ក្រុងតូរ៉ុនតូ៖ នៅក្បែរបឹងអុនតារីយ៉ូ ក្រុមហ៊ុនបច្ចេកវិទ្យាកាណាដា មានសមត្ថភាពប្រកាសមុនអំពីហានិភ័យនៃវីរុសអាថ៌កំបាំងដែលកើតឡើងក្នុងទីក្រុងវូហាន របស់ចិន។ តើពួកគេបានដឹងយ៉ាងដូចម្ដេច? នោះគឺបច្ចេកវិទ្យាវៃឆ្លាត។
BlueDot បានអភិវឌ្ឍបច្ចេកវិទ្យា ដែលអាចត្រួតពិនិត្យលើអត្ថបទកាសែតរាប់សែនរឿងក្នុង ១ ថ្ងៃ រួមជាមួយព័ត៌មានចរាចរណ៍ផ្លូវអាកាស ដើម្បីស្វែងរក និងតាមដានការរីករាលដាលនៃវីរុសកូវីដ-១៩។
វាបានបញ្ជូនសារប្រុងប្រយ័ត្នទៅកាន់អតិថិជនកាលពីថ្ងៃទី ៣១ ខែធ្នូ អំពីការរីករាលដាលនៃវីរុសកូរូណាថ្មី តែប៉ុន្មានថ្ងៃមុនពេលអង្គភាពសុខាភិបាលសាធារណៈពិភពលោកបានចេញសេចក្ដីថ្លែងការណ៍ផ្លូវការ។
BlueDot ដែលមានមូលដ្ឋាននៅទីក្រុងតូរ៉ុនតូ បានធ្វើការទស្សន៍ទាយដ៏ត្រឹមត្រូវលើបណ្ដាប្រទេសដែលវីរុសរីកសាយភាយទៅដល់។
លោក ការ៉ាន់ ខាន់ ស្ថាបនិកក្រុមហ៊ុនបានប្រាប់ AFP ថា៖ «អ្វីដែលយើងកំពុងព្យាយាមធ្វើគឺ ដើម្បីផ្សព្វផ្សាយដោយការប្រើទិន្នន័យ និងការវិភាគ ក៏ដូចជាបច្ចេកវិទ្យាឲ្យបានរហ័សទាន់ពេលវេលា។ ច្បាស់ណាស់យើងកំពុងតែតាមដានការរីករាលដាលនៃវីរុសឲ្យទាន់លឿនបំផុត»។
លោក ខាន់ អាយុ ៤៩ ឆ្នាំ ជាអ្នកវិភាគរោគជាអ្នកមានគំនិតបង្កើតកម្មវិធីទូរស័ព្ទនេះដំបូង BlueDot បន្ទាប់ពីការរាតត្បាតវីរុស SARS អំឡុងឆ្នាំ ២០០២ និងឆ្នាំ ២០០៣។
ក្រោយពីដាក់ឲ្យដំណើរការក្នុងឆ្នាំ ២០០៤ វាបានទស្សន៍ទាយពីការរីករាលដាលនៃជំងឺហ្ស៊ីកា (Zika) ឆ្នាំ ២០១៦ រួចហើយ។ បច្ចុប្បន្នក្រុមហ៊ុននេះមានបុគ្គលិក ៤០ នាក់ ជាក្រុមការងារចម្រុះរវាងគ្រូពេទ្យពេទ្យសត្វ អ្នកជំនាញជំងឺឆ្លង អ្នកវិទ្យាសាស្ដ្រផ្នែកទិន្នន័យ និងអ្នកអភិវឌ្ឍកម្មវិធីសូហ្វវែរជាដើម។
រៀងរាល់ ១៥ នាទីម្ដង វាបានស្កេនរបាយការណ៍ផ្លូវការនានា វេទិកាឯកទេស និងប្រភពព័ត៌មានអនឡាញ រួមទាំងការស្វែងរកតាមពាក្យពេចន៍ និងសំណង់ប្រយោគគន្លឹះ។
បច្ចេកវិទ្យាប្រាជ្ញាសិប្បនិម្មិត Bluedot អាចចាប់ព័ត៌មានបាន ៦៥ ភាសា និងតាមដានជំងឺ ១៥០ ប្រភេទខុសៗគ្នា៕ AFP/HR