សមត្ថកិច្ច​បន្ត​ឃុំខ្លួន​បុរស​វៀតណាម​៣​នាក់​ពាក់​ព័ន្ធ​ចាក់​ស្ត្រី​វៀតណាម


ភ្នំពេញៈ បុរស​ជនជាតិ​វៀតណាម​៣​នាក់ ដែល​ប្រើ​កាំបិត​ចាក់​ស្ត្រី​វៀតណាម​ម្នាក់ នៅក្នុង​រោង​សិប្បកម្ម​កែច្នៃ​គ្រឿង​សិង្ហា​រឹម​មួយ​ឲ្យ​របួស នៅ​សង្កាត់​ភ្នំពេញ​ថ្មី ខណ្ឌ​សែន​សុខ កាលពី​ថ្ងៃអាទិត្យ សមត្ថកិច្ច​កំពុង​សាកសួរ​និង​កសាង​សំណុំ​រឿង​ដើម្បី​ចាត់ការ​តាម​នីតិវិធី​ច្បាប់។

លោក ម៉ក់ ហុង អធិការ​ខណ្ឌ​សែន​សុខ​បាន​ប្រាប់​ឲ្យ​ដឹងថា ករណី​បុរស​វៀតណាម​៣​នាក់ ដែល​បង្ក​ហិង្សា​ទៅលើ​ស្ត្រី​ជា​ជន​ជាតិ​វៀតណាម​ដូច​គា្ន​នោះ ខាង​នគរបាល​ជំនាញ​កំពុង​សាក​សួរ និង​កសាង​សំណុំ​រឿង​ចាត់​ការ​តាម​ច្បាប់។

លោក​ប្រាប់ថា​«យើង​កំពុង​ដំណើរ​ការ​តាម​នីតិវិធី​ច្បាប់»។

សមត្ថកិច្ច​នគរបាល​ខណ្ឌ​ឲ្យ​ដឹងថា បុរស​បង្កហេតុ​វៀតណាម​៣នាក់​មាន​ឈ្មោះ ចាង វ៉ាន់​ឌឿ​ង អាយុ ២៤ឆ្នាំ និង ឈ្មោះ ង៉ូ វ៉ាន់​ដិញ អាយុ២៤ឆ្នាំ (ជនដៃដល់ ) ឈ្មោះ ឡេ វ៉ាន់​ណុង អាយុ២៤ឆ្នាំ ជាជាង​ឈើ និង​ម្នាក់ទៀត​គេច​ខ្លួន​ជា​កម្មក​ខ្មែរ។រីឯ​ស្ដ្រី​រងគ្រោះ​ជា​ម្ចាស់​សិប្បកម្ម ឈ្មោះ ង្វៀង ធី​ប៊េ អាយុ​២២ឆ្នាំ រងរបួស​ដៃ​និង​ស្មា។

សមត្ថកិច្ច​រំឭក​ថា ករណី​ហិង្សា​ប្រើ​កាំបិត​ចាក់​ស្ត្រី​រងគ្រោះ​នោះ កើតឡើង​បណ្តាលមកពី​ពួកគេ​ទាស់សម្តី​គ្នា រវាង​ស្ត្រី​រង​គ្រោះ​និង​កម្មករ​ទាំង​៤​នាក់ ហើយ​ត្រូវ​ជន​ដៃដ​ល់​ទាញ​កាំបិត​ចុង​ស្រួច​ចាក់ទៅលើ​ស្ត្រី​រងគ្រោះ​ឲ្យ​របួស បើ​កុំ​តែមាន​អ្នក​ជួយ​ឃាត់ ម្លេះ​ស្ត្រី​រង​គ្រោះ​អាច​ត្រូវ​ជន​ដៃ​ដល់​ចាក់​ស្លាប់​ទៅហើយ។

សមត្ថកិច្ច​ខណ្ឌ​បន្តថា ក្រោយ​បង្កហេតុ​បុរស​វៀតណាម​ទាំង​៣​នាក់​នោះ បម្រុង​រត់គេចខ្លួន​ដែរ តែ​ត្រូវ​សាច់ញាតិ​ស្ត្រីរ​គ្រោះ​រារាំង​និង​ប្តឹង​សមត្ថកិច្ច​ឲ្យ​ចាប់ខ្លួន​តែម្តង។

ក្រុម​ជន​ត្រូវ​ចោទ​មិនអាច​ទាក់ទង សួរ​បញ្ជាក់​ពី​រឿងហេតុ​បានទេ​នៅ​ថ្ងៃ​នេះ៕

ព័ត៌មានថ្មីៗ