ភ្នំពេញ៖ ជាដំណោះស្រាយបញ្ហាអគ្គិភ័យដោយគ្រាន់តែ ៦ ខែដំបូងនៃឆ្នាំ ២០១៩ របាយការណ៍ពីអាជ្ញាធរ បានឲ្យដឹងថា អគ្គិភ័យបានលេបត្របាក់ផ្ទះសំបែង ៤១៨ ខ្នង និងឆក់យកជីវិតមនុស្ស ១០ នាក់ ទូទាំងប្រទេសនោះ ArrowDot បានប្រកាសដាក់លក់ឧបករណ៍ជូនដំណឹងពីហានិភ័យភ្លើងឆេះ ដែលអាចឲ្យម្ចាស់ផ្ទះ ម្ចាស់អគារ និងរោងចក្រ សហគ្រាសនានា មានវិធានការទប់ទល់ទាន់ពេលវេលា។
ក្នុងតម្លៃ ៤៥ ដុល្លារ គ្រឿងឧបករណ៍ឈ្មោះ FireDot ដែលត្រូវបានផលិតឡើងក្រោមស្នាដៃកូនខ្មែរ ដំណើរការដោយការបញ្ចេញសំឡេងរោទ៍ប្រកាសអាសន្នឲ្យអ្នកនៅបរិវេណជុំវិញបានដឹង និងប្រើតំណភ្ជាប់ជាមួយកម្មវិធីទូរស័ព្ទសម្រាប់ការផ្ញើសារ និងហៅទូរស័ព្ទស្វ័យប្រវត្ដិទៅកាន់ម្ចាស់ផ្ទះ ឬអគារ ពេលសេនស័ររបស់វាឃើញផ្សែង និងអណ្ដាតភ្លើងកើតឡើងដោយកត្ដាណាមួយ។
លោក លីម សង្វា អគ្គនាយក ArrowDot បាននិយាយថា៖ «FireDot គឺជាឧបករណ៍មួយក្នុងចំណោមផលិតផលជាច្រើនរបស់យើងដែលជួយដោះស្រាយលើបញ្ហានានាក្នុងសង្គម ទាក់ទងនឹងគ្រោះមហន្ដរាយអគ្គិភ័យ ដូចដែលយើងបានឃើញស្ទើរតែរៀងរាល់ថ្ងៃហើយថ្មីៗនេះ វាបានកើតឡើងនៅផ្ទះប្រជាពលរដ្ឋ និងផ្សារផងដែរ»។
FireDot ដែលត្រូវបានរចនាឡើងជាប្រអប់រាងមូលប៉ុនកង្ហារប្រើថ្មពិល ពណ៌ស ដោយរំលេចនូវរូបភាពភ្លើងពណ៌ទឹកក្រូច បន្ថែមនូវសំណេរ FIREDOT ពីក្រោម មានមុខងារចម្បង ៣ យ៉ាង គឺ បញ្ចេញសំឡេងរោទ៍ ផ្ញើសារទៅកាន់ទូរស័ព្ទ និងខលទៅកាន់ទូរស័ព្ទ ដើម្បីផ្ដល់ដំណឹងទៅកាន់ម្ចាស់ផ្ទះ ឬអគារឲ្យបានដឹង និងរិះរកវិធីទប់ស្កាត់ទាន់ពេលវេលា។
អគ្គនាយកដែលសហការជាមួយដៃគូឈ្មោះ យីម ប៊ុនឆាត បានបន្ដថា៖ «វាជាឧបករណ៍បំពាក់សេនស័រ ដែលអាចឃើញផ្សែង និងភ្លើង ព្រមទាំងជូនដំណឹងជាមុនប្រាប់ម្ចាស់លំនៅឋាន អគារ ឬផ្សារតាមរយៈការខលទូរស័ព្ទ និងផ្ញើសារចូលទូរស័ព្ទស្វ័យប្រវត្ដិដើម្បីឲ្យពួកគេបានដឹងអំពីហានិភ័យមុនពេលវាស្រោចស្រង់លែងបាន»។
ជាមួយនឹងតម្រូវការនៃការកុម្ម៉ង់ពីអតិថិជន ក្រុមអភិវឌ្ឍន៍ឧបករណ៍ FireDot ដែលមានសមត្ថភាពប្រកាសអាសន្ននូវហានិភ័យពីគ្រោះអគ្គិភ័យនេះអាចផ្គត់ផ្គង់ផលិតផលបច្ចេកវិទ្យានេះក្នុងចន្លោះពី ២០ ទៅ ៣០ គ្រឿង ក្នុង ១ សប្ដាហ៍។
លោក សង្វា បានប្រាប់ ភ្នំពេញប៉ុស្ដិ៍ ថា៖ «ក្រុមការងារផលិត FireDot របស់ ArrowDot ដែលដឹកនាំដោយលោក កៅ បញ្ញា និងកញ្ញា សៀង ឧប្បុល បានចំណាយពេលសិក្សាស្រាវជ្រាវ និងអភិវឌ្ឍឧបករណ៍នេះរយៈពេល ៦ ខែ ហើយ FireDot បំពាក់ថាមពលអគ្គិសនីសាកថ្មពេលអគ្គិសនីបណ្ដាញត្រូវបានកាត់ផ្ដាច់»។
លោកបានបង្ហើបប្រាប់អំពីគម្រោងអភិវឌ្ឍន៍ FireDot ជំនាន់ថ្មីថា៖ «មុខងារបន្ទាប់របស់ឧបករណ៍ជូនដំណឹង និងប្រកាសអាសន្ន FireDot គឺសមត្ថភាពនៃការបង្ហាញទីតាំងកើតអគ្គិភ័យតាមរយៈប្រព័ន្ធ GPS និងជូនដំណឹងដល់ម្ចាស់ផ្ទះ និងនាយកដ្ឋានអគ្គិភ័យ។ ភ្ជាប់ជាមួយប្រព័ន្ធទឹកអាសន្ន ឧបករណ៍នេះនឹងឆួលបញ្ចេញទឹកស្រោចពន្លត់ភ្លើងដែលទើបឆេះ»។
ជាអ្នកអភិវឌ្ឍន៍ FireDot លោក កៅ បញ្ញា និងកញ្ញា សៀង ឧប្បុល ចង់ឲ្យម្ចាស់អចលនទ្រព្យទាំងអស់មានឱកាសការពារទ្រព្យសម្បត្ដិរបស់ខ្លួន នៅមុនពេលអ្វីៗហួសពេលអស់។
ជាមួយសំណួរដែលចោទសួរខ្លួនឯងថា តើគួរដឹងនៅពេលភ្លើងឆេះបានពាក់កណ្ដាល ឬគួរតែដឹងពេលភ្លើងទើបចាប់ផ្ដើមឆាបឆេះ? កញ្ញា សៀង ឧប្បុល បានប្រាប់ ភ្នំពេញ ប៉ុស្ដិ៍ ថា៖ «ជួនឆេះពាក់កណ្ដាលហើយ ទើបអ្នកជិតខាងខលមកប្រាប់ថា ផ្ទះយើងឆេះហើយ។ បើសិនយើងដាក់បំពាក់ឧបករណ៍ យើងអាចពន្លត់ភ្លើងទាន់ពេលវេលា ពេលវាចាប់បានកម្រិតផ្សែងប្រកាសអាសន្ន»។
ឆ្លើយនឹងចម្ងល់ដែលថា វាអាចបង្កជាសំឡេងពេលគ្រាន់តែអ្នកផ្ទះឆួលភ្លើងចង្ក្រានខ្លាំងបន្ដិច អ្នកអភិវឌ្ឍន៍ឧបករណ៍ FireDot ទាំង ២ បានប្រាប់ថា ពេលយកទៅប្រើប្រាស់ក្នុងផ្ទះបាយ ពួកគេអាចកំណត់កម្រិតជាតិផ្សែង ដែលត្រឹមផ្សែងតិចតួច វានឹងមិនស្រែករោទ៍រំខានឡើយ។ សម្រាប់ក្នុងបន្ទប់គេង ដែលជាទីតាំងមិនគួរមានផ្សែង វាគួរតែត្រូវកំណត់កម្រិត Alert ឲ្យខ្លាំងបំផុត។
វាមិនមែនអ្វីចម្លែកនោះទេ បើឧបករណ៍មូលតូចនេះ ប្រែក្លាយជារូបភាពត្រីកោណ ដោយក្រុមអ្នកអភិវឌ្ឍន៍ទាំង ២ បន្ដស្វះស្វែងរកភាពងាយ និងបន្ថែមបច្ចេកវិទ្យាឲ្យកាន់តែល្អ។
លោក កៅ បញ្ញា បានលើកឡើងថា៖ «ខ្ញុំចង់ឲ្យអ្នកប្រើប្រាស់ គាត់មានអារម្មណ៍ថា វាកាន់តែស្អាត និងឡូយ។ ដូច្នេះយើងចេះតែចង់ update វាឲ្យកាន់តែស័ក្ដិសម។ ចំពោះការភ្ជាប់ GPS និង Wi-Fi វាជាការយកលេខកូដទិន្នន័យដាក់ក្នុងអ៊ីនធឺណិត យើងនឹងឃើញទីតាំងឆេះ»។
បើទោះបីជា FireDot គួរតែត្រូវបានបំពាក់ប្រើនៅតាមផ្ទះ អគារការិយាល័យ និងរោងចក្រយ៉ាងណាក៏ដោយ ក៏អ្នកអភិវឌ្ឍន៍វ័យក្មេងដែលជានិស្សិតឆ្នាំទី ៣ ទាំង ២ បានដាក់អភិវឌ្ឍនៃការប្រើប្រាស់តាមតូបក្នុងផ្សារជាចម្បង។
កញ្ញា ឧប្បុល បានឲ្យដឹងថា៖ «ទីតាំងគួរប្រើដ៏ចាំបាច់មុនដំបូងគេ គឺផ្សារដែលមានតូបផ្ទុកសម្ភារច្រើន។ បើមានអគ្គិភ័យឆាបឆេះពីតូបណាមួយ ហើយ FireDot ក្នុងតូបនោះស្រែករោទ៍ រួចបន្ដទៅ FireDot តូបផ្សេងៗទៀត វាជំរុញឲ្យមានអន្ដរាគមន៍ទាន់ពេលវេលា»។
កញ្ញាបន្ដថា៖ «ឧបករណ៍តម្លៃ ៤៥ ដុល្លារ ពេលខ្លះវាអាចស្រោចស្រង់តូបមួយ ឬតូបជាច្រើន ឬផ្សារទាំងមូល ដោយម្ចាស់តូបបានដឹងពេលភ្លើងកំពុងចាប់ផ្ដើម ឬប្រកាសអាសន្នពីសំឡេងរោទ៍នៃតូបដទៃ ពួកគេអាចពន្លត់ ឬយ៉ាងហោចណាស់ ជម្លៀសអីវ៉ាន់ចេញទាន់ពេលវេលា»។
ដើម្បីជំរុញអភិវឌ្ឍន៍ឧស្សាហកម្ម ៤.០ ដែលរាជរដ្ឋាភិបាលកម្ពុជាកំពុងតែយកចិត្ដទុកដាក់ខ្លាំង បច្ចុប្បន្ននេះ ArrowDot បានចាប់ដៃគូមួយចំនួនក្នុងការពន្លឿនបច្ចេកវិទ្យានៅកម្ពុជា។
សហស្ថាបនិកក្រុមហ៊ុនអភិវឌ្ឍន៍បច្ចេកវិទ្យារូបនេះ បានបន្ដថា៖ «បច្ចុប្បន្នយើងបានចាប់ដៃគូជាមួយក្រុមហ៊ុនបច្ចេកវិទ្យាបរទេស រួមទាំងអង្គការនានា ដូចជា Development Innovation របស់អង្គការ USAID លើការផ្សព្វផ្សាយចំណេះដឹងផ្នែកអគ្គិសនី រ៉ូបូត និងការអភិវឌ្ឍផលិតផលសម្រាប់យុវជនខ្មែរដើម្បីអភិវឌ្ឍលើជំនាញរបស់ពួកគេចំពោះសម័យឧស្សាហកម្ម ៤.០ នេះ»។
សម្រាប់ព័ត៌មានលម្អិតអំពីអត្ថប្រយោជន៍ ការប្រើប្រាស់ និងកុម្ម៉ង់ទិញ FireDot សុំចូលទៅកាន់វេបសាយរបស់ក្រុមហ៊ុន ArrowDot តាមរយៈ http://arrowdot.io ឬទំព័រហ្វេសប៊ុក @ArrowdotTech៕