ភ្នំពេញ៖ ក្នុងពេលដែលកុមារបន្តការសិក្សានៅផ្ទះ តាមរយៈកម្មវិធីអប់រំពីចម្ងាយ មាតាបិតាមួយចំនួនពុំសូវមានពេលវេលាគ្រប់គ្រាន់នៅក្បែរកូន បារម្ភខ្លាចក្មេងអផ្សុក ឬជក់នឹងការកម្សាន្តជាមួយឧបករណ៍បច្ចេកវិទ្យា។
ដំណោះស្រាយនឹងកង្វល់នេះ បានធ្វើឲ្យយុវជន-យុវតីមួយក្រុមមូលមតិគ្នាបង្កើតកម្មវិធីសិក្សាអប់រំលក្ខណៈកម្សាន្ត បង្កើនអត្ថប្រយោជន៍នៃការប្រើប្រាស់បច្ចេកវិទ្យារបស់កុមារ ជួយបណ្ដុះប្រាជ្ញា គំនិតត្រិះរិះ និងភាពវាងវៃ។
ឃីដឌូ (KeeDu) ជាកម្មវិធីសិក្សាអនឡាញថ្មី ជាវេបសាយ និងកម្មវិធីស្មាតហ្វូន និងថេប្ល៊ិត សម្រាប់កុមារពីកម្រិតមត្តេយ្យដល់ថ្នាក់ទី ៦ អាចក្រេបជញ្ជក់ចំណេះដឹងបន្ថែមតាមរយៈការអប់រំបែបកម្សាន្ត។
ស្ថាបនិក ឃីដឌូ ជាយុវជន-យុវតីខ្មែរចំនួន ៨ រូប មាន៖ លោក មួង វ៉ាន់ឌី លោក អ៊ិត សេរីវឌ្ឍនៈ លោក អ៊ិច សុខហេង កញ្ញា ហាស់ ច័ន្ទលក្ខិណា កញ្ញា សា សុផានិច លោក ឧត្តម វិសាល លោក សេង អ៊ុយ និងកញ្ញា ឈុន ប៉ជូ។
អ្នកទាំងអស់គ្នាសុទ្ធតែមានជំនាញ និងប្រវត្តិការសិក្សាខុសគ្នារួមមាន ផ្នែកសូហ្វវែរ សរសេរកម្មវិធី វិទ្យាសាស្ត្រកុំព្យូទ័រ ព័ត៌មានវិទ្យា ទីផ្សារឌីជីថល គ្រប់គ្រងពាណិជ្ជកម្ម និងសេដ្ឋកិច្ច។
ដោយប្រើប្រាស់បទពិសោធ និងចំណេះដឹងលើវិស័យខុសគ្នា ពួកគេបានសហការបង្កើតនូវកម្មវិធីសិក្សានៅលើទូរស័ព្ទដៃ និងវេបសាយ ឈ្មោះថា «ឃីដឌូ» ដើម្បីប្រមូលផ្តុំកម្មវិធីសិក្សាបែបសប្បាយៗ និងមានប្រយោជន៍ដល់កុមារកម្ពុជា។
ក្រុមស្ថាបនិក ឃីដឌូ បានប្រាប់ ភ្នំពេញ ប៉ុស្ដិ៍ ឲ្យដឹងថា៖ «កុមារដែលរៀនតាម ឃីដឌូ អាចទទួលបាននូវអត្ថប្រយោជន៍ជាច្រើន ដូចជាមានចំណាប់អារម្មណ៍ក្នុងការរៀនដោយខ្លួនឯង ធ្វើឲ្យកុមារយល់ថា ការសិក្សាដោយខ្លួនឯង មិនស្មុគស្មាញនោះទេ ហើយអាចទទួលបានការសិក្សាមេរៀនថ្មីៗ ដែលមិនមានបង្រៀនក្នុងកម្មវិធីរបស់សាលាទៀត។ មិនតែប៉ុណ្ណោះកុមារអាចទទួលបានហ្គេម ដែលពាក់ព័ន្ធនឹងមេរៀនក៏ដូចជាបាតុភូតផ្សេងៗនៅខាងក្រៅផងដែរ»។
«ឃីដឌូ» បង្រៀនកុមារនូវមេរៀន ដែលចងក្រង និងរៀបរៀងដោយលោកគ្រូ អ្នកគ្រូ ក្នុងកម្រិតសិក្សាពីមត្តេយ្យ ដល់បឋមសិក្សា។
ប៉ុន្តែដោយសារកម្មវិធីនេះទើបតែចាប់ផ្ដើមបង្កើតនៅដើមខែមេសា ថ្មីៗនេះ ក្រុមស្ថាបនិកទើបតែបង្កើតកម្មវិធីដំណាក់កាលដំបូងត្រឹមតែកុមារកម្រិតមត្តេយ្យសិន ហើយរំពឹងថា នឹងរៀបចំកម្មវិធីសិក្សាសម្រាប់កុមាររហូតដល់ថ្នាក់ទី ៦ ក្នុងពេលឆាប់នេះៗ។
ឃីដឌូ មានខ្លឹមសារមេរៀនដូចនឹងកម្មវិធីសិក្សាទូទៅរបស់កុមារដែរ គ្រាន់តែមាតិការៀបរៀងជាទម្រង់មេរៀនបែបរូបតុក្កតាគំនូរជីវចល។ លើសពីនេះកម្មវិធីថ្មីនេះ ក៏មានវីដេអូមេរៀនចំណេះដឹងទូទៅទាក់ទងនឹងការពិសោធវិទ្យាសាស្ត្រហ្គេមលេងបង្កើនចំណេះដឹង មេរៀនសម្បូរបែបមានអក្សរ អមរូបភាព និងពណ៌ស្អាតៗ ដែលកុមារតូចៗ ចូលចិត្តតាមដាន។ កុមារក៏អាចរៀនដោយជ្រើសរើសភាសាអង់គ្លេស ឬភាសាខ្មែរ។
ស្ថាបនិកមួយក្រុមនេះ បានឲ្យដឹងទៀតថា៖ «នាថ្ងៃអនាគតយើងនឹងបញ្ចូលបន្ថែមនូវមុខងារថ្មីៗទៀត ជាពិសេស មាតិកាជាភាសាខ្មែរ ទោះបីជាមាតិកាប្រភេទនេះ មានជាភាសាផ្សេងៗទៀតនៅប្រទេសដទៃរួចហើយក៏ដោយ»។
យើងនឹងនៅរៀបរៀងមាតិកា ជាភាសាខ្មែរនេះឡើងដោយរួមបញ្ចូលនូវអត្តសញ្ញាណជាតិកែលម្អសម្របទៅតាមបរិបទអ្នកប្រើប្រាស់នៅកម្ពុជា។ លើសពីនេះយើងនឹងគិតគូរក្នុងការបង្កើតឲ្យមានទំនាក់ទំនងរវាងសិស្ស និងគ្រូ មាតាបិតា និងគ្រូសម្រាប់ Premium Subscription ដែល Free Version របស់កម្មវិធីផ្សេងមិនមាន»។
ស្ថាបនិក ឃីដឌូ ក៏សង្ឃឹមដែរថា កម្មវិធី ឃីដឌូ នឹងចូលរួមចំណែកជំរុញកុមារឲ្យធ្វើស្វ័យសិក្សា ខណៈដែលពួកគេមិនអាចទៅសាលាបាន។ កុមារនឹងអាចប្រើប្រាស់ពេលវេលាបានត្រឹមត្រូវ ជាជាងខ្ជះខ្ជាយលើកម្មវិធីហ្គេម ឬវីដេអូមិនសូវមានប្រយោជន៍។
ការដាក់ដំណើរការសាកល្បងរបស់ ឃីដឌូ (KeeDu) នឹងចាប់ផ្ដើមនាពេលឆាប់ៗនេះ។ ដើម្បីចុះឈ្មោះចូលរៀនតាម ឃីដឌូ លោកអ្នកត្រូវទាញកម្មវិធី ដាក់ស្មាតហ្វូន ឬថេប្ល៊ិត បន្ទាប់មក ចុះឈ្មោះតាមរយៈលេខទូរស័ព្ទ ឬតំណភ្ជាប់ទៅកាន់គណនីហ្វេសប៊ុកជាការស្រេច។
សម្រាប់ព័ត៌មានលម្អិតសូមចូលទៅកាន់ ទំព័រហ្វេសប៊ុក @keeduplatform ឬទំនាក់ទំនងទូរស័ព្ទលេខ ០៦៩ ៤៤ ៦៥ ៤២៕