ភ្នំពេញ៖ ក្លិនសណ្តែកដីលីងភាយចេញពីចានអាហារជាម្សៅខ្ចប់សាច់ និងបន្លែសាលាដ រួចស្រោចទឹកជ្រលក់ពីលើ ដែលមើលទៅគួរឲ្យចង់ទទួលទានក្នុងបរិយាកាសតន្ត្រីកំដរអារម្មណ៍ និងកន្លែងអង្គុយមានផាសុកភាព។
ឡា ម៉ាដាម ជាភោជនីយដ្ឋានហ្វីលីពីន បានដំណើរការតាំងពីឆ្នាំ ២០១៦ ហើយទទួលបានការពេញនិយមពីភ្ញៀវបរទេស ជាមួយទីតាំងអំណោយផល ស្ថិតលើដងផ្លូវលេខ ៤៤០ កែងផ្លូវ ១៣៥ ម្តុំទួលទំពូង។
ក្នុងបញ្ជីរាយមុខម្ហូបបែបឌីជីថលមានរាយនាមអាហារ ៣០ មុខ រួមជាមួយបង្អែមទឹកកកឈូស ដែលលក់ដាច់បំផុតក្នុងហ្វីលីពីន។
អ្នកនាង Anne Chrisrine Waje ជាម្ចាស់ហាង ឡា ម៉ាដាម បានប្រាប់ ភ្នំពេញ ប៉ុស្តិ៍ ថា៖ «ដោយសារវប្បធម៌នៃអាហារនៅទីនេះ (កម្ពុជា) គឺស្រដៀងនឹងម្ហូបហ្វីលីពីន ខ្ញុំក៏បានសម្រេចចិត្តនាំយកម្ហូបហ្វីលីពីនមកប្រទេស កម្ពុជា ហើយក៏ដោយសារចំណង់ចំណូលចិត្តចម្អិនអាហាររបស់ខ្ញុំផងដែរ»។
ក្នុងចំណោមអាហារទាំង ៣០ មុខនេះ ចំពោះមុខម្ហូបដែលល្បីប្រចាំហាងមានដូចជា Fresh Lumpia (៥ ដុល្លារ) Crispy Kare-Kare (៧ ដុល្លារ) Pork Sinigang (៦ ដុល្លារ) ព្រមទាំងមានបង្អែមល្បីលក់ដាច់ខ្លាំងនៅប្រទេស ហ្វីលីពីន ដូចជា Halo-Halo, Ieche Flan និង Halayang Ube។
អ្នកនាង Anne ដែលមករស់នៅកម្ពុជាជាង ៨ ឆ្នាំ និងមានអាជីពជា គ្រូបង្រៀនភាសាអង់គ្លេសបានបន្ថែមទៀតថា៖ «នៅភោជនីយដ្ឋានយើងមានភ្ញៀវបរទេសស្ទើរតែ ៨០ ភាគរយទៅហើយ និងមានប្រជាជនម្ចាស់ស្រុកត្រឹមតែ ២០ ភាគរយនោះទេ ប៉ុន្តែអ្នកខ្លះក៏ថាអាហារយើងស្រដៀងទៅនឹងអាហារខ្មែរ ចំណែកអ្នកខ្លះទៀតគាត់មិនចេះញ៉ាំទេ»។
ជាមួយចុងភៅ Alvin និង Jc មកពីហ្វីលីពីនផ្ទាល់ ឡា ម៉ាដាម បានរក្សារសជាតិដើមនៅចានអាហារ ដែលទាក់ទាញភ្ញៀវហ្វីលីពីន ខ្មែរ ចិន ថៃ និងបស្ចិមប្រទេស។
ដោយសារឈ្មោះ ឡា ម៉ាដាម មិនទាន់ពេញអត្ថន័យនៃអាហារហ្វីលីពីន ម្ចាស់ហាងអាហារហ្វីលីពីនរូបនេះ ក៏បានបញ្ជាក់ដែរថា៖ «ការផ្លាស់ប្តូរពី ឡា ម៉ាដាម មកជា W&B Bistro Manila ដោយសារតែយើងចង់សង្កត់ធ្ងន់ភោជនីយដ្ឋានរបស់យើងឲ្យទៅជាភោជនីយដ្ឋានហ្វីលីពីននៅភ្នំពេញក្រោមពាក្យថា ម៉ានីល ដោយសារ ម៉ានីល ជាឈ្មោះនៃទីក្រុង ម៉ានីល គឺជារដ្ឋធានីរបស់ប្រទេស ហ្វីលីពីន»។
ឡា ម៉ាដាម ឬ W&B Bistro Manila បើកទទួលភ្ញៀវចាប់ពីម៉ោង ១១ ព្រឹក ដល់ម៉ោង ១០ យប់។ ទំនាក់ទំនងទូរស័ព្ទលេខ ០១១ ២៥៨ ១១១ និងតាមរយៈទំព័រហ្វេសប៊ុក La Madame៕
វីដេអូ៖