដព្រៃវែងយើងគឺមានប្រជាពលរដ្ឋធ្វើចំណាកស្រុករហូតដល់ ២២ ម៉ឺននាក់ក្នុងនោះការធ្វើចំណាកស្រុកក្នុងប្រទេសមាន ១៧ ម៉ឺននាក់ និងទៅក្រៅប្រទេសមានជាង ៥ ម៉ឺននាក់»។
លោកអភិបាលខេត្តបានអំពាវនាវដល់វិនិយោគិនឱ្យមកវិនិយោគនៅខេត្ដព្រៃវែង ដើម្បីជួយឱ្យពលរដ្ឋមានការងារធ្វើដើម្បីចូលរួមកាត់បន្ថយការធ្វើចំណាកស្រុកទៅខេត្ដផ្សេងក៏ដូចជាទៅក្រៅប្រទេស។
លោក អ៊ុក សំណាង ប្រធានមន្ទីរ កសិកម្ម រុក្ខាប្រមាញ់ និងនេសាទខេត្ដព្រៃវែងបានថ្លែងថា តាមការផ្សព្វផ្សាយរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទដែលបង្ហោះលើហ្វេសប៊ុកផ្លូវការរបស់លោក វេង សាខុន រដ្ឋមន្ដ្រីក្រសួងនេះឲ្យដឹងថា នៅឆ្នាំ ២០១៩-២០២០ ខេត្ដព្រៃវែងផលិតស្បៀងបានច្រើនជាងគេក្នុងចំណោម ២៥ រាជធានី ខេត្ដ។
លោកថា៖ «ខេត្ដព្រៃវែងត្រូវបានចាត់ទុកជាខេត្ដលេខ ១ ក្នុងការផលិតស្បៀង។ ខេត្ដព្រៃវែងប្រៀបដូចកូនក្រមុំលាក់មុខដែលយើងមិនធ្លាប់ចាប់អារម្មណ៍ថា មានសក្តានុពលគ្រប់យ៉ាងនោះទេ។ ប៉ុន្ដែ ១០ ឆ្នាំចុងក្រោយនេះ វិស័យកសិកម្មក្នុងខេត្ដមានការកើនឡើង ជាពិសេសគឺដំណាំស្រូវតែម្ដង។ ក្នុងឆ្នាំ ២០១៩ និងឆ្នាំ ២០២០ យើងផលិតស្រូវបានជាង ១ ៣០០ ០០០ តោនក្នុង ១ ឆ្នាំរួមនឹងដំណាំកសិផលជាច្រើនទៀត»៕