ផ្លូវដើរក្រាលឈើនៅក្នុងតំបន់អង្គរកំពុងត្រូវបានជួសជុលកាលពីម្សិលមិញ។ រូបថត អាជ្ញាធរជាតិអប្សរា
សៀមរាបៈ ក្រុមការងាររបស់នាយកដ្ឋានអភិរក្សប្រាសាទក្នុងឧទ្យានជាតិអង្គរ និងបុរាណវិទ្យាបង្ការនៃអាជ្ញាធរជាតិអប្សរាកំពុងបន្តរៀបចំ និងជួសជុល ហេដ្ឋារចនាសម្ព័ន្ធ ប្រព័ន្ធផ្លូវថ្នល់ សួនច្បារ ប្រព័ន្ធទុយោបាញ់ទឹក កម្រាលឈើតាមផ្លូវដើរ និងការជួសជុលប្រាង្គប្រាសាទនានាក្នុងបរិវេណតំបន់អង្គរ ដើម្បីធ្វើឱ្យទីរមណីយដ្ឋានដ៏ល្បីល្បាញមួយនេះរឹតតែមានភាពទាក់ទាញដល់ភ្ញៀវទេសចរបន្ថែមទៀត។
លោក ឡុង កុសល អ្នកនាំពាក្យអាជ្ញាធរជាតិអប្សរាបានថ្លែងប្រាប់ភ្នំពេញប៉ុស្ដិ៍ កាលពីថ្ងៃអង្គារម្សិលមិញថា មានកិច្ចការងារជាច្រើនដែលអាជ្ញាធរជាតិអប្សរាកំពុងតែបន្តធ្វើក្នុងពេលបច្ចុប្បន្ន ក្នុងនោះមានការងារលើកកម្ពស់សោភណភាពប្រាង្គប្រាសាទ និងបរិវេណជុំវិញប្រាសាទការងារផ្នែកបរិស្ថាន ដើម្បីធ្វើយ៉ាងណាឱ្យរមណីយដ្ឋានតាមប្រាង្គប្រាសាទមានភាពបៃតង ការរៀបចំជួសជុលហេដ្ឋារចនាសម្ព័ន្ធទូទៅក្នុងបរិវេណប្រាសាទអង្គរជាដើម។
លោកថ្លែងថា៖ «ក្នុងអំឡុងពេលនេះយើងកំពុងសម្រុកធ្វើកិច្ចការងារជាច្រើននៅតំបន់អង្គរនេះ។ យើងក៏កំពុងរៀបចំកែលម្អប្រព័ន្ធរំដោះទឹកនៅមុខប្រាសាទអង្គរ ដាំកូនឈើ ដាំស្មៅ និងរៀបចំប្រព័ន្ធស្រោចស្រពទឹកនៅក្នុងប្រាសាទ ដើម្បីឱ្យមានភាពបៃតងទាំងខែប្រាំង និងខែវស្សា ជាដើម»។
.jpg)
លោក កុសល បានឱ្យដឹងថាបច្ចុប្បន្នប្រព័ន្ធហេដ្ឋារចនាសម្ព័ន្ធផ្លូវថ្នល់ជាច្រើនកន្លែង និងច្រើនគីឡូម៉ែត្រត្រូវបានអាជ្ញាធរអប្សរាបានរៀបចំជួសជុលរួចរាល់ ក្នុងនោះក៏មានការរៀបចំផ្លូវសម្រាប់ភ្ញៀវទេសចរជិះកង់ផងដែរ។ ចំណែកការងារជួសជុលប្រាសាទ បច្ចុប្បន្នក្រុមការងារកំពុងបន្តជួសជុលប្រាង្គប្រាសាទនៅកណ្ដាលស្រះស្រង់ និងទើបតែបានបញ្ចប់ការជួសជុលនៅប្រាសាទអកយំ និងកំពុងបន្តស្តារស្រះទឹកខាងជើងនៃប្រាសាទអង្គរវត្ដផងដែរ។
លោកបញ្ជាក់ថា៖ «តាមផ្នែករៀងៗខ្លួនគឺយើងកំពុងតែយកពេលនេះមមាញឹកក្នុងការជួសជុលរៀបចំ ហេដ្ឋារចនាសម្ព័ន្ធនានាក្នុងបរិវេណតំបន់អង្គរ។ យើងឃើញថា បច្ចុប្បន្ននេះបើទោះបីជាមានបញ្ហាជាករណីប្រឈម ក៏ប៉ុន្ដែយើងក៏ប្រែក្លាយវាទៅជាឱកាសក្នុងការរៀបចំកិច្ចការងារឱ្យបានល្អប្រសើរ នៅពេលដែលបញ្ហាជំងឺកូវីដ១៩ថមថយទៅវិញ យើងនឹងមានលទ្ធភាពក្នុងការរៀបចំការងារអភិរក្សរមណីយដ្ឋានអង្គរនេះឱ្យបានល្អប្រសើរតែម្ដង»។
ក្រុមការងាររបស់នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរាកាលពីថ្ងៃអង្គារម្សិលមិញកំពុងរៀបចំកម្រាលឈើថ្មើរជើងក្នុងបរិវេណប្រាសាទអង្គរវត្ត។
លោក កុសល ឱ្យដឹងថា ការរៀបចំជួសជុលកម្រាលឈើថ្មើរជើងនៅក្នុងបរិវេណប្រាសាទអង្គរវត្តត្រូវបានជួសជុលដោយអនុវត្តជាប្រចាំ ដើម្បីលើកតម្លៃរមណីយដ្ឋានអង្គរ និងបង្កភាពងាយស្រួលដល់ភ្ញៀវទេសចរក្នុងការធ្វើដំណើរទស្សនាប្រាសាទ។
បើតាមរបាយការណ៍របស់អាជ្ញាធរអប្សរាក្នុងរយៈពេល ៣ ខែ ដើមឆ្នាំ ២០២០ អាជ្ញាធរជាតិអប្សរាបានចូលរួមសង់បង្គន់អនាម័យជូនពលរដ្ឋបានចំនួន ៧០ បង្គន់ផងដែរ ដើម្បីគិតគូរពីបញ្ហាសុខភាពរបស់ប្រជាពលរដ្ឋក្នុងតំបន់រមណីយដ្ឋានអង្គរ។ របាយការណ៍នេះបញ្ជាក់ថា តាំងពីឆ្នាំ ២០១៨ រហូតមកដល់បច្ចុប្បន្ន អាជ្ញាធរជាតិអប្សរាបានចូលរួមថវិកាបដិភាគដើម្បីសង់បង្គន់អនាម័យជូនប្រជាពលរដ្ឋក្នុងរមណីយដ្ឋានអង្គរបានចំនួន ១២០០ បង្គន់រួចហើយ។
លោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍បានប្រាប់ភ្នំពេញប៉ុស្ដិ៍កាលពីថ្ងៃចន្ទថា អ្នកទេសចរចូល-ចេញកម្ពុជាចាប់តាំងពីថ្ងៃទី ១ ខែមករា ឆ្នាំ ២០២០ ដល់ ថ្ងៃទី ៥ ខែមេសា ឆ្នាំ ២០២០ មានចំនួន ៩១០៤២០ នាក់។
គួរបញ្ជាក់ថា រដ្ឋាភិបាលកម្ពុជាបានសម្រេចអនុញ្ញាតឱ្យទេសចរបរទេសដែលបានមកដល់កម្ពុជាក្រោយថ្ងៃទី ១ ខែមករា ឆ្នាំ ២០២០ ដែលជាអ្នកកាន់ទិដ្ឋាការទេសចរណ៍ (Visa T) អាចបន្តស្នាក់នៅតទៅទៀតបានរហូតដល់អាចមានលទ្ធភាពត្រឡប់ទៅប្រទេសខ្លួនវិញបាន ដោយមិនមានការផាកពិន័យឡើយ ខណៈដែលជើងហោះហើរទៅកាន់បណ្តាប្រទេសជាច្រើនត្រូវបានបិទ ដើម្បីទប់ស្កាត់ការរីករាលដាលនៃជំងឺកូវីដ១៩។ នេះបើតាមលិខិតរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ដែលចេញផ្សាយកាលពីថ្ងៃសុក្រ ទី ៣ ខែមេសា ឆ្នាំ ២០២០៕
