ចំណុចពិសេសរបស់ហាង ប៊ឺរឡេប គឺរសជាតិកាហ្វេលីងចេញពីម៉ាស៊ីន ផលិតដោយខ្លួនឯង ជាមួយគ្រាប់កាហ្វេគុណភាពខ្ពស់។ រូបថត សហការី
.jpg)
ភ្នំពេញ៖ អគារដំបូលខ្ពស់ស្រឡះការរៀបចំតុអង្គុយឃ្លាតឆ្ងាយពីគ្នា អមដោយរុក្ខជាតិលម្អពណ៌បៃតងស្រស់ និងសំឡេងរហ៊ឹមៗនៃបទចម្រៀងចម្រុះភាសា ធ្វើឲ្យហាងកាហ្វេ បឺរឡេប (De Burlap Café) ក្លាយជាកន្លែងទទួលទានអាហារ អង្គុយសិក្សា និងពិភាក្សាការងារយ៉ាងល្ហែល្ហើយគ្មានការរំខានពីមជ្ឈដ្ឋានខាងក្រៅ។
ចាប់បើកដំណើរការក្នុងឆ្នាំ ២០១៤ នៅជាប់សួនច្បារមាត់ទន្លេតាខ្មៅ ក្រុងតាខ្មៅ ហាងកាហ្វេនេះបានពង្រីកសាខាថ្មីរបស់ខ្លួនលើទឹកដីចំការដូង ស្ថិតក្នុងខណ្ឌដង្កោនៅទល់មុខវិទ្យាស្ថានអគ្គិសនីកម្ពុជារាជធានីភ្នំពេញ។
ម្ចាស់ហាងបានសម្រេចចិត្តបើកសាខាថ្មី ដោយរចនាទីតាំងតាមបែបផែនរោងចក្រផលិតកាហ្វេ មានដាក់ម៉ាស៊ីនផលិតកាហ្វេនៅក្នុងហាង។
ជាមួយនឹងទីតាំងធំទូលាយងាយស្រួលក្នុងការចតរថយន្ត ស្ថាបនិកហាងកាហ្វេ បឺរឡេប បានឲ្យដឹងពីឈ្មោះសាខាថ្មីថា៖ «យើងបន្ថែមពាក្យ Factory ខាងក្រោយដោយហេតុថា ហាងថ្មី រៀបចំឡើងតាមបែបរោងចក្រ ដែលមានទីធ្លាធំ ក្នុងនោះយើងមានបំពាក់ឧបករណ៍លីងកាហ្វេ និងឧបករណ៍ផ្សេងៗ ដើម្បីដាក់តាំងបង្ហាញអតិថិជនអំពីរបៀបក្នុងការលីង និងឆុងកាហ្វេ»។
ប្រិយមិត្តទទួលទានកាហ្វេរាល់ថ្ងៃ ហើយចង់ដឹងច្បាស់ពីប្រភពភេសជ្ជៈនេះ ហាងកាហ្វេ បឺរឡេប សាខាថ្មីក៏មានផ្ដល់នូវបទពិសោធថ្មី ឲ្យភ្ញៀវទស្សនាវិធីសាស្រ្តផលិតកាហ្វេពេញ ១ ខ្សែចង្វាក់ផលិតកម្ម ចាប់តាំងពីការលីងគ្រាប់កាហ្វេ ការចម្អិន វេចខ្ចប់ រក្សាទុក និងការឆុងកាហ្វេ។
សូម្បីតែឈ្មោះហាង បឺរឡេប (Burlap) ដែលជាពាក្យពេចន៍ភាសាអង់គ្លេស ក៏មានន័យទាក់ទងនឹងបច្ចេកទេសទុកដាក់កាហ្វេដែរ។
ស្ថាបនិកហាងកាហ្វេ បានពន្យល់ថា៖ «Burlap ប្រែជាភាសាខ្មែរ ថា ក្រណាត់ក្រចៅ។ បាវក្រចៅ មានគុណប្រយោជន៍ច្រើនក្នុងការរក្សាគុណភាពគ្រាប់កាហ្វេជាងបាវធម្មតា ព្រោះវាមានខ្យល់ចេញចូលគ្រប់គ្រាន់ ដែលមិនធ្វើឲ្យគ្រាប់កាហ្វេដុះផ្សិត។ លើសពីនោះ ការប្រើប្រាស់បាវក្រចៅ មិនមានផលប៉ះពាល់ដល់បរិស្ថានទេ»។
ក្រៅពីឯកទេសខាងកាហ្វេ ហាង ប៊ឺរឡេប នៅមានម្ហូបបែបខ្មែរ ចិន និងអឺរ៉ុប។ រូបថត សហការី
ចំណុចពិសេសរបស់ហាង បឺរឡេប គឺរសជាតិកាហ្វេលីងចេញពីម៉ាស៊ីន ដែលត្រូវបានផលិតដោយខ្លួនឯង រួមជាមួយការប្រើប្រាស់គ្រាប់កាហ្វេមានគុណភាពខ្ពស់មកពីប្រទេស ប្រេស៊ីល កូឡំប៊ី ឡាវ និងកាហ្វេ ដាំដុះដោយបងប្អូនជនជាតិភាគតិចនៅតំបន់ប៊ូស្រា ខេត្តមណ្ឌលគិរី។
បន្ថែមពីលើភាពល្បីល្បាញនៃការផលិត និងឆុងកាហ្វេ បឺរឡេប នៅក្រុងតាខ្មៅមានបម្រើម្ហូបបែប ខ្មែរ ចិន និងអឺរ៉ុប អស់រយៈពេល ៦ ឆ្នាំមកហើយ មុននឹងបើកដំណើរការសាកល្បងហាងបឺរឡេប សាខាថ្មីនៅចំការដូងកាលពីខែមីនាកន្លងទៅថ្មីៗនេះ។
ម្ហូបដែលទទួលបានការគាំទ្រច្រើនជាងគេសម្រាប់អាហារពេលព្រឹកមាន មីទាធម្មតា (៤,៤៩ ដុល្លារ) គុយទាវប្រហិតត្រី (៤,៤៩ ដុល្លារ) បាយឆាម្នាស់ (៤,៩៥ ដុល្លារ)។ អាហារថ្ងៃត្រង់ មានដូចជា សម្លម្ជូរព្រៃ (៤,៧៥ ដុល្លារ) មីនីភីហ្សា (៣,៩៥ ដុល្លារ) ហាកាវ និងចាយ៉ចំហុយ (២,៩៥ ដុល្លារ) នំប៉ាវសាស៊ីវ និងនំប៉ាវផ្អែម (២,៧០ ដុល្លារ)។
ដោយសព្វថ្ងៃមនុស្សជាច្រើនសម្ងំនៅក្នុងផ្ទះ និងកាត់បន្ថយការចេញទៅញាំអាហារខាងក្រៅ ហាងកាហ្វេបឺរឡេប ក៏មានសេវាកម្មដឹកជញ្ជូនអាហារដល់គេហដ្ឋាន សម្រាប់អ្នកដែលរងាន់ម្ហូបចម្អិននៅផ្ទះ ហើយចង់ប្លែកមាត់ជាមួយរសជាតិស្នាដៃចុងភៅមានបទពិសោធ។ សេវាកម្មដឹកជញ្ជូនដោយឥតគិតថ្លៃសម្រាប់ចម្ងាយក្នុងរង្វង់ ១ គីឡូម៉ែត្រពីទីតាំងហាង។
ម្ចាស់ហាងកាហ្វេបានប្រាប់ទៀតថា៖ «សម្រាប់អាហារពេលល្ងាច បឺរឡេប រៀបចំ មុខម្ហូបពិសេសសម្រាប់អ្នកដែលមានគូអាចក្រេបរសជាតិស្រាក្រហម ជាមួយសាច់ស្ដេក ក្នុងបរិយាកាសបែបរ៉ូមែនទិក ក្នុងតម្លៃត្រឹមតែ ២០ ដុល្លារជាងតែប៉ុណ្ណោះ។ ចំពោះអតិថិជនដែលមកជាលក្ខណៈគ្រួសារអាចជ្រើសរើសប្រភេទស៊ុបឈុតតូច ពិសេសសម្រាប់គ្នា ៤ នាក់ (២០ ដុល្លារ)»។
ទិដ្ឋភាពធំទូលាយដែលជួយឲ្យអតិថិជនរក្សាគម្លាតបានល្អ។ រូបថត សហការី
ជម្រើសភេសជ្ជៈកាហ្វេមាន កាហ្វេទឹកដោះគោទឹកកក (២,៣ ដុល្លារ) និងកាហ្វេទឹកកកតម្លៃ (២,១ ដុល្លារ)។
ដោយស្ថាបនិកហាងកាហ្វេក៏ជាម្ចាស់ចម្ការផ្លែប៊័រនៅខេត្តមណ្ឌលគិរី ប៊័រក្រឡុកស្រស់ៗ (២,៨ ដុល្លារ)។ ម្ចាស់ហាងក៏ណែនាំឲ្យកុម្ម៉ង់ Ice Green tea (២,៥ ដុល្លារ) ដែលឆុងឡើងពី ត្រួយតែបៃតងខ្ចី (Matcha) មកពីប្រទេស ជប៉ុន ផ្ទាល់ និងគ្រាប់ស្វាយចន្ទីក្រឡុក (២,៨ ដុល្លារ) មានរសជាតិស្រួយៗ និងក្លិនឈ្ងុយពិសេស។ ចំពោះភ្ញៀវបរទេស ស្វាយក្រឡុកជាមួយផ្លែផាសិន (២,៨ ដុល្លារ) ជាជម្រើសល្អបំផុត។
ម្ចាស់ហាង បឺរឡេប ដែលមានលក់ឧបករណ៍ និងម៉ាស៊ីនកាហ្វេគ្រប់ប្រភេទក៏រីករាយនឹងផ្ដល់ប្រឹក្សាចំពោះអ្នកចាប់អារម្មណ៍អាជីវកម្មកាហ្វេផងដែរ។
ក្រៅពីផ្ដល់បទពិសោធចំណេះដឹងដល់ភ្ញៀវ ម្ចាស់ហាងកាហ្វេបានបន្ថែមទៀតថា៖ «ពួកយើងតែងតែយកចិត្តទុកដាក់ទៅលើសុខភាពអតិថិជន ដូច្នេះ យើងនឹងធ្វើការរិះរកភេសជ្ជៈ និងមុខម្ហូបថ្មីបន្ថែមទៀតដែលផ្តល់ប្រយោជន៍ដល់អតិថិជន និងប្រកបដោយអនាម័យខ្ពស់ ព្រមជាមួយសេវាកម្មកាន់តែពិសេស»៕
