ចាប់តាំងពីឆ្នាំ ២០១៥ មកស្ថានទូតអង់គ្លេសប្រចាំកម្ពុជា និងក្រសួងអប់រំ យុវជន និងកីឡាកម្ពុជា (MOEYS) បានចូលរួមយ៉ាងសកម្មក្នុងការជំរុញទំនាក់ទំនងឲ្យកាន់តែរឹងមាំ។ ស្ថានទូតអង់គ្លេសកំពុងខិតខំប្រឹងប្រែងដើម្បីជំរុញគម្រោងប្រកបដោយភាពច្នៃប្រឌិតនៅជុំវិញប្រធានបទ និងកម្មវិធីសិក្សា STEM ហើយស្ថានទូតអង់គ្លេសនៅតែជាជម្រើសដៃគូដ៏សំខាន់របស់កម្ពុជានៅពេលនិយាយដល់កម្មវិធីសិក្សា STEM ។
ទម្រង់ និងការយល់ដឹងអំពីការសិក្សាលើជំនាញ STEM ត្រូវបានលើកកម្ពស់និងផ្សព្វផ្សាយយ៉ាងសកម្មនៅទូទាំងប្រទេសកម្ពុជា ដោយសារតែមានកិច្ចខិតខំប្រឹងប្រែងពីក្រសួងអប់រំយុវជន និងកីឡា និងស្ថានទូតអង់គ្លេសប្រចាំកម្ពុជា។
ទាំង ២ ភាគីបានរួមគ្នាជួយបង្កើនចំនួនសិស្សានុសិស្សនៅក្នុងព្រះរាជាណាចក្រកម្ពុជាឲ្យសិក្សាលើជំនាញ STEM ទាំងនៅសាលាចំណេះដឹងទូទៅ និងនៅឯសាកលវិទ្យាល័យឲ្យកើនឡើង។ សិស្ស និងឪពុកម្តាយពួកគេត្រូវបានពន្យល់ប្រាប់អំពីអត្ថប្រយោជន៍នៃការសិក្សាមុខវិជ្ជា STEM នេះនិងបង្ហាញពួកគេអំពីឱកាសការងារដ៏ល្អនៅពេលពួកគេបញ្ចប់ការសិក្សាលើជំនាញ STEM ហើយស្ថានទូតអង់គ្លេសកំពុងសម្លឹងមើលទៅពេលអនាគតជាមួយក្រសួងអប់រំដើម្បីរក្សានូវជំនាញទាំងនេះដែលជាតម្រូវការចាំបាច់បំផុតសម្រាប់អនាគតប្រទេសកម្ពុជា។
ឧទាហរណ៍ប្រភេទនៃការផ្តួចផ្តើមដែលក្រសួងអប់រំ និងស្ថានទូតអង់គ្លេសបានធ្វើយ៉ាងសកម្មនៅក្នុងការសម្របសម្រួលជាមួយភាគីពាក់ព័ន្ធផ្សេងទៀតគឺរួមមានទាំងគម្រោង STEM Roadshow Bus ផងដែរ។
គម្រោងនេះគឺប្រើប្រាស់រថយន្ដធ្វើដំណើរទៅទូទាំងប្រទេសកម្ពុជាដើម្បីបង្ហាញសិស្សានុសិស្សឲ្យមានការយល់ដឹង និងអនុវត្តជាក់ស្តែងលើមុខវិជ្ជា STEM ។ លើកកម្ពស់ការយល់ដឹង និងបង្កើតសកម្មភាពសប្បាយរីករាយដល់សិស្សគឺជាកិច្ចខិតខំប្រឹងប្រែងមួយដើម្បីលើកកម្ពស់មុខវិជ្ជា STEM ហើយរថយន្ត STEM Bus បានផ្សព្វផ្សាយទៅដល់សិស្សានុសិស្សតាមសាលារៀនផ្សេងៗនៅទូទាំងប្រទេសកម្ពុជា។ ការផ្សព្វផ្សាយនេះត្រូវបានធ្វើឡើងយ៉ាងពិសេសដើម្បីឱ្យសិស្សទទួលបាននូវភាពសប្បាយរីករាយ និងធ្វើឲ្យពួកគេចង់ចេះចង់ដឹងមុខវិជ្ជា STEM ដោយមានការចូលរួមរៀនជាក្រុមជាពិសេសគឺមានការប្រាស្រ័យទាក់ទងរវាងសិស្ស គ្រូ និងឪពុកម្តាយរបស់ពួកគេផ្ទាល់។
សៀវភៅមគ្គុទ្ទេសក៍អាជីពការងារ STEM Career Guide Book គឺជាគំនិតផ្តួចផ្តើមរួមមួយទៀតហើយវាក៏ជាប្រភេទសៀវភៅដំបូងនៅក្នុងប្រទេសកម្ពុជាដែរ។ សៀវភៅមគ្គុទ្ទេសក៍នេះត្រូវបានបង្កើតឡើងក្នុងគោលបំណងបង្ហាញដល់យុវជនកម្ពុជាអំពីឱកាសការងារសំខាន់ៗ និងថ្មីៗក្នុងវិស័យ STEM ដែលពួកគេប្រហែលជាមិនធ្លាប់ឮក៏ដូចជាលើកទឹកចិត្តឱ្យពួកគេចាប់យកមុខវិជ្ជា STEM នៅថ្ងៃអនាគត ។
សៀវភៅនេះជួយបំផុសគំនិតរបស់សិស្សានុសិស្សកម្ពុជាក្មេងៗ និងណែនាំពួកគេឲ្យសិក្សាជំនាញមួយដែលពួកគេអាចមិនធ្លាប់បានឭពីមុន និងបង្ហាញផ្លូវដល់ពួកគេថា គួរជ្រើសរើសយកជំនាញវិជ្ជាជីវៈអ្វី។ ទាក់ទងទៅនឹងព័ត៌មានជាក់ស្តែងសៀវភៅមគ្គុទ្ទេសក៍អាជីពការងារ STEM Career Guide Book នេះគឺផ្តល់អត្ថប្រយោជន៍ និងគុណតម្លៃខ្លាំងណាស់ដល់សិស្សានុសិស្សនៅក្នុងព្រះរាជាណាចក្រកម្ពុជា។
សៀវភៅនេះនឹងជួយពួកគេឱ្យយល់អំពីតម្រូវការនានាទាក់ទងទៅនឹងជំនាញវិជ្ជាជីវៈហើយវាក៏ជួយពួកគេឱ្យយល់ដឹងអំពីឱកាសដែលមាននៅក្នុងប្រទេសកម្ពុជា និងនៅបរទេសតាមរយៈការសិក្សាលើមុខវិជ្ជា STEM នេះដែរ។
វាជាកិច្ចខិតខំប្រឹងប្រែងមួយដោយសម្លឹងមើលទៅអនាគត និងដើម្បីជួយជំរុញឲ្យយុវជនក្មេងៗ និងស្ត្រីចាប់យកការសិក្សាជំនាញ STEM ដើម្បីអាចបម្រើការងារនៅក្នុងវិស័យ STEM បាន។ ជាមួយគ្នានេះដែរសៀវភៅ Sky Pods សម្រាប់កុមារក៏ត្រូវបានចងក្រង និងផ្សព្វផ្សាយផងដែរ។ សៀវភៅនេះគឺជាស្នាដៃនិពន្ធរបស់លោកស្រីបណ្ឌិត Bryony Mathew អតីតអនុប្រធានបេសកកម្មការទូតអង់គ្លេសប្រចាំកម្ពុជា។ សៀវទៅនេះត្រូវបានបង្កើតឡើងក្នុងគោលបំណងទាក់ទាញកុមារតូចៗនៅកម្ពុជាអោយផ្តើមមានចំណាប់អារម្មណ៍លើផ្នែកវិស្វកម្ម ហើយសៀវភៅនេះមានទាំងភាសាអង់គ្លេស និងភាសាខ្មែរ។
បច្ចុប្បន្នស្ថានទូតអង់គ្លេសនៅព្រះរាជាណាចក្រកម្ពុជាកំពុងផ្តោតលើយុទ្ធនាការអប់រំដើម្បីលើកកម្ពស់បច្ចេកទេស និងការបណ្តុះបណ្តាលវិជ្ជាជីវៈនៅកម្ពុជាដោយបានសហការជាមួយក្រសួងអប់រំ យុវជន និងកីឡាដើម្បីបម្រើដល់សង្គមជាតិនាពេលអនាគត៕