អាជីវករលក់ដូរនៅផ្សារធំបាត់ដំបង (ផ្សារណាត់) នាពេលកន្លងមក។ រូបថត ហ្វេសប៊ុក
បាត់ដំបង៖ អភិបាលខេត្តបាត់ដំបង លោក ងួន រតនៈ បានសម្រេចបន្តបិទផ្នែកខាងក្នុងផ្សារ (តួផ្សារ) នៃផ្សារចំនួន ៨ ក្នុងក្រុងបាត់ដំបង និងផ្សារក្នុងស្រុកថ្មគោល ២ កន្លែងទៀតជាបណ្ដោះអាសន្នរយៈពេល ៨ ថ្ងៃ ចាប់ពីថ្ងៃទី ២១ ដល់ថ្ងៃ ២៨ មេសា ដើម្បីទប់ស្កាត់ការរីករាលដាលជំងឺកូវីដ ១៩ នៅក្នុងសហគមន៍។
សេចក្តីសម្រេចដែលចុះហត្ថលេខាដោយលោក ងួន រតនៈ ចេញផ្សាយនៅថ្ងៃនេះ ស្តីពីវិធានការរដ្ឋបាលជាបណ្តោះអាសន្នត្រូវបន្តបិទផ្សាររហូតដល់ថ្ងៃទី ២៨ មេសា ដើម្បីចូលរួមបង្ការ និងទប់ស្កាត់ការឆ្លងរាលដាលនៃជំងឺកូវីដ ១៩ ក្នុងភូមិសាស្រ្តខេត្តបាត់ដំបង។
លោក ងួន រតនៈ បានឱ្យដឹងក្នុងសេចក្ដីសម្រេចនេះថា ផ្សារចំនួន ៨ នៅក្រុងបាត់ដំបង និងផ្សារចំនួន ២ ទៀត នៅស្រុកថ្មគោល ដែលត្រូវបន្តបិទរួមមាន ផ្សារធំបាត់ដំបង (ផ្សារណាត់) ផ្សារបឹងឈូក ផ្សារ ១៣មករា ផ្សារអប្សរា (ផ្សារលើ) ផ្សាររោងល្ខោន ផ្សារវត្តលៀប ផ្សារពោធិ៍វង្ស និងទី៨ គឺផ្សារទំនើបភូពុយ។ ដោយឡែកផ្សារនៅស្រុកថ្មគោ ចំនួន ២ រួមមានផ្សារថ្មគោល និងផ្សារជ្រៃក្នុងស្រុកថ្មគោលក៏ត្រូវបិទដែរ។
.jpg)
យ៉ាងណាក្ដី រដ្ឋបាលខេត្តបាត់ដំបងបានបញ្ជាក់ថា ផ្សារទាំង ១០ នេះត្រូវបានអនុញ្ញាតឱ្យលក់ផ្នែកខ្លះនៃបរិវេណខាងក្រៅផ្សារដូចជា បន្លែ ត្រី សាច់ គ្រឿងឧបភោគ បរិភោគ ដែលជាតម្រូវការចាំបាច់ប្រចាំថ្ងៃ ដោយអនុវត្តវិធានការសុខាភិបាលក្នុងការរក្សាគម្លាតសង្គម គម្លាតបុគ្គល (ចាប់ពី ១,៥ ម៉ែត្រឡើងទៅ) ការពាក់ម៉ាស់ និងលាងដៃ។
ក្រៅពីការបិទផ្សារមួយរយៈ រដ្ឋបាលខេត្តបាត់ដំបងក៏បន្តដាក់ចេញវិធានការផ្អាកជាបណ្តោះអាសន្ននូវសកម្មភាពអាជីវកម្មរហូតដល់ថ្ងៃទី ២៨ មេសា ដូចគ្នា។
សេចក្តីសម្រេចបានឱ្យដឹងថា0 ផ្អាកជាបណ្ដោះអាសន្ននូវសកម្មភាពអាជីវកម្មចំពោះភោជនីយដ្ឋាន អាហារដ្ឋាន ហាងកាហ្វេ ហាងភេសជ្ជៈ និងកន្លែងលក់អាហារដទៃទៀត ដែលទទួលអតិថិជនចូលមកទទួលទានអាហារ ភេសជ្ជៈ ឬទទួលទានគ្រឿងស្រវឹង ប៉ុន្តែទីតាំងអាជីវកម្មទាំងនោះអាចលក់ជាលក្ខណៈវេចខ្ចប់បាន។
ផ្អាកជាបណ្ដោះអាសន្ននូវការប្រមូលផ្តុំ ឬការជួបជុំគ្នាទទួលទានអាហារ ភេសជ្ជៈ ឬទទួលទាន គ្រឿងស្រវឹង និងការលេងល្បែងកម្សាន្ត និងកីឡាគ្រប់ប្រភេទដែលមានលក្ខណៈប្រមូលផ្តុំ លើកលែងការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋាន ឬទីសំណាក់ជាមួយគ្នា។
សេចក្តីសម្រេចបានបញ្ជាក់ថា៖ «បន្តបិទរមណីយដ្ឋានទេសចរណ៍ នៅក្នុងភូមិសាស្ត្រខេត្តបាត់ដំបង និង រឹតបន្តឹងការធ្វើដំណើរចំពោះការដឹកជញ្ជូនមនុស្សដែលមានចំនួនច្រើន ក្នុងគោលបំណងចូលរួមបង្ការ និងទប់ស្កាត់ការឆ្លងរាលដាលនៃជំងឺកូវីដ១៩នៅក្នុងភូមិសាស្ត្រខេត្តបាត់ដំបង៕
