ប្រទេសកម្ពុជា នៅតែជាទីកន្លែងដ៏ល្អសម្រាប់វិនិយោគិនហុងកុងក្នុងរយៈពេល ២០ ឆ្នាំកន្លងមកនេះ។ ប្រទេសកម្ពុជា មានលក្ខណៈចម្រុះមានភាពជិតស្និទ្ធ ងាយស្រួលក្នុងការធ្វើពាណិជ្ជកម្មឱកាសអាជីវកម្មសេដ្ឋកិច្ចដែលមានដុល្លារូបនីយកម្មកម្លាំងពលកម្មគ្រប់គ្រាន់ និងធនធានគឺជាកត្តាទាក់ទាញវិនិយោគិនបរទេសបានយ៉ាងងាយស្រួល។
នាយកប្រតិបត្តិសមាគមពាណិជ្ជកម្មហុងកុងនៅកម្ពុជាលោក Larry Shuen Fai Ng បានឲ្យភ្នំពេញប៉ុស្តិ៍ដឹងថា៖ «ហេតុផលមួយដែលពួកគេ (វិនិយោគិនហុងកុង) ចង់មកប្រទេសកម្ពុជាគឺដោយសារតែសេដ្ឋកិច្ចដែលមានដុល្លារូបនីយកម្ម គ្មានការគ្រប់គ្រងរូបិយប័ណ្ណបរទេស។ ទាំងនេះគឺពិតជាមានសារៈសំខាន់សម្រាប់ពួកគេពីព្រោះនៅហុងកុងមានអាជីវកម្មជាច្រើនក៏ប្រើប្រាស់ប្រាក់ដុល្លារអាមេរិកដែរ។
«ហេតុផលទី ២ គឺរដ្ឋាភិបាលបានស្វាគមន៍ជនបរទេសដ៏កក់ក្តៅដែលមកធ្វើពាណិជ្ជកម្មនៅកម្ពុជា ទោះបីថ្លៃដើមមិនទាបខ្លាំង ប៉ុន្តែយ៉ាងហោចណាស់ក៏មានភាពងាយស្រួលក្នុងការធ្វើពាណិជ្ជកម្មដែរ»។
តាមការប៉ាន់ស្មានមានវិនិយោគិនប្រមាណ ២០០ មកពីហុងកុងដែលបានដាក់ទុនយ៉ាងច្រើននៅក្នុងវិស័យផលិតកម្ម សម្លៀកបំពាក់ ស្បែកជើង ថាំពេទ្យ អចលនទ្រព្យ លក់រាយ និងភោជនីយដ្ឋាន ដែលកំពុងជំរុញដល់កំណើនសេដ្ឋកិច្ចក្នុងស្រុកដូចដែលយើងអាចកត់សម្គាល់នៅក្នុងសមាជិកភាពរបស់ HKBAC។
លោកបន្ថែមថា៖ «ប៉ុន្តែវិនិយោគិនកាន់តែច្រើនមកពីហុងកុងមកបើកភោជនីយដ្ឋានដើម្បីបម្រើម្ហូបបែបហុងកុង ហើយក៏មានវិនិយោគិនមកបើកហាងលក់ទំនិញផងដែរ»។
ប្រទេសកម្ពុជាដែលសេដ្ឋកិច្ចកំពុងរីកលូតលាស់យ៉ាងឆាប់រហ័ស ក៏កំពុងត្រូវការជំនាញផ្សេងៗមកពីហុងកុងផងដែរ ដូចជាផ្នែកសេវាកម្មនៅក្នុងផ្នែករចនា ចំណេះដឹងបច្ចេកទេស អចលនទ្រព្យ និងការផ្តល់មូលនិធិសម្រាប់ក្រុមហ៊ុន ជាដើម។ លោក Ng ថ្លែងថាមជ្ឈមណ្ឌលហិរញ្ញវត្ថុអន្តរជាតិធំៗក៏កំពុងសម្លឹងមើលបន្ថែមទៀតដើម្បីលើកទឹកចិត្តដល់ការធ្វើពាណិជ្ជកម្មរវាងហុងកុង ចិនដីគោក និងកម្ពុជា»។
ក្រុមប្រឹក្សាអភិវឌ្ឍន៍ពាណិជ្ជកម្ម ហុងកុង បានរៀបចំដំណើរទស្សនកិច្ចរបស់រដ្ឋាភិបាល និងសិក្ខាសាលា ធុរកិច្ចដើម្បីនាំវិនិយោគិនពីហុងកុងមកកម្ពុជា ហើយសេវាកម្មមួយដែលអាចជួយជំរុញពាណិជ្ជកម្មអន្តរជាតិ គឺការប្រើប្រាស់សេវាកម្មមជ្ឈត្តកម្ម នៅហុងកុង ពីព្រោះយើងមានប្រព័ន្ធ មជ្ឈត្តកម្ម និងប្រព័ន្ធច្បាប់ដ៏រឹងមាំ ស្រដៀងនឹងប្រទេសសិង្ហបុរី ដែរ។
ប៉ុន្តែចំណងពាណិជ្ជកម្មដ៏រឹងមាំកំពុងរងផលប៉ះពាល់ដោយសារតែជំងឺរាតត្បាតកូវីដ១៩ ដែលបានបន្ថយល្បឿននៃការធ្វើពាណិជ្ជកម្ម និងការធ្វើដំណើររបស់វិនិយោគិន។
«មុនពេលកូវីដ យើងឃើញមានការវិនិយោគច្រើនមកពីចិនដីគោក និងហុងកុង។ ហុងកុងមានលក្ខណពិសេស ពីព្រោះប្រជាជនជាច្រើនក៏មានទំនាក់ទំនងជាមួយចិនដីគោកចាប់តាំងពីប្រគល់ទៅឲ្យចិនវិញ។ ក្រុមហ៊ុនហុងកុងកាន់តែច្រើនមកបណ្តាក់ទុននៅកម្ពុជាក៏មានមានទំនាក់ទំនងជិតស្និទ្ធជាមួយចិនដីគោក។
លោកបន្ថែមថា៖ «តាមពិតកូវីដ ១៩ មិនមែនធ្វើឲ្យវិនិយោគិនមិនចង់មកវិនិយោគនៅកម្ពុជាទេ ប៉ុន្តែវាធ្វើឱ្យពួកគេពិបាកធ្វើដំណើរមកកម្ពុជា។ មុនកូវីដ ១៩ ក្រុមហ៊ុនអាកាសចរណ៍ Cathay Dragon ប្រតិបត្តិការជើងហោះហើរត្រង់ ១៤ ជើងរៀងរាល់សប្តាហ៍រវាងហុងកុង និងកម្ពុជា។ ជាធម្មតានៅពេលវិនិយោគិនសម្រេចមកវិនិយោគនៅទីនេះ ពួកគេចង់មកកាន់ប្រទេសនេះ ដើម្បីស្វែងយល់អំពីប្រជាជន និងវប្បធម៌ ប៉ុន្តែដោយសារការធ្វើដំណើរត្រូវបានរឹតបន្តឹង ពួកគេមិនអាចមកកាន់ទីនេះបានទេ ដូច្នេះការវិនិយោគផ្ទាល់ពីបរទេសមានល្បឿនយឺត»៕