បញ្ជូន​បុរស​ថៃ​ពីរ​នាក់​ទៅ​ពន្ធនាគារ​ពី​បទ​កាន់​អាវុធ​ខុស​ច្បាប់


បន្ទាយមានជ័យៈ ជន​សង្ស័យ​ជាតិ​ថៃ​ពីរ​នាក់​ត្រូវ​សាលា​ដំបូង​ខេត្ត​បញ្ជូន​ទៅ​ឃុំ​ខ្លួន​បណ្តោះ​អាសន្ន​នៅ​ពន្ធនាគារ​ខេត្ត​នៅ​ល្ងាច​ថ្ងៃ​ចន្ទ​នេះ​ ពាក់​ព័ន្ធ​ការ​ប្រើ​ប្រាស់​អាវុធ​ខុស​ច្បាប់​បន្ទាប់​ពី​កម្លាំង​អាវុធហត្ថ​ខេត្ត​បន្ទាយ​មាន​ជ័យ​ចាប់​ខ្លួន​នៅក្នុ​ង​កាស៊ីណូ​មួយ​ជាប់​ជាយដែន​ប្រទេស​កម្ពុជា-ថៃ​កាលពី​ចុង​សប្តាហ៍ ។

លោក ម៉ែន ភី​រម្យ មេបញ្ជាការរង​កងរាជអាវុធហត្ថ​ខេត្ត​ប្រាប់​​ថា ជនជាតិ​ថៃ​ចាប់ខ្លួន​ឈ្មោះ​តាន់​សំណាង​ហៅ​ដាំ អាយុ៤២ឆ្នាំ និង​ឈ្មោះ​ឈិ​តា​សា​វង់​ចក្រី អាយុ ៣៦ឆ្នាំមាន​ទីលំនៅ​ក្នុងប្រទេស​ថៃ​ហើយ​ត្រូវ​កម្លាំង​អាវុធហត្ថ​ចាប់ខ្លួន​នៅក្នុង​បរិវេណ​កាស៊ីណូ​លំដាប់​ផ្កាយ​ប្រាំ​ឈ្មោះ​ស្តារ​វី​ហ្គាស ក្នុង​ក្រុង​ប៉ោយប៉ែត​ខេត្តបន្ទាយមានជ័យ ។

លោក​ប្រាប់​បន្តថា៖​«យើង​ចោទ​ពួកគេ​ពីបទ​កាន់កាប់​អាវុធ​គ្មាន​លិខិតអនុញ្ញាត »។

លោក​បន្ត​ឲ្យ​ដឹង​ទៀតថា​ជនសង្ស័យ​ទាំង២នាក់​ត្រូវ​ចាប់ខ្លួន​ដោយសារ​សមត្ថកិច្ច​សង្ស័យ​ទៅលើ​កាបូបដៃ​របស់​ពួកគេ​ហើយក៏​ធ្វើការ​ឆែកឆេរ​ឃើញ​មាន​លាក់​អាវុធខ្លី​ម៉ាក​ប៉េអាកុល​មួយ​ដើម​និង​គ្រាប់​ពេញ៣បង់​ក្នុង​កាបូប​នោះ​ផង ។

លោក​ឲ្យ​ដឹង​ទៀតថា ជនសង្ស័យ​ជាតិ​ថៃ​ទាំង២នាក់​នោះ​មិនដឹងថា​មានមុខ​អ្វី​ទេ​ប៉ុន្តែ​គេ​ប្រាប់ថា​ធ្លាប់​ចេញចូល​ឆ្លងដែន​មក​ក្រុង​ប៉ោយប៉ែត​លេងល្បែង​ក្នុង​កាស៊ីណូ​ខាងលើ។

លោក ផាន់​ភី​រម្យ ព្រះ​រាជ​អាជ្ញា​រង​អម​សាលា​ដំបូង​ខេត្ត​បន្ទាយ​មាន​ជ័យ​ឲ្យ​ដឹង​ថា ជន​សង្ស័យ​ជាតិ​ថៃ​ ២​នាក់​ដែល​កម្លាំង​កង​រាជ​អាវុធហត្ថ​បញ្ជូន​មក​ពី​ព្រឹក​ថ្ងៃ​ចន្ទ​នោះ​មិន​ដឹង​ថា​អាច​បញ្ចប់​ការ​ស៊ើបសួរ​ឬ​អត់​ទេ​ព្រោះ​ទើប​តែ​បញ្ជូន​មក។

លោក​ថ្លែងថា៖​«គេ​ទើប​បញ្ជូន​ជនសង្ស័យ​មក​តុលាការ​ហើយ​មិនទាន់​ដំណើរការ​សាកសួរ​ទេ»។

ព័ត៌មានថ្មីៗ