ប្រទះ​ឃើញ​សព​អ្នក​នេសាទ​សមុទ្រ​ម្នាក់​សង្ស័យ​កូន​ឈ្នួល​វាយ​ទម្លាក់​ទឹក


ព្រះសីហនុៈ សព​បុរស​នេសាទ​សមុទ្រ​ម្នាក់​ដែល​បាត់​ខ្លួន​ខណៈ​ចេញទៅ​នេសាទ​កាលពី​សប្តាហ៍​មុន​ត្រូវ​អ្នក​ដើរ​ទូក​នេសាទ​ឃើញ​អណ្តែត​ទឹក​សមុទ្រ​ក្នុង​ស្រុក​ថ្ម​ស​ខេត្ត​កោះកុង​ ហើយ​ត្រូវ​បាន​សមត្ថកិច្ច​អូស​មក​សង្កាត់​១​ក្រុង-​ខេត្ត​ព្រះសីហនុ​នៅ​ថ្ងៃ​ចន្ទ​នេះ។

លោក កុល​ផល្លី ស្នងការ​រង​ព្រហ្មទណ្ឌ​ខេត្ត​ព្រះ​សីហនុ​ឲ្យ​ដឹង​ថា សាក​សព​បុរស​អ្នក​នេសាទ​ម្នាក់​ដែល​បាត់​ខ្លួន​កាលពី​ថ្ងៃ​ព្រហស្បតិ៍​សប្តាហ៍​មុន​ពេល​ចេញ​ទៅ​នេសាទ​សមុទ្រ​ត្រូវ​សមត្ថកិច្ច​ក្រុងព្រះសីហនុ​អូស​សព​មក​ធ្វើ​កោសល​វិច្ច័យ​កាលពី​ព្រឹក​មិញ​ បន្ទាប់​ពី​អ្នកនេសាទ​ប្រទះឃើញ​អណ្តែត​ទឹកសមុទ្រ​នៅ​ស្រុក​ថ្ម​ស​ខេត្តកោះកុង ។

លោក សារ៉ាត់​វិជ្ជា ប្រធាន​នគរបាល​បច្ចេក​ទេស​វិជ្ជា​សាស្ត្រ ខេត្ត​ព្រះសីហនុ​ប្រាប់ថា៖ «ដោយសារ​សាកសព​មាន​ស្ថានភាព​ហើម​រលួយ​ទៅហើយ​ដូច្នេះ​ការ​ធ្វើ​កោសល​វិច្ច័យ​មានការ​លំបាក​ប៉ុន្តែ​ក្បាល​សាកសព​មាន​ស្នាម​ជំ​ប្រេះ​ផ្នែក​សៀតផ្កា​ខាងឆ្វេង»។

សមត្ថកិច្ច​ក្រុងព្រះសីហនុ​ឲ្យ​ដឹងថា បុរសរងគ្រោះ​ចាន់​ផាត អាយុ៣៦ឆ្នាំ​ជា​ម្ចាស់​ទូក គោយន្ត ឯ​ប្រពន្ធ​ឈ្មោះ​ង៉ែត សា​ម៉​យ អាយុ៣៤ឆ្នាំ ស្នាក់នៅ​បន្ទាប់​ជួល​ក្នុង​ក្រុងព្រះសីហនុ​និង​មាន​ស្រុកកំណើត​នៅ​ភូមិ​ក្រាំង​ដូង​ឃុំ​សំរោងក្រោម​ស្រុក​បន្ទាយមាស​ខេត្តកំពត ។

ស្ត្រី​ប្រពន្ធ​ជនរងគ្រោះ​ប្រាប់ថា គាត់​មាន​លុយ២ពាន់​ដុល្លារ​ហើយដោយ​មិន​ចង់ស៊ី​ឈ្នួល​ធ្វើ​កូនដៃ​នេសាទ​ឲ្យ​គេ​ទៀត​គាត់​បាន​យក​ប្លង់ដី​ទៅ​បញ្ចាំ​គេ​បាន​លុយ ៤ពាន់​ដុល្លារ​ទៀត​ទិញ​បាន​ទូក​នេសាទ​មួយគ្រឿង​តម្លៃ៦ពាន់​ដុល្លារ ។ស្ត្រី​ប្រពន្ធ​បន្តថា នៅមុន​ថ្ងៃកើតហេតុ​ប្តី​គាត់​និង​កូនឈ្នួល​ម្នាក់ទៀត​រក​ម៉ឹក​បង្គារ​បាន​ហើយក៏​ចេញដំណើរ​ទៅ​លក់​នៅ​ប្រទេស​វៀតណាម ។លុះ​ដល់ពេល​ថ្ងៃត្រង់​ថ្ងៃ​គាត់​បាន​ទូរស័ព្ទ​ចូល​ម្តង​តែ​ក្រោយមក​ទូរស័ព្ទ​ទាក់ទង​លែង​បាន​ក៏​កើតការ​សង្ស័យ​តែ​មិនដឹង​ជា​ទៅរក​នៅ​កន្លែង​ណា ។

សមត្ថកិច្ច​បន្ត​តាម​ប្រពន្ធ​ជនរងគ្រោះ​ថា គាត់​សង្ស័យ​ទៅលើ​កូន​ទូក​ម្នាក់​ដែល​ទៅជា​មួយ​ប្តី​គាត់​ព្រោះ​នៅ​ថ្ងៃ​បន្ទាប់​ជប​សង្ស័យ​បាន​យក​ទូក​មក​ចត​ប្លុង​ចោល​ហើយ​ប្រមូលយក​ម៉ឹក​បង្គារ​រត់គេចខ្លួន​បាត់។ លុះ​មកដល់​ល្ងាច​ថ្ងៃទី៣០ មិនា ក្រុមគ្រួសារ​បានទទួល​ដំណឹង​ថា​មាន​សាកសព​អណ្តែត​ជាប់​មង​អ្នកនេសាទ​នៅ​ស្រុក​ថ្ម​ស ខេត្តកោះកុង​ហើយ​មានការ​សង្ស័យ​ទៅ​មើល​ទើប​ស្គាល់​ថា​ជា​ប្តី​ខ្លួន​ហើយ​ត្រូវ​សមត្ថកិច្ច​អូស​យកមក​ធ្វើ​កោសល​វិ​ច្ច័​យ​ឃើញ​មាន​ស្នាម​វាយ​ជាំ​ប្រេះ​ផ្នែក​សៀតផ្កា​ខាងឆ្វេង​និង​បានប្រគល់​សព​ឲ្យ​ក្រុមគ្រួសា​បូជា​នៅ​វត្ត​ក្រោម​ក្នុង​សង្កាត់​លេខ​កាលពី​ព្រឹក​ថ្ងៃ​ចន្ទ​ម្សិលមិញ​ហើយ៕

ព័ត៌មានថ្មីៗ