ក្រុងកាប៊ុល៖ រ៉ូបូតរត់តុដំបូងបំផុតរបស់អាហ្វហ្គានីស្ថានបានធ្វើឲ្យអ្នកអង្គុយតុអាហារកណ្ដាលក្រុងកាប៊ុលមានការងឿងឆ្ងល់ និងបានលើកដំឡូងបារាំងបំពងដល់តុរបស់ពួកគេ។
រ៉ូបូតបាននិយាយជាភាសា ដារី ជាភាសាផ្លូវការមួយក្នុងចំណោម ២ របស់អាហ្វហ្គានីស្ថានថា៖ «អរគុណខ្លាំងណាស់»។
អ្នកគ្រប់គ្រងភោជនីយដ្ឋាន មូហាមេដ រ៉ាហ្វី សៀហ្សាដ បាននិយាយថា រ៉ូបូតដែលនាំចូលពីជប៉ុន និងត្រូវបានឌីហ្សាញឡើងស្រដៀងនឹងមនុស្សស្រីរុំកន្សែងហ៊ីចាប បានទាក់ទាញអតិថិជនថ្មីៗតាំងពីបានដាក់ដំណើរការ អ្នករត់តុថ្មីនេះកាលពីខែមុន។
លោកបាននិយាយថា៖ «វាគួរឲ្យចាប់អារម្មណ៍ចំពោះមនុស្សជាច្រើនដែលចង់ឃើញរ៉ូបូតមែនទែន។ ជួនកាល ក្មេងៗមករំខានការផ្ដល់សេវាកម្ម និងមានការភ្ញាក់ផ្អើលពេលបានឃើញរ៉ូបូតលើកម្ហូបមកឲ្យ»។
កុមារាអាយុ ៩ ឆ្នាំ អាមេដ ហ្សាគី ចង់ឃើញរ៉ូបូតយ៉ាងខ្លាំង។
ហ្សាគី បាននិយាយថា៖ «ខ្ញុំបានឃើញរ៉ូបូតតាមកញ្ចក់ទូរទស្សន៍ និងបានសុំឪពុកនាំទៅកាន់ភោជនីយដ្ឋាននោះ»។
ឈ្មោះ «ទីមៀ» និងមានកម្ពស់ ១,៥០ ម៉ែត្រ រ៉ូបូតចេះបំពេញការងារងាយៗ ដូចជាលើកម្ហូប និងនិយាយពាក្យពេចន៍សាមញ្ញៗថា «រីករាយថ្ងៃកំណើត» ជាដើម។ វាក៏អាចឈប់នៅពេលមានឧបសគ្គចំពោះមុខ ហើយអតិថិនជនអាចកុម្ម៉ង់តាមរយៈបន្ទះថាច់ស្គ្រីនរបស់វា។
ប៉ុន្ដែរ៉ូបូតរត់តុនេះក៏មិនសុទ្ធតែធ្វើឲ្យមនុស្សគ្រប់រូបពេញចិត្ដនោះទេ។
ពលរដ្ឋអាហ្វហ្គានីស្ថានមួយចំនួនចាត់ទុក «ទីមៀ» ថាដណ្ដើមការងាររបស់ពលរដ្ឋអាហ្វហ្គានីស្ថាន ដោយសរសេរថា៖ «ពួកគេបានជួលរ៉ូបូតនៅពេលមនុស្សរាប់លាននាក់កំពុងស្វែងរកការងារធ្វើ»៕ AFP/HR