រក​ឃើញ​ករណី​ជំងឺ​ផ្តាសាយ ​H5N1 ដំបូង​ឆ្នាំ​នេះ​លើ​ក្មេង​ប្រុស​ម្នាក់


131105_07a
ការចរាចរណ៍សត្វបក្សី ពីតំបន់ជនបទមកកាន់ទីប្រជុំជននៃទីផ្សារនៅកម្ពុជា ហុង មិនា

ភ្នំពេញ៖ ក្រសួង​សុខាភិបាល​ និង​អង្គការ​សុខភាព​ពិភលោក​បាន​ឲ្យ​ដឹង​​ថា បាន​រក​ឃើញ​ករណី​ថ្មី​ ដែល​ជា​ករណី​ទី ១​ក្នុង​ឆ្នាំ​នេះ​នៃ​ជំងឺ​ផ្តាសាយ​បក្សី H5N1 កើត​លើ​​ក្មេង​ប្រុស​អាយុ ​៥ឆ្នាំម្នាក់ ​។

យោង​តាម​សេចក្តី​ប្រកាស​ព័ត៌មាន​ដែល​ចេញ​ផ្សាយ​កាល​ពី​រសៀល​​ថ្ងៃ​ម្សិល​មិញថា ក្មេង ប្រុស រស់​នៅ​ក្នុង​ស្រុក ស្ទឹង​ត្រង់ ខេត្ត​កំពង់ធំ ត្រូវ​បញ្ជាក់​ថា បាន​ឆ្លង​ជម្ងឺ​ផ្តាសាយ​បក្សី H5N1 ប៉ុន្តែ ក្មេង​ប្រុស​មាន​ស្ថានភាព​ល្អ​វិញ ក្រោយ​ពី​ត្រូវ​បាន​គេ​បញ្ជូន​ទៅ​ព្យាបាល​នៅ​មន្ទីរ​ពេទ្យ ជ័យ​វរ្ម័ន​ទី៧ នៅ​ក្នុង​ខេត្ត​សៀមរាប។

តាម​ការ​ស៊ើប​អង្កេត​ក្នុង​ករណី​ក្មេង​ប្រុស​នេះ បាន​បង្ហាញ​ថា មាន់​ប្រមាណ​ជា ២០០​ក្បាល​បាន​ស្លាប់​នៅ​ក្នុង​ភូមិ​របស់​ក្មេង​ប្រុស​រស់​នៅ កាល​ពី​ពាក់​កណ្តាល​ខែ​មករា និង​ឪពុកម្តាយ​របស់​ក្មេង​ប្រុស​បាន​ចម្អិន​មាន់​នោះ​ហូប។

លោក ​ម៉ម​ ប៊ុន​ហេង ​រដ្ឋ​មន្ត្រី​ក្រសួង​សុខាភិបាល បាន​មាន​ប្រសាសន៍​ក្នុង​សេចក្តី​ប្រកាស​នោះ​​ថា​«ជំងឺ​ផ្តាសាយ​បក្សី H5N1 នៅ​តែ​បន្ត​គំរាម​កំហែង​ដល់​សុខភាព​ប្រជាពល​រដ្ឋ​កម្ពុជា​»។

លោក បាន​ថ្លែង​ថា នេះ​ជា​ករណី​ផ្តាសាយ​១​ករណី ដែល​កើត​មាន​លើ​មនុស្ស​ ក្នុង​ឆ្នាំ​នេះ​ហើយ​កុមារ​ងាយនឹង​រង​គ្រោះ​ច្រើន​ជាង​គេ​។

លោក​រដ្ឋ​មន្ត្រី​បញ្ជា្កក់ថា « ខ្ញុំ​សូម​រឮក​ថា ឪពុក​ម្តាយ​ និង​អ្នក​ថែ​ទាំ​កុមារទាំង​អស់​ ត្រូវ​ដាក់​កុមារ​នៅ​ឲ្យ​ឆ្ងាយ​ពី​សត្វ​បក្សី​ឈឺ​ឬ​ងាប់ មិន​ព្យាយាម​ឲ្យ​កុមារ​លេង​ឲ្យ​ឆ្ងាយ​ពី​កន្លែង​មាន​សត្វ​បក្សី និង​លាង​ដៃ​ឲ្យ​បាន​ញឹកញាប់»។ លោក​បាន​ណែនាំ​ថា «ប្រសិន​បើ​ពួក​គេ​មាន​ដង្ហើម​ញាប់ ឬ​ពិបាក​ដក​ដង្ហើម​ ត្រូវ​នាំ​កុមារ​ទៅ​រក​ការ​ព្យាបាល​នៅ​ជា​បន្ទាន់​នៅ​គ្រឹះស្ថាន​សុខាភិបាល​ ដែល​នៅ​ជិត​ផ្ទះ​របស់​លោក​អ្នក​បំផុត​ ហើយ​ត្រូវ​ប្រាប់​មន្ត្រី សុខាភិបាល​អំពី​ប្រវត្តិ​ប៉ះពាល់​ជា​មួយ​សត្វ​បក្សី​ងាប់»។

សូម​បញ្ជាក់​ថា ជំងឺ​ផ្តាសាយ​ H5N1​ ជា​ធម្មតា​ចំលង​រវាង​សត្វ​និង​សត្វ​បក្សី​ឈឺ ​ទៅ​បក្សី​ផ្សេង​ទៀត​ ប៉ុន្តែ​ជួន​កាល​ក៏​ចំលង​ទៅ​មនុស្ស​បាន​ដែរ។ កាលពីឆ្នាំ ២០១៣ យ៉ាង​ហោច​ណាស់​មាន​ករណី​នៃ​ជម្ងឺ​ផ្តាសាយ​បក្សី H5N1 ២២ ករណី​ដែល​បាន​ឆ្លង​មក​មនុស្ស។

ព័ត៌មានថ្មីៗ