សៀមរាប៖ ហត់នឿយ និងអស់កម្លាំងក្រោយពីធ្វើដំណើរកម្សាន្តគយគន់ សម្រស់ប្រាង្គប្រាសាទដ៏មហស្ចារ្យ លើទឹកដីអង្គរក្នុងខេត្តសៀមរាប និងកំពុងស្វែងរកកន្លែងសម្រាក ញ៉ាំអាហារ រំសាយអារម្មណ៍មែនទេ? ភោជនីយដ្ឋាន Urban Tree Hut មានបម្រើសេវា ម្ហូបខ្មែរ អាស៊ី និងអឺរ៉ុបជាច្រើនប្រភេទ ក្នុងបរិយាកាសបែបធម្មជាតិ ភ្ជាប់នឹងវប្បធម៌ខ្មែរ រំលេចជាចំណីចក្ខុដ៏គួរឲ្យជាប់ចិត្ត។
ការរចនាហាងដោយប្រើប្រាស់គំនិតច្នៃប្រឌិត លាយឡំនឹងវប្បធម៌ខ្មែរ លោក ថាត សុគន្ធរ៉ុង ជាអ្នកគ្រប់គ្រងបានយកបទពិសោធច្រើនឆ្នាំ និងចំណេះដឹងផ្នែកបដិសណ្ឋារកិច្ច មកបម្រើភ្ញៀវខ្មែរ និងបរទេស ដែលមកសម្រាកកាយញ៉ាំអាហារ ក្រេបភេសជ្ជៈ លម្ហែអារម្មណ៍ ក្នុងបរិយាកាសធម្មជាតិបែបស្ងប់ស្ងាត់។
អ្នកគ្រប់គ្រងវ័យ ៣០ ឆ្នាំរូបនេះ បានឲ្យដឹងថា៖ «Urban Tree Hut មានក្យូសញ៉ាំអាហារច្រើនប្រភេទ មានទោងអង្គុយ មានអង្គុយជាតុ ឬកៅអីទាប ដែលភ្ញៀវអាចមើលឃើញដើមឈើធំច្រើន ស្រស់ស្អាត ហាក់បីដូចជាមិនមែននៅក្នុងទីក្រុងអ៊ីចឹង»។
នៅក្បែរច្រកចូលមានចម្លាក់ព្រះគនេស ដែលជាព្រះតំណាងឲ្យចំណេះដឹង និងក្តីរីករាយ ក្នុងព្រាហ្មណ៍សាសនា និងមានការតាំងរទេះគោ ដែលយានក្នុងការធ្វើដំណើរ និងបម្រើដល់ជីវភាពស្រែចម្ការពីសម័យមុន។
លោក សុគន្ធរ៉ុង បានលើកពីបំណងនៃការតុបតែងនេះថា៖ «យើងចង់ឲ្យក្មេងៗឥឡូវបានស្គាល់ផងដែរ ហើយយើងក៏មានបំណងបង្ហាញវាទៅបរទេសដែរ ព្រោះបរទេសខ្លះសួរថា វាជាអីគេ គេសរសើរថាស្អាត ហើយគាត់ថតលេងទៀតផង ហើយយើងក៏មានច្នៃក្រមា ដែលជាអត្តសញ្ញាណជាតិ ធ្វើជាវាំងនន ជុំវិញទោងញ៉ាំអាហារយើងដែរ»។
ភោជនីយដ្ឋានក៏មានការច្នៃប្រឌិតយកដបទឹកក្រូច ឬស្រាបៀរមករៀបជារូបភាពបេះដូង បិទភ្ជាប់ជញ្ជាំង ដោយដាក់អំពូលនៅខាងក្នុងសម្រាប់បំភ្លឺពេលរាត្រី ដែលបង្កើតជាសម្រស់ស្អាតមួយបែប។ ទន្ទឹមនោះ ក្យូសប្រក់ស្បូវតាមលក្ខណៈផ្ទះប្រជាជនខ្មែរតាមទីជនបទ ដោយអបមាត់ផ្លូវចូលអង្គុយ មានតាំងឫស្សីសម្រាប់ដាក់ចន្លុះ ឬហៅថាភ្លើងគប់ផងដែរ។
ភោជនីយដ្ឋានក៏មានរុក្ខជាតិបៃតងជាច្រើន ដើមស្លា ដើមលុយ ដើមស្វាយ ដើមព្រីង និងមានផ្កាច្រើនជាច្រើនប្រភេទ ចោលក្លិនពិដោរឈ្ងុយឈ្ងប់ និងធ្វើឲ្យបរិយាកាសត្រជាក់ដល់ភ្ញៀវមកអង្គុយញ៉ាំអាហារ អង្គុយលើទោង ឬកៅអីទាបៗ។
Urban Tree Hut បម្រើអាហារបីពេល មានម្ហូបខ្មែរ ម្ហូបអាស៊ី និងម្ហូបបែបអឺរ៉ុប។ ម្ហូបខ្មែរពិសេសប្រចាំហាងមានដូចជា សម្លកកូរ តម្លៃ ១២ ០០០រៀល និងម្ជូរក្បាលត្រី តម្លៃ ១២ ០០០ រៀល អាម៉ុកខ្មែរ តម្លៃ ១៦ ០០០ រៀល រួមជាមួយម្ហូបខ្មែរជាច្រើនមុខទៀត។
ដោយឡែកម្ហូបអាស៊ីមានដូចជា បុកល្ហុងជាច្រើនរសជាតិ តម្លៃ ៦ ០០០ រៀល ភ្លាសាច់គោអង្ក្រង តម្លៃ ១២ ០០០ រៀល ស៊ុបមាន់ពិសេស ១៤ ០០០ រៀល ត្រីសាបាក់ចៀនបែបជប៉ុន តម្លៃ ១២ ០០០ រៀល និងមានម្ហូបឈុតអាស៊ីជាច្រើន។ រីឯម្ហូបមានដូចជា Smoked salmon salad តម្លៃ ៦ ដុល្លារ crispy Pork steak តម្លៃ ៤ ដុល្លារ Chicken Cordon Bleu តម្លៃ ៥ ដុល្លារ និងម្ហូបឈុត ជាច្រើនមុខទៀតផងដែរ។
លោក សុគន្ធរ៉ុង បញ្ជាក់ថា៖ «ហាងយើងផ្តោតលើតម្លៃ គឺអត់ថ្លៃទេ សមរម្យ មួយទៀតយើងផ្តោតសំខាន់រសជាតិឆ្ញាញ់ និងអនាម័យខ្ពស់។ សាច់ និងបន្លែត្រូវបានជ្រើសរើសយ៉ាងយកចិត្តទុកដាក់ ចំណែកសេវាកម្មរហ័ស ដោយសារតែយើងមានបុគ្គលិកច្រើន និងទទួលបានបណ្តុះបណ្តាលជំនាញផ្ទាល់ លើសេវាកម្មម្ហូប និងភេសជ្ជៈ ហើយយើងក៏មានបង្រៀនភាសាអង់គ្លេស ទៅកាន់គាត់ដែរ ដើម្បីពង្រឹងសមត្ថភាពភាសាពួកគាត់ដែរ»។
បើកដំណើរការបាន ១ ឆ្នាំ Urban Tree Hut ទទួលបានភ្ញៀវប្រមាណជាង ១០០ នាក់ ក្នុងមួយថ្ងៃ និងបើកទទួលភ្ញៀវពីម៉ោង ៦ ព្រឹក ដល់ម៉ោង ១១ យប់។
ធ្វើដំណើរប្រមាណជា ១ គីឡូតាមផ្លូវមាត់ស្ទឹងសៀមរាប ឆ្ពោះតាមស្ពានវត្តដំណាក់ តម្រង់ទៅត្រង់សាលាបញ្ញាសាស្ត្រ និងបន្តប្រមាណជាង ២០០ ម៉ែត្រ Urban Tree Hut ស្ថិតនៅ ខាងឆ្វេងដៃ។ ទូរស័ព្ទលេខ ០១១ ៨០ ០០ ០៤,០៨៧ ៨០ ០០ ០៤ និងហ្វេសប៊ុក Urban Tree Hut៕
វីដេអូ៖