លោក អ៊ួន ឈិន ថ្លែងប្រាប់អ្នកសារពត៌មាននាពេលកន្លងមក។ ហេង ជីវ័ន
ភ្នំពេញៈ សាលាឧទ្ធរណ៍កាលពីថ្ងៃទី ២១ មិថុនា សម្រេចច្រានចោលភ្លាមៗ បន្ទាប់ពីជំនុំជម្រះបណ្តឹងសុំលុបចោលបម្រាមឲ្យស្ថិតនៅក្រោមការត្រួតពិនិត្យរបស់តុលាការរបស់អតីតអ្នកយកព័ត៌មានវិទ្យុអាស៊ីសេរី ២ នាក់ ប៉ុន្តែមេធាវីថាកូនក្តីរបស់លោកគ្មានកាតព្វកិច្ចជាប់ការហាមឃាត់ត្រួតពិនិត្យដូចកន្លងមកទៀតទេព្រោះនៅក្នុងដីកាដំណោះស្រាយមួយមិនបានសរសេរឲ្យពួកគាត់ស្ថិតនៅក្រោមការត្រួតពិនិត្យឡើយ។
ពាក់ព័ន្ធការសម្រេចមិនពិចារណា លើបណ្តឹងស្នើសុំលុបបម្រាមនៅក្រៅឃុំនេះត្រូវបាន លោក អ៊ួន ឈិន ប្រាប់កាលពីម្សិលមិញថាកាលពីបើកសវនាការនៅថ្ងៃទី ២១ មិថុនា នោះ លោក និងលោក យាង សុជាមេត្តា បានប្រាប់ចៅក្រមដូចគ្នាថា ពួកលោកទាំង ២ នាក់ ស្នើសុំដល់តុលាការឲ្យលុបបម្រាមនេះចោល ដើម្បីឲ្យពួកគាត់មានឱកាសរកស៊ីចិញ្ចឹមប្រពន្ធកូន។
លោក ឈិន ថ្លែងថា៖ «យើងប្តឹងឲ្យតុលាការបញ្ចប់ការដាក់ពួកយើងឲ្យស្ថិតនៅក្រោមការត្រួតពិនិត្យរបស់តុលាការ។ ដូចជាការហាមមិនឲ្យចេញទៅក្រៅប្រទេសហើយក្នុង ១ ខែ ត្រូវទៅបង្ហាញមុខនៅប៉ុស្តិ៍នគរបាលម្តង និងសុំសម្ភារដែលសមត្ថកិច្ចរឹបអូសតែប៉ុណ្ណឹងទេ។ ពួកខ្ញុំមិនបានទាមទារអ្វីឲ្យលើសពីនេះទេ»។
.jpg)
ចំពោះលោក សំ ចំរើន ជាមេធាវីការពារសិទ្ធិឲ្យលោកអ៊ួន ឈិននិងលោក យាង សុជាមេត្តា ប្រាប់ពីម្សិលមិញដែរថាការស្នើសុំពីការស្ថិតឲ្យនៅក្រោមការត្រួតពិនិត្យរបស់តុលាការនេះត្រូវបានលោកចៅក្រម ធូ មណី ប្រធានក្រុមប្រឹក្សាជំនុំជម្រះបានច្រានចោលភ្លាមៗបន្ទាប់ពីជំនុំជម្រះបានជាង ១ ម៉ោងមក។ ប៉ុន្តែចំពោះការប្តឹងសារទុក្ខនោះលោកនឹងត្រូវការពិភាក្សាជាមួយកូនក្តីរបស់លោកសិន ថាតើគួរបន្តទៀត ឬយ៉ាងណា ប៉ុន្តែលោកយល់ថា ការរំពឹងថាប្តឹងសារទុក្ខ មានការគិតតិចតួចនៅឡើយ។
លោកប្រាប់ថា៖ «ចៅក្រម ធូ មណី ថាការស្នើសុំនោះសាលាឧទ្ធរណ៍មិនអាចទទួលយកមកពិចារណាបានទេ។ មានន័យថា តុលាការមិនយកការស្នើសុំទៅធ្វើការពិចារណា ឬវិនិច័្ឆយសេចក្តីផ្សេងៗបានទេ»។
លោកប្រាប់ថា មូលហេតុដែលនាំឲ្យកូនក្តីរបស់លោកប្តឹងទាស់ចូលសាលាឧទ្ធរណ៍នោះដោយសំអាងថា នៅក្នុងដីកាដំណោះស្រាយផ្ទាល់ (ចៅក្រមស៊ើបសួរ) បានសរសេរថារក្សាជនត្រូវចោទទាំង ២ នាក់ ខាងលើឲ្យស្ថិតនៅក្រោមការត្រួតពិនិត្យរបស់តុលាការរហូតដល់ថ្ងៃជំនុំជម្រះ។ ដោយឡែកនៅក្នុងដីកាដំណោះស្រាយមួយទៀតមិនបានសរសេរឲ្យកូនក្តីរបស់លោកស្ថិតនៅក្រោមការត្រួតពិនិត្យរបស់តុលាការដែរ។ គ្រាន់តែសរសេរថា បញ្ជូនពួកគាត់ទៅជំនុំជម្រះ។ បញ្ហានេះហើយទើបឲ្យពួកគាត់សម្រេចចិត្តប្តឹងឧទ្ធរណ៍។
លោកបញ្ជាក់ប្រាប់ថាកូនក្តីរបស់លោកមិនទាន់ត្រូវបានសាលាដំបូងរាជធានីភ្នំពេញបើកសវនាការក្នុងអង្គសេចក្តីនៅឡើយទេ ប៉ុន្តែលោកនឹងព្យាយាមជំរុញឲ្យសាលាដំបូងរាជធានីភ្នំពេញបើកសវនាការសំណុំរឿងកូនក្តីរបស់លោកនៅ ក្នុងអង្គសេចក្តីឲ្យបានឆាប់។
លោក អ៊ួន ឈិន និងលោក យាង សុធារិន ត្រូវបានឃាត់ខ្លួនកាលពីថ្ងៃទី ១៤ វិច្ឆិកា ឆ្នាំ ២០១៧ ដោយតុលាការចោទប្រកាន់ពួកគេតាមមាត្រា ៤៤៥ នៃក្រមព្រហ្មទណ្ឌនៃព្រះរាជាណាចក្រកម្ពុជាពីបទប្រគល់ឲ្យរដ្ឋបរទេសនូវព័ត៌មានជាអាទិ៍ដែលបង្កឱ្យមានការអន្តរាយដល់កិច្ចការការពារជាតិ៕
