ក្រុងបាងកក: ពាក់អាវយឺតក្រុមតន្ដ្រីរ៉ុក Nirvana តារារ៉ុកនៅផ្ទះបាយ Gaggan Anand មិនសោកស្ដាយចំពោះការបោកឆ្នាំងបាយខ្លួនឯងនោះ គឺភោជនីយដ្ឋានក្រុងបាងកកលំដាប់ Michelin ផ្កាយ ២ ក្នុងចំណោមភោជនីយដ្ឋានកំពូលៗក្នុងលោក។
បុរសអាយុ ៤១ ឆ្នាំ ប្រាប់ AFP ក្នុងអាផាតមិនតាំងសម្ភារផ្ទះបាយពេញជញ្ជាំង ទាំងនៅលើតុអាហារ និងទូរចានក្បានប៉ុនធ្នើរសៀវភៅថា៖ «រឿងរ៉ាវខ្លះកើតឡើងភ្លាមៗដោយមិនបានគ្រោងទុក ដូចជា ព្យុះកំបុតត្បូង និងព្យុះសង្ឃរាជាដើម។ វាមកមិនប្រាប់ ដែលអ្នកពិបាកគេចផុត»។
ការបិទទ្វារភោជនីយដ្ឋាន «Gaggan» កាលពីថ្ងៃសៅរ៍ ដែលអាហារមួយឈុតចំនួន ២៥ មុខ ក្នុងវីឡាសម័យអាណានិគម តម្លៃ ៨ ០០០ បាត (២៧០ ដុល្លារ) បានធ្វើឲ្យរញ្ជួយពិភពអាហារ។
ការបិទទ្វារដ៏គួរឲ្យភ្ញាក់ផ្អើលរបស់ Gaggan បានបង្កជាក្ដីកង្វល់ចំពោះវិស័យម្ហូបអាហារដោយសារការកក់ជាច្រើនត្រូវបានលុបចោល។ អ្នកខ្លះយល់ថា វាជាការបំផ្លាញឆ្នាំងបាយខ្លួនឯង តែចំពោះលោក Gaggan ការសម្រេចចិត្ដនេះត្រូវតែធ្វើឡើងភ្លាមៗក្រោយពីមានជម្លោះភាគហ៊ុនជាមួយដៃគូជំនួញ។
លោកប្រាប់ AFP ថា ភោជនីយដ្ឋានថ្មីដែលកាន់តែធំទំនងជាបើកសម្ពោធក្នុងខែតុលា នឹងបម្រើភ្ញៀវ ៤០ នាក់ ១ ពេល ដែលនៅតែជាអាហារថ្លៃ។
លោកនិយាយថា៖ «រយៈពេល ១០ ឆ្នាំ ខ្ញុំនឹងក្លាយជាមេចុងភៅធំបំផុតមួយប្រចាំសតវត្សរ៍ទី ២១ នេះ»។
អាថ៌កំបាំងចំពោះភាពជោគជ័យ គឺបម្រើម្ហូបតូចៗ ឬអ្វីដែលលោកហៅថា «សោភ័ណអាហារប្លែកៗ» ប្រចាំតំបន់អាស៊ី និងឥណ្ឌា។
ចំពោះមុខម្ហូបមួយប្រភេទ អតិថិជនក៏ត្រូវបានលើកទឹកចិត្ដឲ្យលិទ្ធចាន ខណៈចម្រៀងមនោសញ្ចេតនា «លិទ្ធឲ្យអស់» បន្លឺឡើងតាមគ្រឿងបំពងសំឡេងផងដែរ។ ប៉ុន្ដែលោកបានសរសេរថា ចំពោះភោជនីយដ្ឋានជំនាន់ថ្មីនេះ កូនស្រីរបស់លោកនឹងក្លាយជាម្ចាស់ហ៊ុនធំបំផុតរបស់លោក។
លោកអះអាងថា៖ «អ៊ីចឹង លោកអ្នកអាចប្រាកដថា ភោជនីយដ្ឋានថ្មីរបស់ខ្ញុំនេះនឹងដំណើរការឡើងដោយសេចក្ដីស្រឡាញ់ និងឆន្ទៈពិតៗ»៕ AFP/HR