លោកស្រី​យីង​ឡាក់ ចូល​បង្ហាញ​ខ្លួន​តាម​ការ​កោះ​ហៅ​របស់​ប្រមុខ​កង​ទ័ព​ថៃ


Yinluck
ឡានដែលជឿថា ជាឡានដឹកលោកស្រីយីងឡាក់ ចូលក្នុងបញ្ជារការដ្ឋានកងទ័ពថៃ AFP

បាងកកៈ អតីត​នាយក​រដ្ឋ​មន្ត្រី​ថៃ លោក​ស្រី​យីងឡាក់ ស៊ីណាវ៉ាត្រា ដែល​ត្រូវ​បាន​តុលាការ​ធម្មនុញ្ញ​បណ្តេញ​ចេញ​ពី​អំណាច​ក្នុង​ការ​សម្រេច​សេចក្តី​មួយ​ដ៏​ចម្រូស​ចម្រាស​កាល​ពី​ដើម​ឧសភា​នេះ បាន​មក​ដល់​ទី​បញ្ជារ​ការ​ដ្ឋាន កង​ទ័ព​ថៃ ក្នុង​ទីក្រុង​បាងកកនា​ថ្ងៃ​ត្រង់​ថ្ងៃ​សុក្រ​នេះ ដោយ​រថយន្ត​ការពារ​គ្រាប់​កាំភ្លើង ផ្ទាល់​ខ្លួន​របស់​លោក​ស្រី បន្ទាប់​ពី​ការ​កោះ​ហៅ​របស់​កង​ទ័ព​ថៃ។

ការ​បង្ហាញ​ខ្លួន​របស់​លោកស្រី យីងឡាក់ គឺ​ដើម្បី​បញ្ចប់​ការ​សង្ស័យ​ថា លោកស្រី​បាន​ចាក​ចេញ​ពី​ប្រទេស ក្រោយ​ពី​កង​ទ័ព​ថៃ បាន​ប្រកាស​ច្បាប់​អាជ្ញា​សឹក​កាល​ពី​ថ្ងៃ​អង្គារ និង​ការ​ធ្វើ​រដ្ឋ​ប្រហារ​កាល​ពី​ម្សិល​មិញ។

ប្រមុខ​កង​ទ័ព​ថៃ​​និង​ជា​ប្រធាន​គណៈកម្មាធិការ​រក្សា​សន្តិភាព និង​សណ្តាប់​ធ្នាប់​ជាតិ លោក ប្រាយុធចាន-អូចា បាន​ធ្វើ​ការ​កោះ​ហៅ​អតីត​នាយក​រដ្ឋ​មន្ត្រី និង​មន្ត្រី​រដ្ឋាភិបាល​ជាន់​ខ្ពស់​ឲ្យ​ចូល​មក​បង្ហាញ​ខ្លួន​នៅ​ចាប់​ពី​ព្រឹក​ថ្ងៃ​សុក្រ​នេះ និង​ធ្វើ​ការ​ហាម​ប្រាម​មិន​ឲ្យ​ពួកគេ​ណា​ម្នាក់​ចាក​ចេញ​ពី​ប្រទេស​ថៃ​ឡើយ។

លោកបាន​ព្រមាន​ក្នុងការ​កោះ​ហៅ​នោះ​ថា «នរណា​ម្នាក់​ដែល​មិន​បង្ហាញ​ខ្លួន​តាម​ការ​កោះ​ហៅ នឹង​ត្រូវ​ចាប់​ខ្លួន និង​ប្រឈម​មុខ​ជាមួយ​ច្បាប់»។

ការ​កោះ​ហៅ​នេះ​ធ្វើ​ឡើង ​បន្ទាប់ពី​ការ​ពិភាក្សា​រៀបចំ​ដោយ​យោធា រវាង​ក្រុម​ជា​គូប្រជែង​នយោបាយ​របស់​ព្រះ​រាជា​ណាចក្រ​នេះ​បាន ទទួល​បរាជ័យ​ពុំ​អាច​ឈាន​ដល់​ការ​សម្របសម្រួល​មួយ​ក្នុង​ការ​បញ្ចប់ មហាបាតុកម្ម​ជិត​៧​ខែ​នៅ តាម​ដងផ្លូវ​ក្នុង​ក្រុង​បាងកក។

ឥស្សរៈ​ជន​ជាន់​ខ្ពស់​មួយ​ចំនួន​មក​ពី​ភាគី​នយោបាយ​ទាំង​ពីរ រួម​ទាំង​អ្នក​បន្ត​វេន​ពី​លោកស្រី​យីង​ឡាក់ លោក Niwattumrong Boonsongpaisan ក៏​ត្រូវ​បាន​បញ្ជារ​ឲ្យ​បង្ហាញ​ខ្លួន​ផង​ដែរ រួមទាំង មន្ត្រី​រាជរដ្ឋាភិបាល​​ជាន់​ខ្ពស់ ១៥៥ នាក់ទៀតមិន​អាច​ចាក​ចេញ​ពី​ប្រទេស​ថៃ ដោយ​​គ្មាន​ការ​អនុញ្ញាត​ពីកងទ័ពឡើយ។

មន្ត្រី​ម្នាក់​បាន​ស្រង់​សំដី​លោក ប្រាយុធ ថា​«ដោយ​សារ​អ្នក​ទាំង​អស់​គ្នា មិន​អាច​ព្រម​ព្រៀង​គ្នា និង​បណ្តាល​ឲ្យ​ស្ថាន​ភាព​កាន់​តែ​ធ្លាក់​ចូល​ក្នុង​អំពើ​ហិង្សា ដូច្នេះ ខ្ញុំ​ប្រកាស​យក​អំណាច។ ទាហាន​ចាំ​បាច់​ត្រូវ​ឃុំ​ទាំង​អស់​គ្នា​សិន»។

ក្រោម​លេស​ស្តារ​ស្ថាន​ភាព​នយោបាយ និង​សណ្តាប់​ធ្នាប់​សង្គម​ឡើង​វិញ​ដែល​បាន​បង្ក​ឲ្យ​មនុស្ស​ស្លាប់ និង​របួស​ជា​ច្រើន​នាក់​អស់​រយៈ​ពេល​ជា​ច្រើន​ខែ​មក​នេះ ប្រមុខ​កង​ទ័ពថៃ លោក ប្រាយុធចាន-អូចា ក៏​បាន​ធ្វើ​ការ​ប្រកាស​ទូទាំង​ប្រទេស​អំពី​បំរាម​គោចរ​នៅ​ពេល​យប់ និង​បាន​បញ្ជារ​ឲ្យ ក្រុម​បាតុករ​រំសាយ​ការ​ប្រមូល​ផ្តុំ​គ្នា​​នៅ​តាម​ផ្លូវសាធារណៈ និង​កន្លែង​ផ្សេង​ទៀត​ដែរ។

គ្រប់​ស្ថានីយ៍​ទូរទស្សរន៍ និងវិទ្យុ ត្រូវ​បាន​បញ្ជារ​ឲ្យ​ផ្សាយ​តាម​តែ​ការ​ប្រកាស​របស់​កង​ទ័ព​តែ​ប៉ុណ្ណោះ និង​បាន​ធ្វើ​ការ​ព្រមាន​បិទ បណ្តាញ​សង្គម ដែល​និយាយ​អំពី​ការ​ធ្វើ​រដ្ឋ​ប្រហារ​នេះ។

ទីក្រុង​បាងកក មាន​សភាព​ស្ងប់​ស្ងាត់​នៅ​ថ្ងៃ​សុក្រនេះ ខណៈ​ពេល​ដែល​ផ្លូវ​សំខាន់ៗ និង​សាលារៀន​ត្រូវ​បាន​បិទ​ផង​ដែរ។ ការ​ធ្វើ​រដ្ឋ​ប្រហារ​នេះ ផ្ទុយ​ស្រលះ​កាល​ពី​៨​ឆ្នាំ​មុន ដែល​ក្នុង​ទីក្រុង​បាងកក​នេះ មិន​មាន​ទាហាន និង​រថក្រោះ ត្រូវ​បាន​ដាក់​ពង្រាយ​ឡើយ។

សូម​បញ្ចាក់​ថា ប្រទេសថៃ ​ធ្លាក់​ចូល​ទៅ​ក្នុង​វិបត្តិ​នយោបាយ ចាប់​តាំង​ពី​ឆ្នាំ​២០០៦ ក្រោយ​ពី​មាន​រដ្ឋ​ប្រហារ​ទម្លាក់​បង​ប្រុស​លោក​ស្រី យីងឡាក់ គឺ​លោក ថាក់ស៊ីន ដែល​ជា​អ្នក​នយោបាយ​សេដ្ឋី​ទាញ​យក​ប្រជាប្រិយ​ភាព​ពី​ប្រជាពលរដ្ឋ​ថៃ ដែល​បាន​ធ្វើ​ឲ្យ​ប្រជាប្រិយ​ភាព​រាជា​និយម​ធ្លាក់​ចុះ៕

thai
thai

ព័ត៌មានថ្មីៗ