គ្រឿងយន្តបម្រើស្រាបៀរជូនអតិថិជន ដើម្បីធានានូវគម្លាតសុវត្ថិភាព ពីការឆ្លងវីរុសកូរ៉ូណា។ រូបថត AFP
មិនមានបញ្ហាការចម្លងរោគ។ ជួបជាមួយរ៉ូបូតចល័ត Beer Cart ជាអ្នកជំនាញចាក់ និងបម្រើស្រាបៀរជូនភ្ញៀវ ក្នុងទីក្រុងសេវីល។
.jpg)
រ៉ូបូតត្រូវបានដាក់ឲ្យដំណើរការនៅពេលទីក្រុងភាគខាងត្បូងនេះចាប់ផ្ដើមរីករាយនឹងសេរីភាពថ្មី ខណៈអេស្ប៉ាញបន្ធូរបន្ថយការរឹតបណ្ដឹងបិទប្រទេសរយៈពេល ២ ខែ ដោយបារ៍ និងហាងកាហ្វេនានានៅពាក់កណ្ដាលប្រទេសបានអនុញ្ញាតឲ្យបើកទ្វារឡើងវិញ។
អង្គុយនៅចំកណ្ដាលបារ៍នៅ La GitanaLoca (The Crazy Gypsy) ដៃរ៉ូបូតយក្សបំពាក់ដង្កៀប ធ្វើចលនាយ៉ាងរលូនទៅចាប់យកកែងប្លាស្ទិក រួចបង្វិលទៅកាច់ស្រាបៀរជូនភ្ញៀវ។
ចាក់បំពេញស្រាបៀរបន្ដិចម្ដងៗ រហូតដល់ជិតពេញ រ៉ូបូតដាក់វានៅលើតុជូនអតិថិជន។
ជាមួយដៃដង្កៀប មនុស្សយន្តកាន់កែវប្លាស្ទិកចាក់ស្រាបៀរ មុននឹងដាក់លើតុហុចជូនអតិថិជន។ រូបថត AFP
បម្រើទាំងស្រាបៀរកែវតូចៗ ឬកែវធំ ទើបបានពីរសប្ដាហ៍ក្នុងទីក្រុងសេវីល គ្រឿងយន្ដលក់ស្រាបៀរ នេះបានទាក់ទាញចំណាប់អារម្មណ៍ទាំងអតិថិជន និងអ្នកចង់ដឹងចង់ឃើញ។
អេស្ប៉ាញបានបាត់បង់ជីវិតមនុស្សជាង ២៧០០០ នាក់ដោយសារកូរ៉ូណា និងចាត់ទុកវិធានការបន្ធូរបន្ថយបម្រាមយ៉ាងប្រុងប្រយ័ត្ន ដោយបារ៍ និងហាងកាហ្វេបើកដំណើរការខ្លះៗ និងក្រោមការឃ្លាំមើលពីបញ្ហាអនាម័យខ្ពស់។
លោក អាបេតូ ម៉ាទីណេស ម្ចាស់បារ៍ La GitanaLoca ជាកន្លែងលក់ស្រាបៀរចំណុះ ២០០ មិល្លីលីត្រ ក្នុងតម្លៃ ០,៧៥ ដុល្លារ បាននិយាយថាលោកបានទិញរ៉ូបូតមុនពេលផ្ទុះជំងឺរាតត្បាត ដោយរំពឹងថា កម្លាំងគ្រឿងយន្ដជួយបង្កើនការលក់។
អតិថិជនបង្ហើបម៉ាស ក្រេបស្រាបៀរត្រជាក់ ដែលបម្រើជូនដោយរ៉ូបូត។ រូបថត AFP
ប៉ុន្ដែដោយសារវិបត្ដិ វាមិនត្រូវបានដាក់ឲ្យប្រើប្រាស់ឡើយ ថ្វីដ្បិតតែលោកបានដឹងថា វាពិតជាល្អឥតខ្ចោះក្នុងបរិបទថ្មី ដោយមនុស្សត្រូវការរក្សាគម្លាតសុវត្ថិភាព។
លោកបានប្រាប់ទីភ្នាក់ងារ AFP ថា៖ «យើងគិតថា វាជាជម្រើសដ៏ល្អសម្រាប់ការបើកទ្វារជាថ្មីក្នុងដំណាក់កាលទី ១។ បំណងមិនឲ្យមានការទាក់ទងគ្នាផ្ទាល់រវាងមនុស្ស និងវត្ថុផ្សេងៗ (ក្នុងបារ៍) យើងបានដឹងថា រ៉ូបូតពិតជាស័ក្ដិសមក្នុងការកាន់កែវប្លាស្ទិកលើកស្រាបៀរឲ្យភ្ញៀវ។ ដូច្នេះ វាជាប្រភេទសេវាកម្មបម្រើដោយខ្លួនឯង»។
យ៉ាងណាមិញ បារ៍នេះមិនបានរកចំណូលអ្វីឡើយ ដោយអតិថិជនតែ ១២ នាក់ត្រូវបានអនុញ្ញាតឲ្យចូលបរិវេណបារ៍ម្ដង។
លោកបាននិយាយថា៖ «ពេលនេះ វាមិនចំណេញក្នុងការបើកលក់ដោយដាក់តែប៉ុន្មានកៅអីឡើយ។ តែជាអ្វីដែលយើងត្រូវធ្វើការប្រកួតប្រជែងជាមួយបារ៍ដទៃ ដែលយើងត្រូវមានគំនិតច្នៃប្រឌិតប្លែកៗ»។
បារ៍នេះមិនទទួលបានប្រាក់ចំណេញឡើយ ដោយអតិថិជនត្រឹមតែជាង ១០ នាក់ត្រូវបានអនុញ្ញាតឲ្យចូលទិញស្រាបៀរពីរ៉ូបូត។ រូបថត AFP
លោកបានបញ្ជាក់ថា៖ «ដូច្នេះ ជាមួយវត្ដមានរ៉ូបូត មនុស្សអាចមើលឃើញថា បារ៍នៅជ្រុងផ្លូវនេះបើកដំណើរការ ហើយយើងធ្វើអ្វីឲ្យខុសប្លែកពីអ្នកដទៃ»។
ប៉ុន្ដែមិនគ្រប់គ្នាពេញចិត្ដនឹងសេវាបម្រើស្រាបៀរដោយគ្រឿងយន្តនោះទេ។
មេធាវី ម៉ានូអែល ហ្វើណាន់ដេស អាយុ ៣៣ ឆ្នាំ បាននិយាយថា៖ «ខ្ញុំគិតថា ទំនាក់ទំនងរវាងអតិថិជន និងអ្នកលក់ស្រាបៀរ វាសំខាន់។ មនុស្សដែលបម្រើភេសជ្ជៈ តែប្រើក្រសែភ្នែកទំនាក់ទំនង ហើយពេលកាច់ស្រាបៀរ ពួកគេសម្លឹងមើលស្រាបៀរហូរចូលកែវយ៉ាងផ្ចិតផ្ចង់។ នេះជាអ្វីដែលរ៉ូបូតមិនអាចធ្វើបាន ដូចមនុស្ស»។
លោកបន្ដថា៖ «ខ្ញុំមិនសូវចូលចិត្ដម៉ាស៊ីននេះឡើយ។ ខ្ញុំជ្រើសរើស អ្នកបម្រើលក់ស្រាបៀរឲ្យខ្ញុំទៅតាមធម្មជាតិមនុស្ស មិនមែនជាគ្រឿងយន្តឥតវិញ្ញាណនោះទេ»៕ AFP/HR
អតិថិជនខ្លះក៏មិនពេញចិត្តនឹងការដាក់រ៉ូបូតឥតវិញ្ញាណនៅក្នុងបារ៍ដែរ ព្រោះពួកគេជ្រើសរើសការផ្ដល់សេវាយ៉ាងរស់រវើកពីបុគ្គលិកជាមនុស្ស។ រូបថត AFP
