លោក យ៉េង វីវៈ ថ្លែងក្នុងពិធីខួប៤ឆ្នាំនៃការបង្កើតបក្ស GDP។ សហការី
ភ្នំពេញៈ គណបក្សប្រជាធិបតេយ្យមូលដ្ឋានជំរុញឲ្យមានការដោះលែងលោក កឹម សុខា អតីតប្រធានបក្សប្រឆាំង និងពង្រឹងការគោរពសិទ្ធិមនុស្សឡើងវិញ ដើម្បីបញ្ចៀសសម្ពាធផ្សេងៗ ជាពិសេសសម្ពាធក្នុងការផ្អាកប្រព័ន្ធអនុគ្រោះពន្ធ EBA សម្រាប់កម្ពុជា។
លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន ហៅកាត់ថា GDP បានថ្លែងកាលពីថ្ងៃអាទិត្យ ក្នុងគម្រប់ខួប ៤ ឆ្នាំ នៃការបង្កើតបក្សប្រជាធិបតេយ្យមូលដ្ឋាន ថាលោកស្វាគមន៍ចំពោះការចរចាស្វែងរកដំណោះស្រាយរវាងកម្ពុជា និងភាគីសហភាពអឺរ៉ុប ដើម្បីឲ្យកម្ពុជានៅតែរក្សាបានប្រព័ន្ធអនុគ្រោះពន្ធ EBA។
លោកក៏បានជំរុញឲ្យរដ្ឋាភិបាលដោះលែង លោក កឹម សុខា អតីតប្រធាននៃអតីតគណបក្សសង្គ្រោះជាតិ ដែលលោកថាកំពុងជាប់ឃុំនៅក្នុងផ្ទះឲ្យមានសេរីភាពឡើងវិញ និងពង្រឹងការគោរពសិទ្ធិមនុស្ស ដើម្បីចៀសវាងពីការដាក់សម្ពាធផ្សេងៗពីអន្តរជាតិ និង រក្សាការងារសម្រាប់ប្រជាជន។
.jpg)
លោក កឹម សុខា ត្រូវបានសមត្ថកិច្ចចាប់ឃុំខ្លួន កាលពីរំលងអាធាត្រថ្ងៃទី ៣ ខែ កញ្ញា ឆ្នាំ ២០១៧ ក្រោមការចោទប្រកាន់ពីបទ «ក្បត់ជាតិ» ពាក់ព័ន្ធនឹងការថ្លែងសុន្ទរកថាជាសាធារណៈរបស់លោក កាលពីឆ្នាំ ២០១៣ នៅប្រទេស អូស្ត្រាលី ដែលថា លោកបានទទួលដំបូន្មានពីសហរដ្ឋអាមេរិកក្នុងការធ្វើនយោបាយ។ ដោយលោកជាប់ចោទពីបទក្បត់ជាតិ គណបក្សរបស់លោកត្រូវបានតុលាការកំពូលរំលាយ កាលពីថ្ងៃទី ១៦ ខែ វិច្ឆិកា ឆ្នាំ ២០១៧។ កាលពីខែ កញ្ញា ២០១៨ តុលាការបានដោះលែងលោកឲ្យនៅក្រៅឃុំបណ្ដោះអាសន្ន ក្រោមការត្រួតពិនិត្យរបស់តុលាការ។
ភ្នំពេញប៉ុស្តិ៍ មិនអាចទាក់ទងលោក យ៉េង វីរៈ ដើម្បីសុំការបញ្ជាក់បានទេកាលពីម្សិលមិញ។ ប៉ុន្តែលោក ឡឹក សុធារ អ្នកនាំពាក្យគណបក្ស GDP បានថ្លែងថា៖ «ក្នុងឱកាសគម្រប់ខួប ៤ ឆ្នាំ នៃគណបក្សប្រជាធិបតេយ្យមូលដ្ឋានកាលពីម្សិលមិញ លោកប្រធាន យ៉េង វីរៈ បានអំពាវនាវដល់រាជរដ្ឋាភិបាលឲ្យដោះលែងលោក កឹម សុខា។ ក្នុងន័យទី១ ជំរុញឲ្យមានប្រជាធិបតេយ្យឡើងវិញ ទី២ បើកចំហនូវសិទ្ធិនយោបាយដែលអ្នកនយោបាយអាចប្រកួតប្រជែងនៅក្នុងវិថីនយោបាយបានល្អ»។
លោក សុធារ ថ្លែងថា បើលោក កឹម សុខា មិនត្រូវបានដោះលែងទេនោះ វាជាការគួរឲ្យសោកស្ដាយ ហើយជាអ្វីដែល GDP និងពលរដ្ឋកម្ពុជាមិនចង់ឃើញ និងមិនចង់បាន។
លោកថ្លែងថា៖ «ប្រសិនបើលោក កឹម សុខា ត្រូវបានដោះលែងនោះ នោះសម្ពាធនានានឹងថយចុះ ហើយការដក ឬព្យួរ EBA ប្រហែលជាមិនអាចកើតឡើងទេបាទ»។
លោកបន្ថែមថា GDP ចង់ឃើញមានការប្រកួតនយោបាយដោយស្មើភាពគ្នា ហើយលោក កឹម សុខា ហាក់ដូចជាមិនមានទោសកំហុសដូចអ្វីដែលត្រូវបានចោទប្រកាន់ទេ។
លោកបញ្ជាក់ថា៖ «អ្វីដែលយើងចង់បានបំផុត គឺសេរីភាពនយោបាយ គឺអ្នកនយោបាយមិនគួរត្រូវបានរឹតត្បិត មិនគួរត្រូវបានគំរាមកំហែង មិនគួរត្រូវបានរារាំងក្នុងការធ្វើនយោបាយប្រកបដោយសុចរិតទេ»។
លោក សុធារ ថ្លែងថា ការដោះលែងដោយវិធីណានោះ អាស្រ័យលើការសម្រេចរបស់តុលាការ។
ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងថា ការស្នើសុំរបស់ GDP ជាសិទ្ធិសេរីភាពរបស់គណបក្សនោះ ប៉ុន្តែការស្នើសុំដែលផ្ទុយពីច្បាប់ជាធរមាន ការស្នើសុំនោះមិនមានឥទ្ធិពលអ្វីនោះទេ។
លោក ម៉ាលីន បានថ្លែងថា៖ «ជានីតិវិធីច្បាប់ គឺមិនមានអ្នកណាអាចទម្លាក់ចោលបទចោទ ឬដោះលែងបានទេនៅក្នុងដំណើរការនីតិវិធីរបស់តុលាការ។ មានតែតុលាការទេដែលអាចសម្រេចថាតើគួរទម្លាក់ ឬមិនទម្លាក់ ហើយត្រូវបន្តនីតិវិធីតទៅមុខទៀតដោយរបៀបណា? និងផ្អែកអង្គហេតុអង្គច្បាប់ និងភ័ស្តុតាង សក្ខីកម្មដែលមានជាធរមាន»។
លោកស្រី ម៉េង សុភារី មេធាវីមួយរូបរបស់លោក កឹម សុខា បានបញ្ជាក់ពីម្សិលមិញថា រហូតមកដល់ពេលនេះ សំណុំរឿងរបស់លោក កឹម សុខា នៅទ្រឹងត្រឹមដំណាក់កាលចៅក្រមស៊ើបសួរ ហើយនៅពេលនេះមិនមានអ្វីវិវត្តថ្មីទេ។
លោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា ការដោះលែងលោក កឹម សុខា គឺអាស្រ័យលើតុលាការ និងប្រព័ន្ធច្បាប់។ លោកថា បើតុលាការឲ្យដោះលែង ហើយនៅតែមិនមានការដោះលែងនោះទើបជាបញ្ហា។
លោកនិយាយថា៖ «ការទាមទាររបស់អ្នកនយោបាយជាការទាមទារ និងជាសិទ្ធិរបស់អ្នកនយោបាយ ប៉ុន្តែមនុស្សបង្កើតសង្គម សង្កមបង្កើតច្បាប់។ អ៊ីចឹងច្បាប់ត្រូវតែគ្រប់គ្រងសង្គម។ ដូច្នេះទាមទារឲ្យសង្គមមើលច្បាប់ថា តើគេអនុវត្តច្បាប់ទេ។ បើតុលាការចេញសាលក្រមឲ្យដោះលែង ហើយនៅតែមិនលែង អាហ្នឹងរឿងហ្នឹងចូលរឿងផ្សេងហើយ គឺសង្គមមិនគោរពច្បាប់»៕
