យុវជន គីមហាក់ និង យុវតី ច័ន្ទរ៉ាត់តិកា ស្ថាបនិកកង់ Tinky Bike។ រូបថត ហ៊ាន រង្សី
ភ្នំពេញ៖ យុវជន ខេមរា គីមហាក់ និងយុវតី សឿន ច័ន្ទរ៉ាត់តិកា ប្រហែលជាមានចំណូលចិត្តខុសប្លែកបន្ដិចពីយុវវ័យដទៃចំពោះទំនោរប្រើប្រាស់យានជំនិះប្រចាំថ្ងៃរបស់ពួកគេ។
.jpg)
ពួកគេមិនសប្បាយចិត្ដចំពោះការចំណាយប្រាក់ចាក់សាំង ដែលកំពុងតែបំពុលបរិស្ថានយ៉ាងខ្លាំងក្នុងរាជធានីភ្នំពេញហើយណាមួយ ពួកគេមានថវិកាតិចតួចស្ដួចស្ដើងក្នុងហោប៉ៅ និងធ្លាប់បណ្ដើរម៉ូតូជារឿយៗដោយសារម៉ូតូអស់សាំង និងខ្វះលុយចាក់សាំង។
និស្សិតផ្នែកស្ថាបត្យកម្មនៅសាកលវិទ្យាល័យភូមិន្ទវិចិត្រសិល្បៈ លោក គីមហាក់ អាយុ ២០ ឆ្នាំ និងកញ្ញា សឿន ច័ន្ទរ៉ាត់តិកា អាយុ ១៩ ឆ្នាំ មិនចង់ចំណាយប្រាក់ចាក់សាំងម៉ូតូ និងចង់ឲ្យទីក្រុងភ្នំពេញប្ដូរពីយានយន្ដប្រើប្រេងឥន្ធនៈមកជាយានអគ្គិសនីស្ទួយទាំងបរិស្ថាន និងសន្សំសំចៃ។
ខេមរា គីមហាក់ បាននិយាយថា៖ «ខ្ញុំចង់ឃើញទីក្រុងភ្នំពេញគ្មានផ្សែងយានយន្ដ»។
កង់ទីនគី «Tinky Bike» មានពណ៌ខ្មៅ កែបស្រដៀងម៉ូតូបំពាក់អាគុយនៅក្រោមកែបម៉ូទ័រនៅកង់ក្រោយ និង LED Display នៅដៃចង្កូតខាងឆ្វេង ព្រមទាំងបំពាក់ចង្កៀងមុខធំ បានចំណាយថវិកាផលិតអស់ប្រមាណ ៧០០ ដុល្លារ។
យុវជន ខេមរ៉ា គីមហាក់ ធ្វើកិច្ចការផ្សារដែក និងបំពាក់សម្ភារផ្សេងៗ។ រូបថត សហការី
អង្គុយក្នុងរោងជាងផ្ទាល់ខ្លួននៅផ្ទះរបស់យាយយុវជន គីមហាក់ បានប្រាប់ ភ្នំពេញប៉ុស្ដិ៍ ថា៖ «កង់ទីនគីអាចទ្រទម្ងន់បាន ១២៥ គីឡូក្រាម។ ថាមពលអគ្គិសនីរបស់វា ដែលមានឆ្នាំងសាក ២ ប្រភេទ ទី១ ធម្មតា សាករយៈពេល ៧ ម៉ោង និងមួយប្រភេទប្រើថិរវេលាត្រឹមតែ ២ ម៉ោងកន្លះ។ វាអាចបរក្នុងល្បឿន ៤០ គីឡូម៉ែត្រ ក្នុង ១ ម៉ោង លើចម្ងាយផ្លូវ ៦០ គីឡូម៉ែត្រសម្រាប់ការសាកអគ្គិសនីមួយលើកៗ»។
ដោយខិតខំបំពេញកិច្ចការជាច្រើន ដូចជា ការរចនាគំរូម៉ូដ ផ្សារដែក ដំឡើងសម្ភារផ្សេងៗ និងបាញ់ថ្នាំ ក៏ដូចជាការកុម្ម៉ង់គ្រឿងអគ្គិសនីមួយចំនួនពីបរទេស ខណៈដែលភារកិច្ចផ្លុំពត់ដែកត្រូវពឹងអាស្រ័យលើជាងក្នុងស្រុក។
លោក គីមហាក់ បាននិយាយថា៖ «តាមពិតរយៈពេលជិត ៣ ខែ វាយូរចំពោះការឌីហ្សាញ និងបញ្ជាទិញគ្រឿងអគ្គិសនីពីចិននោះ។ ចំពោះសាច់ពត់ ផ្សារ និងដំឡើងជាកង់ មានរយៈពេលតែ ៤ ថ្ងៃប៉ុណ្ណោះ»។
កង់ដំបូងក្នុងក្ដីស្រមៃឈ្មោះ ទីនគី «Tinky» ដែលលោក គីមហាក់ អះអាងថា មកពីពាក្យ Tinker មានន័យថា «ការផ្លាស់ប្ដូរ» ជាឈ្មោះដាក់ដោយកញ្ញា ច័ន្ទរ៉ាត់តិកា។
យុវជន ខេមរា គីមហាក់ បានបន្ថែមថា ភាគច្រើនពួកគេជិះកង់ដឹកអីវ៉ាន់ ទៅរៀន និងធ្វើការដែល ១ ថ្ងៃអត់ដល់ ៦០ គីឡូម៉ែត្រទេ ត្រឹមតែ៤០ ឬ ៥០ គីឡូម៉ែត្រ។ ពេលខ្លះ ជិះច្រើនពួកគេយកឆ្នាំងតាមខ្លួនទៅកន្លែងធ្វើការ។ លើចម្ងាយផ្លូវ ៨០ គីឡូម៉ែត្រ ទីនគី ចាយប្រាក់សម្រាប់ការសាកថ្មប្រមាណ ១ ០០០ រៀលប៉ុណ្ណោះ។
ស៊ាំនឹងទម្លាប់ជិះកង់ជិត ៣ ខែមកនេះ យុវជន និងយុវតីទាំង ២ មិនមានពាក្យត្អូញត្អែរចំពោះការលំបាកជិះកង់នោះទេ។
ប៉ុន្តែយុវជន គីមហាក់ បានលើកឡើងពីបញ្ហាខ្លះៗថា៖ «ដោយសារពេលនោះ ខ្ញុំអត់សូវបានដាក់កំហិតឲ្យជាងពត់ដែក ដែលមិនអាចធ្វើតាមការឌីហ្សាញរបស់ខ្ញុំបាន។ ខ្ញុំក៏នឹងបន្ថែមកែបឲ្យរាងវែងបន្ដិចដើម្បីកុំឲ្យអ្នកអង្គុយពិបាកទប់ខ្លួន»។
យុវតី ច័ន្ទរ៉ាត់តិកា ពេញចិត្តនឹងយានជំនិះ ដែលគិតគូរដល់បរិស្ថាន។ រូបថត ហ៊ាន រង្សី
ទីនគី ដែលបានឈ្នះពាន SmartSpark4 ជាមួយទឹកប្រាក់ ៣ ០០០ ដុល្លារ គ្រោងបង្ហាញវត្ដមាននៅតាមដងវិថីសាធារណៈជាមួយនឹងជម្រើស ៣ ប្រភេទសម្រាប់អតិថិជនដែលនិយមយានគ្មានផ្សែងបំពុល។
លោក គីមហាក់ បានឲ្យដឹងថា៖ «គម្រោងកង់ខ្ញុំចេញលក់ខាងមុខនេះ វាមានតម្លៃចាប់ពី ៥៤៩ ដុល្លារ អាចបរបានចម្ងាយ ៣០ គីឡូម៉ែត្រចំពោះការសាកថ្មម្ដង ៦៤៩ ដុល្លារ អាចជិះបាន ៤៥ គីឡូម៉ែត្រ និង ៧៤៩ ដុល្លារ អាចជិះបាន ៦០ គីឡូម៉ែត្រ»។
លោកបានបញ្ជាក់ពីជម្រើសទាំង ៣ ប្រភេទនេះថា៖ «ខុសគ្នាតែប្រភេទថ្មនោះទេ ចំពោះប្រភេទម៉ូទ័រ មុខងារផ្សេងៗ និងគ្រឿងអគ្គិសនីមានលក្ខណៈដូចគ្នាទាំងអស់។ ភាពខុសប្លែកគ្នាមួយទៀត គឺការធានា វាមានរយៈពេលធានាពី ១ ឆ្នាំ ១ ឆ្នាំកន្លះ និង ២ ឆ្នាំ»។
រីឯបញ្ហានៃការប្រកួតប្រជែងទីផ្សារ សូម្បីតែលោក គីមហាក់អះអាងថា ទោះបីជាលោកដាក់លក់កង់របស់ខ្លួនក្នុងតម្លៃដើមក៏នៅតែមិនឈ្នះឡើយ។
សហស្ថាបនិក ដែលបានផ្អាកការសិក្សាមួយរយៈដើម្បីឆ្លៀតពេលមកសម្រេចក្ដីស្រមៃផលិតកង់អគ្គិសនីដាក់លក់លើទីផ្សារក្នុងស្រុក បានប្រាប់ថា៖ «អ្វីដែលជាចំណុចពិសេសរបស់កង់នេះ គឺយើងឌីហ្សាញពីស្នាដៃខ្លួនឯង យើងធ្វើតួគឺនៅខ្មែរតែម្ដង ដោយមិនជួលសូហ្វវែរគេធ្វើឲ្យនោះទេ។ យើងធានាទៅលើថ្ម និងតួកង់មួយជីវិតរបស់វា»។
ក្ដីសង្ឃឹមមួយទៀត ដែលយុវជន និងយុវតីទាំង ២ ជឿជាក់យ៉ាងមុតមាំចំពោះលទ្ធផលនៃដំណើរការកង់អគ្គិសនីផលិតក្នុងស្រុកនោះ គឺជាគាំទ្ររបស់ប្រជាពលរដ្ឋខ្មែរលើផលិតផលខ្មែរ។
Tinky Bike ស្វាគមន៍ការកុម្ម៉ង់មុនពីអតិថិជន ដោយផ្ដល់នូវតម្លៃយ៉ាងពិសេស។ យុវជនទាំង ២ ក៏កំពុងរង់ចាំមើលលទ្ធភាពចាប់ដៃគូជាមួយក្រុមហ៊ុន ដែលមានបំណងវិនិយោគកង់អគ្គិសនីជាមួយពួកគេផងដែរ។
ព័ត៌មានលម្អិត សុំចូលទៅកាន់ទំព័រហ្វេសប៊ុក @TinkyBikeCambodia ឬលេខទូរស័ព្ទ ០៩៩ ៣៩៨ ៨៨៣៕
