Sabai Code បង្រៀនមុខវិជ្ជាសរសេរកូដ និងដំឡើងរ៉ូបូតដល់កុមារចាប់ពី ៧ឆ្នាំ តាមកម្មវិធីច្នៃតម្រូវសិស្សក្នុងស្រុក។ រូបថត ហ៊ាន រង្សី
ភ្នំពេញ៖ មិនខុសពីសាលាដទៃ Sabai Code ដែលទើបចាប់បដិសន្ធិកាលពីពាក់កណ្ដាលឆ្នាំមុន ក៏បានបើកបង្រៀនកុមារអាយុចាប់ពី ៧ ឆ្នាំនូវមុខវិជ្ជាសរសេរកូដ និងដំឡើងរ៉ូបូតផងដែរ។ ប៉ុន្ដែអ្វីដែលខុសប្លែកនោះ គឺទាំងកម្មវិធីសិក្សាដែលត្រូវបានកែច្នៃខ្លួនឯងឲ្យសមស្របទៅតាមសិស្សនៅកម្ពុជា ក៏ដូចជាការបណ្ដុះបណ្ដាលគ្រូ ដែលមានមូលដ្ឋានគ្រឹះជាអ្នកសរសេរ Programme ស្រាប់។
.jpg)
លោក សោម សារឿន ជាសហស្ថាបនិក Sabai Code បានប្រាប់ ភ្នំពេញ ប៉ុស្ដិ៍ ថា៖ «យើងមិនបានទិញអាជ្ញាប័ណ្ណចំពោះមេរៀនសរសេរកូដនេះនោះទេ។ ខ្ញុំបានយកមេរៀនឥតគិតថ្លៃពី code.org របស់អាមេរិកជាអង្គការធំដែលសរសេរកម្មវិធីសិក្សាសម្រាប់ចុះផ្សាយជុំវិញពិភពលោក។ យើងយកវាមកកែច្នៃទៅជាកម្មវិធីបែបសិស្សនៅកម្ពុជា ហើយយើងមិនយកគ្រូបរទេសមកបង្រៀននោះទេ។
បន្ទប់រៀនដ៏ធំទូលាយតុបតែងដោយទូទុកដាក់ឧបករណ៍សិក្សា ដូចជារ៉ូបូតកូនបាល់ រ៉ូបូតឡាន និងគ្រឿងបន្លាស់ផ្សេងៗ ក្រដាសស្កុតបិទលើកម្រាលឥដ្ឋជារូបចតុកោណកែង និងរាងអក្សរ «N» ខណៈតុសិក្សាត្រូវបានរៀបចំសម្រាប់សិស្សប្រមាណ ១០ នាក់ ជាមួយគ្រូបង្រៀន ២ នាក់។
ចង្អុលទៅកាន់មេរៀនដែលគ្រូកំពុងបង្រៀនសិស្សអំពីរបៀបបង្កើតវីដេអូហ្គេម លោក សារឿន បានឲ្យដឹងថា៖ «យើងច្នៃមេរៀនខ្លួនឯង យើងសម្របទៅតាមស្ថានភាពសិស្សរបស់ស្រុកយើង។ ខ្ញុំធ្លាប់ជា IT ពីដើមមក ហើយខ្ញុំធ្វើក៏ជាគ្រូបង្រៀនទៀត អ៊ីចឹង ខ្ញុំដឹងថា ការកែច្នៃដូចម្ដេចឲ្យស័ក្ដិសមទៅតាមស្ថានភាពក្មេងស្រុកយើង»។
Sabai Code ចាប់កំណើតឡើងនៅពេលអ្នកឯកទេសខាងហិរញ្ញវត្ថុបានជួបអ្នកព័ត៌មានវិទ្យាក្នុងបំណងស្វែងរកប្រាក់ចំណេញផង និងជួយដល់កិច្ចការសង្គមតាមរយៈការបណ្ដុះបណ្ដាលជំនាញវិទ្យាសាស្ដ្រកុំព្យូទ័រ និងបច្ចេកវិទ្យាជំនាន់ថ្មីផងដែរ។
លោក សោម សារឿន និងលោក ឡេង ពិសិដ្ឋ ជាអតីតមិត្ដរួមថ្នាក់ផ្នែកគណិតវិទ្យានៅសាកលវិទ្យាល័យភូមិន្ទភ្នំពេញជាមួយគ្នា មានគោលបំណងរួមមួយថា៖ «យើងចង់ឲ្យកុមារកម្ពុជាចាប់ផ្ដើមស្រឡាញ់មុខវិជ្ជាទាំងនេះតាំងពីកុមារភាព។ ដូច្នេះ យើងត្រូវកែច្នៃមេរៀន ដើម្បីផ្ដល់ភាពសប្បាយរីករាយសម្រាប់ក្មេងៗ។ យើងរំពឹងថា កុមារកាន់តែច្រើនទៀតត្រូវបានលើកទឹកចិត្ដឲ្យកសាង បង្កើត និងកែច្នៃរបស់អ្វីថ្មីៗ និងនាំកម្ពុជាអភិវឌ្ឍបន្ថែមទៀត»។
Sabai Code ដែលទើបចាប់ផ្ដើមដំណើរការនៅដើមឆ្នាំ ២០២០ ជាមួយសិស្ស ១ ថ្នាក់រៀននៅថ្ងៃអាទិត្យ ជាឈ្មោះសាលាលើកទឹកចិត្ដកុំឲ្យអ្នកសិក្សាបារម្ភពីការលំបាកចំពោះមុខវិជ្ជាត្រូវរៀន ពីព្រោះសិស្ស និស្សិតខ្មែរតែងតែមានការបារម្ភចំពោះការសិក្សាគណិតវិទ្យា និងរូបវិទ្យា ពេលពួកគេចាប់យកជំនាញព័ត៌មានវិទ្យា ជាពិសេស Programming។
លោក សោម សារឿន អាយុ ៤៥ ឆ្នាំ ដែលបញ្ចប់ការសិក្សាផ្នែកព័ត៌មានវិទ្យាក្នុងឆ្នាំ ២០០៤ នៅសាកលវិទ្យាល័យភូមិន្ទភ្នំពេញបានឲ្យដឹងថា៖ «ការសរសេរ Programme វាមិនលំបាកនោះទេ។ វាជាការដោះស្រាយបញ្ហា។ ក្មេងក៏អាចដោះស្រាយបញ្ហាបាន ហើយចាស់ក៏អាចដោះស្រាយបញ្ហាបាន។
ភ្នែករំពៃមើលសកម្មភាពចលនាគំនូរជីវចលនៅផ្នែកខាងឆ្វេងនៃកុំព្យូទ័រ ខណៈដៃម្ខាងទៀតអូសទាញអក្សរពណ៌ស្រស់ឆើតនៅផ្នែកខាងស្ដាំ កុមារី ជាចាន់ រតនា រៀនថ្នាក់ទី ៧ នៅសាលាប៊ែលធីកំពុងរៀនបង្កើតវីដេអូហ្គេម Mindcraft នៅ Sabai Code។
យុវតីអាយុ ១៣ ឆ្នាំរូបនេះបាននិយាយថា៖ «វាមិនស្មុគស្មាញនោះទេ និងរៀនឆាប់យល់ ដោយសារវាមានភាពងាយស្រួលច្រើន ដែលគ្រូបង្រៀនបានបែងចែកពណ៌អក្សរកូដ។ សិក្សាមេរៀននេះពិតជាគួរឲ្យចាប់អារម្មណ៍ណាស់»។
ការបង្រៀនត្រូវបានកែច្នៃ ដើម្បីផ្ដល់ភាពសប្បាយរីករាយសម្រាប់កុមារ។ រូបថត ហ៊ាន រង្សី
ខុសពីមនុស្សពេញវ័យដែលចាប់ផ្ដើមការសរសេរកូដបែបតួអក្សរសខ្មៅតូចៗ ក្មេងមានភាពទាក់ទាញចំពោះពុម្ពអក្សរកូដរចនាម៉ូដចម្រុះពណ៌។
លោក សារឿន ដែលបានបញ្ចប់ការសិក្សាគណិតវិទ្យាក្នុងឆ្នាំ ២០០៣ ផងនោះ បានបន្ដថា៖ «យើងបង្កើតភាពងាយស្រួល ដើម្បីឲ្យពួកគាត់ ឆាប់ចាប់បាន និងទាក់ទាញចំណាប់អារម្មណ៍ចង់រៀនសូត្រ។ ប៉ុន្ដែវាអនុលោមទៅតាមសំណង់រចនាសម្ព័ន្ធកូដដូចគ្នា។
លោកលើកឡើងថា៖ «លទ្ធភាពរៀនពីកុមារភាពបានផ្ដល់ភាពងាយស្រួលដល់ពួកគេនាពេលអនាគត។ បើចង់ក្លាយជាម្ចាស់អាជីវកម្មខ្លួនឯងមួយពិតជាស្រួល ជាមួយគំនិតបង្កើតកម្មវិធី (App) តូចមួយ។ គាត់អាចចាប់ផ្ដើមពី start-up តូចមួយ សហគ្រិនវ័យក្មេងនឹងដុះឡើង ដោយអាយុត្រឹម ១៨ ឬ ១៩ ឆ្នាំ ពួកគាត់អាចក្លាយជាម្ចាស់អាជីវកម្មខ្លួនឯង»។
លោកនិយាយថា គ្រូៗនៅទីនេះ ក៏មានទឹកចិត្ដបែបនេះដែរ ពីព្រោះតាមពិតទៅពួកគាត់អត់ទទួលបានប្រាក់ខែច្រើនទេ តែគាត់មានចិត្ដចង់បន្ដចំណេះដឹងដល់ក្មេងៗ។
លោក សេរី ឈុនហេង អាយុ ២១ ឆ្នាំ ជានិស្សិតផ្នែកព័ត៌មានវិទ្យាពីសាលាតិចណូ ឆ្នាំទី ៤ យល់ថា ការរៀនសរសេរកូដពីក្មេង ប្រសើរជាងការចាប់ផ្ដើមរៀននៅអាយុច្រើន។
អតីតគ្រូបង្រៀនភាសាអង់គ្លេសមកពីស្រុកស្អាងរូបនេះបន្តថា៖ «ក្មេងៗងាយឆាប់ចាប់បាននូវមេរៀន និងមិនងាយភ្លេចវិញឡើយ។ បើរៀនចប់ពីនេះទៅ រយៈពេល ៣ ឆ្នាំ ពួកគាត់អាចបង្កើតកម្មវិធីទូរស័ព្ទ ឬជាហ្គេមអ្វីមួយបាន»។
១ វគ្គសិក្សា តម្លៃ ១៥០ ដុល្លារ មានរយៈពេល ៦ សប្ដាហ៍ និង ១ សប្ដាហ៍ ដែលសិក្សានៅចុងសប្ដាហ៍ មានរយៈពេល ៣ ម៉ោង៕
