បុគ្គលិក​កាល់​តិច​ព្រម​ចូល​ធ្វើ​ការ​វិញ ក្រោយ​ដំឡើង​ប្រាក់​ខែ​២០​ដុល្លារ


_MG_5035
ស្ថានីយប្រេងកាល់តិច បិទទ្វារផ្អាកអាជីវកម្មទាំងអស់នៅរាជធានីភ្នំពេញ ដោយសារបុគ្គលិកកម្មករធ្វើកូដកម្ម ម៉ៃ វីរៈ

ភ្នំពេញៈ បុគ្គលិក​ក្រុមហ៊ុន​កាល់​តិច នឹង​វិល​ចូល​ធ្វើ​ការ​វិញ​នៅ​ថ្ងៃ​ព្រហស្បតិ៍​នេះ ក្រោយ​ពី​ការ​ចរចា​នៅ​រសៀល​ថ្ងៃ​ពុធម្សិលមិញ ទទួល​​លទ្ធផលវិជ្ជមាន ដោយ​ក្រុមហ៊ុន​សម្រេច​ដំឡើង​ប្រាក់​ឈ្មួល​បន្ថែម ​២០​ដុល្លារអាមេរិក​ទៀត និង​មិន​កាត់​ប្រាក់​ខែ​ក្នុង​អំឡុង​ពេល​កូដកម្ម​ជាង ១​សប្តាហ៍​កន្លង​មក​នេះ​ទេ។

កិច្ច​ព្រម​ព្រៀង​នេះ នឹង​មាន​ប្រសិទ្ធ​ភាព​ចាប់​ពី​ថ្ងៃ​ទី០១ ខែ​មិថុនា​នេះ​តទៅ។

អ្នក​នាំ​ពាក្យ​ក្រុមហ៊ុន Chevron បាន​ប្រាប់​ភ្នំពេញ​ប៉ុស្តិ៍​តាម​អ៊ីម៉ែល កាល​ពី​ម្សិល​មិញ​ថា «ក្រុម​ហ៊ុន​សម្រេច​ផ្តល់​ប្រាក់​ខែ​បន្ថែម​២០ ដុល្លារ​អាមេរិក ដល់​បុគ្គលិក​ដើម្បី​បញ្ចប់​ការ​ធ្វើ​កូដកម្ម​នេះ»។

តំណាង​បុគ្គលិក និង​ប្រធាន​សហជីព​ក៏​បាន​បញ្ជាក់​ពី​ការ​ព្រម​ព្រៀង​ដូច​គ្នា​នេះ​ដែរ ដោយ​សម្រេច​ទទួល​យក​ការ​ដំឡើង​នេះ។

សូមបញ្ជាក់ថា បុគ្គលិក​នៅ​ស្ថានីយ​ទាំង ១៧ នៅ​ភ្នំពេញ បាន​ដើរ​ចេញ​ពី​ការងារ​កាល​ពី​ថ្ងៃ ទី១២ ខែ​ឧសភា ដោយ​ទាមទារ​ដំឡើង​ប្រាក់​ខែ​ប្រចាំ​ខែ​យ៉ាង​តិច ១៦០ ដុល្លារ​អាមេរិក​ក្នុង​មួយ​ខែ និង​ប្រាក់​រង្វាន់​ប្រចាំ​ឆ្នាំ​ចំនួន ១៦០ ដុល្លារ​អាមេរិក​ថែម​ទៀត។ គ្រប់​ស្ថានីយ​ទាំង ១៧ កន្លែង​នៅ​ភ្នំពេញ បច្ចុប្បន្ន​នេះ​កំពុង​បិទ​ទ្វារ។

ព័ត៌មានថ្មីៗ