ហាង សមុទ្រអនុស្សា សំដៅទៅលើម្ហូបប្រចាំហាងជាគ្រឿងសមុទ្រ ដែលធ្វើឱ្យអតិថិជនដក់ជាប់ក្នុងចិត្តវិលត្រឡប់មកវិញ។ ហុង មិនា
.jpg)
ភ្នំពេញ៖ ក្រោយពីត្រូវបានក្រឡុកចាក់ចេញពីធុង បង្គា បង្កង លៀសសមុទ្រ មឹក ក្ដាម ខ្យង ពោត សាច់ក្រ ហតដក បង្កប់ខ្លួនលាយឡំក្នុងសរសៃស៉្បេហ្គេធី និងទឹកជ្រលក់ក្រហមឆ្អិនឆ្អៅនៅលើតុ ធ្វើឱ្យភ្ញៀវអង្គុយចាំអន្ទះសាភ្លក្សដោយពាក់ស្រោមដៃចាប់កាន់ផ្ទាល់តែម្ដង។
គ្រឿងសមុទ្រក្រឡុកបានទាក់ទាញអតិថិជនមកកាន់ សមុទ្រអនុស្សា តាំងពីហាងនេះមិនទាំងទាន់បើកជាផ្លូវការ មកម្ល៉េះ ដោយគ្រាន់តែឃើញរូបភាពក្នុងហ្វេសប៊ុកក៏ល្មមគ្រប់គ្រាន់ទាក់ចិត្តភ្ញៀវ។
បើកដំណើរការនៅថ្ងៃទី ៧ ខែ តុលា ឆ្នាំ ២០២០ សមុទ្រអនុស្សា បានធ្វើឱ្យភ្ញៀវនឹកដល់គ្រឿងសមុទ្រស្រស់ៗ ជាម្ហូបពិសេសសម្រាប់ហាងនោះផ្ទាល់តែម្ដង។
អំពីអត្ថន័យឈ្មោះហាងនេះ លោក សុត រដ្ឋា បានថ្លែងឱ្យដឹងយ៉ាងដូច្នេះថា៖ «សមុទ្រគឺព្រោះតែហាងយើងផ្ដោតទៅលើគ្រឿងសមុទ្រច្រើន»។
លោកបានបកស្រាយទៀតថា៖ «ចំណែកពាក្យ អនុស្សា គឺមកពីពាក្យអនុស្សាវរីយ៍ដែលអាចបង្ហាញពីអារម្មណ៍ថាអតិថិជន ដែលមកគាត់ចាប់ចិត្តហើយនឹកអាឡោះអាល័យកន្លែងចាស់ និងតែងតែមកម្ដងហើយម្ដងទៀត»។
ទោះជាមុខម្ហូបនៅហាងជាប្រភេទគ្រឿងសមុទ្រ និងមើលទៅទំនងជាមានតម្លៃខ្ពស់ តែលោក រដ្ឋា បានបញ្ជាក់ប្រាប់ថា តាមពិតទៅតម្លៃត្រឹមចន្លោះពី ១០ ០០០ រៀលទៅ ២០ ០០០ រៀលប៉ុណ្ណោះ។
លើកលែងតែគ្រឿងសមុទ្រក្រឡុក ដែលក្នុង ១ ឈុតវាគឺ ៤០ ០០០ រៀល និងអាចទទួលទានបាន ២ ទៅ ៣ នាក់ និងមានឈុត ៦០ ០០០ រៀល សម្រាប់ ៤ ទៅ ៥ នាក់។
គ្រឿងសមុទ្រចម្រុះក្រឡុកជាមួយ េស្ប៉ហ្គេធី ពោត និងហតដក។ ហុង មិនា
អតិថិជនដែលមកគ្នាច្រើន អាចកុម៉្មង់ថែមស៉្បែហ្គេធី ១ ដុល្លារ ថែមហតដក ១ ដុល្លារ ថែមគ្រឿងសមុទ្រ ២ ដុល្លារ និងថែមពោត ១ ដុល្លារ។
ក្រៅពីគ្រឿងសមុទ្រក្រឡុក មុខម្ហូបដែលទាក់ចិត្តភ្ញៀវផ្សេងទៀតមានដូចជា បង្គាខ្ទឹមស នំបញ្ចុក ងាវ និងគ្រឿងសមុទ្រអាំងឈ្ងុយឆ្ងាញ់។
ម្ចាស់ហាងវ័យ ២៧ ឆ្នាំរូបនេះបានឱ្យដឹងថា ហាងរបស់លោកក៏មានការលក់បាយថ្ងៃត្រង់ផងដែរ។
លោកបានរៀបរាប់ទៀតថា៖ «បច្ចុប្បន្នយើងមានភ្ញៀវមកស្រស់ស្រូបអាហារពេលថ្ងៃយ៉ាងច្រើន»។
សម្រាប់ម្ហូបពេលថ្ងៃ គឺតម្លៃ ៩ ០០០ រៀល ទាំងអស់ ដោយលោក រដ្ឋា ក៏បានបន្ថែមថា៖ «បាយ និងម្ហូបដែលយើងបម្រើនៅទីនេះគឺច្រើនៗណាស់ ព្រោះយើងចង់ឱ្យពួកគាត់បានហូបឆ្អែត។ ប្រសិនបើពួកគាត់មក ៤ ទៅ ៥ នាក់ អាចកុម៉្មង់ម្ហូបតែ ៣ មុខក៏ញ៉ាំបរិបូរណ៍ដែរ។ យើងមិនចង់លក់នៅក្នុងតម្លៃថោកហើយឱ្យពួកគាត់ញ៉ាំស្ទើរៗទេ»។
គ្រឿងសមុទ្រនៅហាង សមុទ្រអនុស្សា ត្រូវបានយកពីម៉ូយចម្រុះតាមបណ្ដាខេត្តនានាដូចជា ទឹកដី កំពត កំពង់សោម និងខេត្តកោះកុង ជាដើម។
ភាពស្រស់ៗនៃគ្រឿងសមុទ្រ នេះហើយដែលត្រូវបានអតិថិជនផ្ដល់យោបល់សរសើរតាមបណ្ដាញសង្គមថា ឆ្ងាញ់ហើយចង់វិលត្រឡប់មកញ៉ាំម្ដងហើយម្ដងទៀត។
គ្រឿងសមុទ្រអាំងស្រស់ៗ និងបង្គាបំពងខ្ទឹមស នៅហាងសមុទ្រអនុស្សា។ហុង មិនា
យ៉ាងណាមិញ ម្ចាស់ហាងរូបនេះ ក៏បាននិយាយអំពីបទពិសោធរបស់លោកផ្ទាល់ក្នុងការប្តូរពីអ្នកធ្វើការមកចាប់អាជីពរកស៊ីនេះថា៖ «ចំពោះហាងនេះ និយាយតាមត្រង់ទៅ ខ្ញុំនៅខ្ចីបទពិសោធច្រើនណាស់។ ខ្ញុំមិនទាន់ពេញចិត្តនឹងការរៀបចំហាងរួមទាំងសេវាកម្មនៅឡើយទេ»។
យ៉ាងណាមិញ លោក សុត រដ្ឋា បានអះអាងថា៖ «តែខ្ញុំនឹងព្យាយាមធ្វើឱ្យវារីកចម្រើនបន្ថែមទៀត ក៏ដូចជាទទួលស្វាគមន៍ពីមតិស្ថាបនារបស់អតិថិជនគ្រប់រូបផងដែរ។
លោករំឭកប្រាប់ឧទាហរណ៍ដែលលោកបានទទួលមតិរិះគន់បែបស្ថាបនាពីអតិថិជនយ៉ាងដូច្នេះថា៖ «ដូចជាថ្មីៗនេះ គ្រឿងសមុទ្រក្រឡុក ពីដើមយើងធ្វើមានងាវតែដោយមានមតិយោបល់ពីអតិថិជនប្រាប់ថា វាពិបាកញ៉ាំយើងក៏សម្រេចចិត្តដកវាចេញ»។
ហាងសមុទ្រអនុស្សា មានទីតាំងស្ថិតនៅជិត មន្ទីរពេទ្យកុមារជាតិ។ សម្រាប់អាហារពេលថ្ងៃ ហាងចាប់បើកពី ១០ កន្លះព្រឹក ទៅ ១ កន្លះរសៀល និងពេលល្ងាចចាប់ពីម៉ោង ៤ រសៀល រហូតដល់ម៉ោង ៩ យប់។
ព័ត៌មានបន្ថែម ឬការកុម៉្មង់អាចទំនាក់ទំនងទំព័រហ្វេសប៊ុកហាង សមុទ្រអនុស្សា ឬទាក់ទងតាមទូរស័ព្ទលេខ ០១៦ ៦៦២ ១២៩៕
វីដេអូ៖
