ភ្នំពេញ៖ ស្ថិតនៅម្ដុំបឹងកេងកង Aria D''italia ជាកន្លែងឲ្យភ្ញៀវអង្គុយស្តាប់ភ្លេង ក្រេបស្រាក្រហម និងភ្លក្សភីហ្សារសជាតិដើម ចម្អិនក្នុងឡដុតអុស រក្សានូវវិធីចម្អិនភីហ្សា Neapolitan ដែលជាសិល្បៈម្ហូបត្រូវបានចុះជាបេតិកភណ្ឌវប្បធម៌អរូបីអង្គការយូនីស្កូ ឆ្នាំ ២០១៧។
Aria D''italia ដែលមានន័យថា ខ្យល់អ៊ីតាលីត្រូវបានបង្កើតឡើងដោយបុរសអ៊ីតាលី និងប្ដីប្រពន្ធជនជាតិខ្មែរកាលពី ១៣ ឆ្នាំមុន ទើបបុរសជនជាតិស្វ៊ីស Daniel Kreis បានទិញបន្តនៅឆ្នាំ ២០១៨។
ម្ចាស់ហាងវ័យ ៥០ ឆ្នាំ បានបង្ហើបឲ្យបានដឹងពីភាពលំបាកនៃការចាប់ផ្តើមដំបូងដែរថា៖ «ខ្ញុំបានធ្វើឡដុតអុសសម្រាប់ធ្វើភីហ្សា កែកុនហាងថែមរូបគំនូរឲ្យរ៉ូមេនទិកដូចនៅអ៊ីតាលី ប៉ុន្តែអ្វីៗមិនងាយស្រួលទេ។ កាលពីដំបូង ខ្ញុំបានជួបផលពិបាកមួយដោយបុគ្គលិករបស់ខ្ញុំបានលាឈប់ ហើយខ្ញុំពិបាកក្នុងការស្វែងរកមនុស្សដែលអាចចម្អិនភីហ្សាបែបប្រពៃណីអ៊ីតាលីណាស់»។
ក្រៅពីបន្ថែមមុខម្ហូបស្វ៊ីសលោក Daniel Kreis មានបំណងចង់ឲ្យ ហាង Aria D''italia ពោរពេញដោយបរិយាកាសល្អសម្រាប់ការជួបជុំគ្រួសារ និងការណាត់ជួបដ៏រ៉ូមេនទិក ដោយលោកបានតុបតែងលម្អបន្ថែមរូបគំនូរ គោមភ្លើងបែបរ៉ូមេនទិក ធ្វើឲ្យភ្ញៀវមានអារម្មណ៍ថា ពួកគេកំពុងស្ថិតនៅប្រទេស អ៊ីតាលី ផងដែរ។
លោកបន្តទៀតថា៖ «ឥឡូវនេះខ្ញុំមានក្រុមការងារដ៏ល្អមួយដែលអាចផ្តល់ជូននូវភីហ្សាឆ្ងាញ់ ហើយយើងក៏មានទំនុកចិត្តលើផ្ទះបាយរបស់យើងផងដែរ ប្រសិនបើអតិថិជនមិនចូលចិត្តអាហាររបស់យើង ពួកគេក៏មិនចាំបាច់បង់ប្រាក់នោះទេ»។
ការចម្អិនភីហ្សានៅក្នុងឡអុស ត្រូវបានប្រើប្រាស់កម្ដៅប្រមាណ ៥០០ អង្សាសេ ដោយប្រើរយៈពេលចាប់ពី ២ នាទីនៅក្នុងឡបែបប្រពៃណី ភីហ្សា គឺនឹងស្តើងស្រួយ និងមានក្លិនឈ្ងុយ ខណៈភីហ្សាដុតឡហ្គាស ជាទូទៅត្រូវប្រើពេលរហូតដល់ ១៥ នាទី។
Aria D''italia មានភីហ្សា ១៨ រសជាតិ រួមមានរសជាតិគ្រឿងសមុទ្រ សាច់ក្រក សាច់ជ្រូក ៣ ជាន់ សាល់ម៉ុន ឈីស ដែលមានតម្លៃពី ៦,៥ ដុល្លារ ដល់ ១១,៥ ដុល្លារ។
ក្រៅពីភីហ្សា Aria D''italia ក៏មានបង្អែមបរទេសដូជា Chocolate Mousse (៤ ដុល្លារ) Tiramisu (៤,៥០ ដុល្លារ)។ រីឯភេសជ្ជៈ មានកាហ្វេ ស្រាបៀរ និងស្រាក្រហម តម្លៃចាប់ពី ១,៥០ ដល់ ២៥ ដុល្លារ។
លោក Kreis បានឲ្យដឹងថា នៅក្នុង ១ ថ្ងៃ Aria D''italia ទទួលបានភ្ញៀវចាប់ពី ៣០ ទៅ ៥០ នាក់ ដោយ ៦០ ភាគរយ ជាជនបរទេស និង ៤០ ភាគរយ ជាប្រជាជនក្នុងស្រុក។
លោករៀបរាប់ថា៖ «ភ្ញៀវខ្មែរចូលចិត្តកុម្ម៉ង់ភីហ្សា ស្ដេក សាលាដ និងបង្អែម ហើយដាក់រួមចែកគ្នាញ៉ាំ ខណៈភ្ញៀវបរទេសគេកុម្ម៉ង់ៗម្នាក់ៗ ១ មុខៗ ញ៉ាំដោយឡែកពីគ្នា»។
Aria D''italia Pizzeria & Bar ស្ថិតនៅផ្ទះលេខ ៤១ EO ផ្លូវលេខ ៣០១ (កែងផ្លូវ ៥៧) សង្កាត់បឹងកេងកង ១។ ភោជនីយដ្ឋានចាប់បើកពីម៉ោង ៥:៣០ នាទីល្ងាច ដល់ម៉ោង ១០:៣០ នាទីយប់ និងបិទនៅរៀងរាល់ថ្ងៃចន្ទ។ ទំនាក់ទំនងតាមរយៈទូរស័ព្ទលេខ ០១១ ៨៤០ ៧០៥ និងគេហទំព័រ www.ariaditalia.oizza៕
វីដេអូ៖