បាត់ដំបង៖ គ្រងសម្លៀកបំពាក់បែបយុវតីឃ្យូតៗ ដៃកាន់ចានម្ហូប មុខញញឹមពព្រាយ កញ្ញា ភួង សុភាដារី ជាកូនពៅក្នុងគ្រួសារ ដែលមានបងប្អូន ៤ នាក់ បាននិយាយតបនឹងសម្ដីចាស់ៗដែលធ្លាប់ចំអន់កូនពៅបែបលេងសើចថា៖ «កូនពៅមិនមែនអត់ចេះធ្វើអ្វីនោះទេ ជាពិសេស បញ្ហាផ្ទះបាយ និងចង្ក្រានជើងឆ្នាំង»។
ទោះបីជានោះអាចជាមូលហេតុមួយដែលនាំឲ្យកូនពៅរូបនេះសម្រេចចិត្ដបើកភោជនីយដ្ឋានមួយដោយដាក់ឈ្មោះថា «ផ្ទះបាយកូនពៅ» យ៉ាងណាក៏ដោយ ក៏កត្ដាជំរុញកញ្ញា សុភាដារី ពិតប្រាកដនោះ គឺបំណងបំពេញភារកិច្ចជាកូនល្អដែលខ្លួនអាចនៅក្បែរ និងថែទាំឪពុកម្ដាយដោយផ្ទាល់។
កញ្ញា ភួង សុភាដារី បានប្រាប់ភ្នំពេញប៉ុស្ដិ៍ ថា៖ «ក្រោយពីខ្ញុំបញ្ចប់ការសិក្សានៅប្រទេស ចិន ខ្ញុំបានធ្វើការនៅក្នុងក្រុមហ៊ុនស្ថាបត្យកម្មមួយនៅភ្នំពេញ។ បានប៉ុន្មានខែ ខ្ញុំយល់ឃើញថា ឪពុកម្ដាយខ្ញុំ ពួកគាត់រស់នៅឆ្ងាយ ដោយបងៗមានគ្រួសារអស់។ ខ្ញុំមិនដាច់ចិត្តឲ្យពួកគាត់រស់នៅដោយមិនបានជួបជុំជាមួយកូនណាម្នាក់នោះទេ។ ដូច្នេះ ខ្ញុំព្យាយាមរិះរកវិធីមករស់នៅជាមួយគាត់ទីនេះ»។
អនុបណ្ឌិតផ្នែកស្ថាបត្យកម្មនៅសាកលវិទ្យាល័យធានជីន បានមើលឃើញពីកង្វះនូវភាពសម្បូរបែបចំពោះភោជនីយដ្ឋានបែបផាសុកភាព ដែលបម្រើមុខម្ហូបអត្ដសញ្ញាណអ្នកបាត់ដំបង។
ម្ចាស់ហាងផ្ទះបាយកូនពៅ ដែលបើកភោជនីយដ្ឋានដើម្បីបានមកនៅក្បែរអ្នកមានគុណទាំង ២ បានឲ្យដឹងថា៖ «ខ្ញុំផ្ទាល់ក៏ចង់ឃើញខេត្តរបស់ខ្លួនមានការរីកចម្រើន ក្នុងនោះម្ហូបអាហារក៏ជាផ្នែកមួយក្នុងការអភិវឌ្ឍផងដែរ»។
នៅភោជនីយដ្ឋានដែលត្រូវបានរចនាផ្សារភ្ជាប់នឹងធម្មជាតិដោយម្ចាស់ហាងផ្ទាល់នោះ មុខម្ហូបប្រចាំតំបន់ បុកកន្ទុយហេស ដែលចាស់ៗនិយាយតៗគ្នាថា វាមានប្រវត្តិមកពីអ្នកស្រុកបាណន់ ស្ថិតក្នុងតារាងមុខម្ហូបផ្ទះបាយកូនពៅ និងទទួលបានការពេញនិយមខ្លាំងពីអតិថិជនគ្រប់មជ្ឈដ្ឋាន។
កញ្ញាកូនពៅបានឲ្យដឹងថា៖ «បុកកន្ទុយហេស (៨ ០០០ រៀល) មានគ្រឿងផ្សំដូចជា ប្រហុក ត្រីឆ្អើរ និងអម្ពិលទុំ ឬអម្ពិលខ្ចី ឬក្រូចឆ្មារ និងអាចជំនួសត្រីឆ្អើរដោយកន្ទាទូក។ បើសិនជាចង់ឲ្យម្ហូបមួយមុខនេះកាន់តែឆ្ងាញ់ បុកបញ្ចូលគ្នាបន្ថែមម្ទេសពណ៌ក្រហម ពិសាផ្ទាប់ជាមួយស្ពៃក្តោប ត្រប់ស្រួយ ត្រសក់ និងសណ្តែកកួរ»។
ដោយសារតែបាត់ដំបងជាខេត្ដជាប់បឹងទន្លេសាបដ៏ធំបំផុតនៅអាស៊ីអាគ្នេយ៍ និងផ្ដល់ធនធានត្រីដ៏ច្រើនសន្ធឹក ស្ថិតនៅភាគពាយព្យនៃប្រទេសកម្ពុជា ម្ហូបច្នៃពីត្រីជាអាហារសម្រន់ប្រចាំខេត្តនេះផងដែរ។
សង្វាក់ ដែលមានរូបមន្តដើមមកពីជនជាតិអ៊ិស្លាម ប្រើសាច់ត្រីលាយជាមួយបាយកក ខណៈពលរដ្ឋខ្មែរប្រើតែសាច់ត្រីមួយមុខ។ សង្វាក់ (តម្លៃ ៥ ០០០ រៀល) ត្រូវនឹងអន្លក់ផ្ទាប់ជាច្រើនមុខ ដូចជា នំបញ្ចុក ត្រសក់ ស្ពៃក្តោប សាលាដ ជី ស្លឹកចាព្លូ និងជ្រលក់ទឹកត្រីផ្អែម។
យ៉ាងណាមិញ ម្ហូបប្រចាំផ្ទះបាយកូនពៅ គឺបាយក្ដាំងកូនពៅ ដែលទទួលបានការកុម្ម៉ង់ច្រើនបំផុត។
កញ្ញាម្ចាស់ហាងកូនពៅ បានរៀបរាប់ត្រួសៗថា៖ «បាយក្តាំងត្រូវបានហាលឲ្យស្ងួត យកមកបំពង រួចគេពិសាជាមួយទឹកជ្រលក់ដែលដាក់សាច់ជ្រូកក៏បាន សាច់គោក៏បាន ដែលចម្អិនជាមួយពងទា អំបិល ស្ករ ប៊ីចេង ខ្ទិះដូង ទឹកប៉េងប៉ោះ និងម្រេច និងរោយស្លឹកខ្ទឹមពីលើ មានតម្លៃ ៨ ០០០ រៀល»។
ភោជនីយដ្ឋាន ផ្ទះបាយកូនពៅ មានមុខម្ហូបជាច្រើន ដូចជា មីកូឡា (៥ ០០០ រៀល) បាញ់ឆែវ នំគ្រក់ ណែម ចាយ៉ ខ្យងស្ងោរ ខ្យងអាំង (៦ ០០០ រៀល) បុកល្ហុងបាយដំណើបស្លាបមាន់ (១៤ ០០០-១៨ ០០០ រៀល) កាពិផាវ ទឹកគ្រឿងបាត់ដំបង ប្រហុកខ្ទិះ (៨ ០០០ រៀល) ប្រហើរទំពាំងខ្យង ម្ជូរព្រលិតកំពឹសនឹងពងត្រី (១០ ០០០ រៀល) និងមានមុខម្ហូបជាច្រើនទៀតផងដែរ។
ក្រៅពីមុខម្ហូបជាច្រើនទាំងនេះដែលមានរសជាតិឆ្ងាញ់ ផ្ទះបាយកូនពៅ ក៏មានលក់ជាប្រភេទបង្អែមច្រើនមុខតម្លៃចន្លោះពី ២ ០០០ ទៅ ៣ ០០០ រៀល។
កញ្ញា ភួង សុភាដារី បានប្រាប់អំពីការប្រើប្រាស់រូបមន្ដមុខម្ហូបទាំងនោះថា៖ «ចំពោះរូបមន្តវិញ ម៉ាក់បានបង្រៀនតាំងពីតូច ហើយពេលខ្លះមើល Youtube គួបផ្សំនឹងរូបមន្ដខ្លះទៀតជាស្នាដៃរបស់ចុងភៅប្រចាំហាងតែម្តង។ មុខម្ហូបទាំងអស់ជាការជ្រើសរើសរបស់ខ្ញុំផ្ទាល់ ដែលជាចំណូលចិត្ដរបស់ខ្ញុំ»។
ចាប់ពីម៉ោង ១០ ព្រឹកដល់ម៉ោង ៩ យប់ ផ្ទះបាយកូនពៅ ស្ថិតនៅផ្ទះលេខ ៦៦ ក្រុម ៥ ភូមិរំចេក ៤ សង្កាត់រតនៈ។ ទំនាក់ទំនងតាមទូរស័ព្ទលេខ ០៨៥ ៦៦ ៩៩ ៩២៕
វីដេអូ៖