ការចំណាយរបស់រដ្ឋាភិបាលលើវិស័យអប់រំបានកើនឡើងជាលំដាប់។ រូបថត សហការី
ដោយមានការគាំទ្រពីអង្គការអប់រំ វិទ្យាសាស្ត្រ និងវប្បធម៌នៃអង្គការសហប្រជាជាតិ (UNESCO) និងអង្គការក្រៅរដ្ឋាភិបាលផ្សេងៗ ប្រទេសកម្ពុជាកំពុងធ្វើដំណើរឆ្ពោះទៅរកការចុះឈ្មោះចូលរៀនរបស់កុមារនៅថ្នាក់បឋមសិក្សាឲ្យកើនដល់ ១០០ ភាគរយ។
.jpg)
ការចំណាយរបស់រដ្ឋាភិបាលទៅលើវិស័យអប់រំបានកើនឡើងយ៉ាងខ្លាំងនៅក្នុងរយៈពេលប៉ុន្មានឆ្នាំចុងក្រោយនេះ។ សាលារៀនថ្មីរាប់រយខ្នងត្រូវបានសាងសង់ ហើយអត្រាអក្ខរកម្មបានកើនឡើង។ ប៉ុន្តែទោះបីផ្នែកមួយចំនួននៃវិស័យអប់រំមានភាពរីកចម្រើនក្តីក៏បញ្ហាប្រឈមមួយចំនួននៅតែមាន។ មានការងារជាច្រើនទៀតដែលត្រូវធ្វើ ដើម្បីបង្កើនអត្រាសិស្សឲ្យរៀនចប់អនុវិទ្យាល័យ និងដោះស្រាយបញ្ហានៃការបោះបង់ចោលការសិក្សា។
រាជរដ្ឋាភិបាលកំពុងតែខិតខំប្រឹងប្រែងដើម្បីឱ្យកុមារកម្ពុជាទទួលបានការអប់រំយ៉ាងតិចត្រឹមថ្នាក់ទី ៩ ដូចដែលបានចែងនៅក្នុងរដ្ឋធម្មនុញ្ញ។ តាមបច្ចេកទេស កុមារម្នាក់អាចបញ្ចប់ការសិក្សារយៈពេល ១២ ឆ្នាំក្នុងនោះរួមមាន ៦ ឆ្នាំនៅកម្រិតបឋមសិក្សា (ចាប់ពីថ្នាក់ទី ១ ដល់ទី ៦) ៣ ឆ្នាំនៅកម្រិតអនុវិទ្យាល័យ (ចាប់ពីថ្នាក់ទី ៧ ដល់ទី ៩) និង ៣ ឆ្នាំសម្រាប់កម្រិតវិទ្យាល័យ (ចាប់ពីថ្នាក់ទី ១០ ដល់ទី ១២) ។
អត្រាចុះឈ្មោះចូលរៀនសម្រាប់ឆ្នាំសិក្សា ២០១៦-២០១៧ មានចំនួន ៩៣,៥ ភាគរយសម្រាប់បឋមសិក្សា និង ៥៥,៧ ភាគរយសម្រាប់អនុវិទ្យាល័យ និង ២៥,១ ភាគរយនៅវិទ្យាល័យ។ នៅក្នុងរបាយការណ៍របស់អង្គការ Save the Children ដែលចេញផ្សាយកាលពីខែឧសភា ឆ្នាំ ២០១៩ បានឲ្យដឹងថាភាគរយនៃកុមារក្រៅសាលាបឋមសិក្សា និងអនុវិទ្យាល័យនៅតែខ្ពស់គឺមានចំនួន ២២,៥ ភាគរយ។
ស្ថិតិដែលចេញផ្សាយដោយរដ្ឋាភិបាលបានបង្ហាញថាជារៀងរាល់ឆ្នាំនៅថ្នាក់បឋមសិក្សាមានសិស្ស ៦,៦ ភាគរយ រៀនត្រួតថ្នាក់ និងសិស្ស ៤,៦ ភាគរយបោះបង់ការសិក្សា។ ចំពោះកម្រិតអនុវិទ្យាល័យវិញមានសិស្សចំនួន ២,៨ ភាគរយរៀនត្រួតថ្នាក់ជារៀងរាល់ឆ្នាំ និង ១៩,៤ ភាគរយបោះបង់ការសិក្សា។
អត្រាសិស្សបញ្ចប់ការសិក្សាបានធ្លាក់ចុះជាបន្តបន្ទាប់ ក្រោយកម្រិតបឋមសិក្សាចាប់ពី ៧៩,៩ ភាគរយនៅកម្រិតបឋមសិក្សា ៤២,៦ ភាគរយនៅកម្រិតអនុវិទ្យាល័យ និង ២០,២ ភាគរយនៅកម្រិតវិទ្យាល័យ។
នៅទូទាំងប្រទេសភាគរយនៃការបញ្ចប់ការសិក្សានៅបឋមសិក្សារបស់កុមារីខ្ពស់ជាងកុមារាពោលគឺ ៨៣,២ ភាគរយធៀបនឹង ៧៦,១ ភាគរយ។ ភាពខុសគ្នានៃអត្រានៃបញ្ចប់ការសិក្សាតាមយេនឌ័រនេះក៏មានភាពខុសគ្នានៅអនុវិទ្យាល័យ និងកម្រិតវិទ្យាល័យដែរ។
រដ្ឋាភិបាល និងធនាគារពិភពលោកកាលពីពេលថ្មីៗបានចុះហត្ថលេខាលើកិច្ចព្រមព្រៀងលើគម្រោងកែលម្អការអប់រំឧត្តមសិក្សា (HEICP)។ តាមរយៈគម្រោងដែលមានទឹកប្រាក់ ៩០ លានដុល្លារនេះ ធនាគារពិភពលោកនឹងគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការលើកកម្ពស់គុណភាពអប់រំឧត្តមសិក្សា និងគុណភាពនៃការស្រាវជ្រាវនៅកម្ពុជា និងពង្រីកឲ្យកាន់តែទូលាយនូវលទ្ធភាពទទួលបានការអប់រំឧត្តមសិក្សាសម្រាប់សិស្សក្រីក្រ។
គម្រោងដែលមានរយៈពេល ៦ ឆ្នាំនេះនឹងផ្តោតទៅលើការកែលម្អមុខវិជ្ជា វិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា ក៏ដូចជាកម្មវិធីសិក្សាផ្នែកកសិកម្មផងដែរ។ ក្នុងគោលបំណងផ្តល់ឱ្យនិស្សិតកម្ពុជានូវជំនាញដែលពាក់ព័ន្ធ និងអាចផ្ទេរបានដែលអាចជួយដល់ការធ្វើអន្តរកម្មពីបែបផែនសេដ្ឋកិច្ចអតិពលកម្មឱ្យក្លាយទៅជាសេដ្ឋកិច្ចមួយដែលជំរុញដោយចំណេះដឹងជំនាញ។
សកម្មភាពចម្បងៗទាំង ៥ របស់គម្រោងនេះរួមមានការផ្តល់មូលនិធិសម្រាប់ការស្រាវជ្រាវនៅតាមផ្នែកមុខវិជ្ជាអាទិភាព ការបង្កើនចំនួនថ្នាក់រៀន និងមន្ទីរពិសោធន៍ ការសង់សយនដ្ឋានសម្រាប់និស្សិតក្រីក្រស្នាក់នៅ ការពង្រឹងប្រព័ន្ធធានាគុណភាព និងព័ត៌មាន និងការសហការជាមួយដៃគូអន្តរជាតិដើម្បីកែលម្អកម្មវិធីសិក្សា និង វិធីសាស្ត្របង្រៀនលើមុខវិជ្ជាអាទិភាព។ គម្រោងនេះទទួលបានហិរញ្ញប្បទានតាមរយៈឥណទានពីសមាគមអភិវឌ្ឍន៍អន្តរជាតិ ដែលជាមូលនិធិរបស់ធនាគារពិភពលោកសម្រាប់ប្រទេសក្រីក្រជាងគេបំផុត៕
