លោកវេជ្ជបណ្ឌិត គួច ម៉េងលី ដែលជាស្ថាបនិកប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុនម៉េងលីជេ.គួចអេឌ្យូខេសិន។ រូបថតសហការី
លោកវេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុនម៉េងលីជេ.គួចអេឌ្យូខេសិន (MJQE) បានឲ្យដឹងថា សិស្សានុសិស្សនៅក្នុងប្រទេសកម្ពុជាត្រូវផ្តោតលើទិសដៅក្នុងការសិក្សាបន្ថែមដើម្បីពេលពួកគេបញ្ចប់ការសិក្សាអាចក្លាយជាអ្នកជំនាញដើម្បីរួមចំណែកដល់ការអភិវឌ្ឍសេដ្ឋកិច្ចរបស់ប្រទេសកម្ពុជា។
.jpg)
ខណៈដែលប្រទេសកម្ពុជាកំពុងបន្តទទួលបានកំណើនសេដ្ឋកិច្ចដ៏រឹងមាំ ទីផ្សារធនធានមនុស្សរបស់ប្រទេសនឹងទាមទារអ្នកជំនាញកាន់តែច្រើនបន្ថែមទៀតដូចជាអ្នកជំនាញផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។ ប៉ុន្តែទោះជាយ៉ាងណាក៏ដោយលោកវេជ្ជបណ្ឌិត គួច ម៉េងលី ជឿជាក់ថា វិស័យឯកជនត្រូវតែធ្វើការជាមួយរដ្ឋាភិបាល ដើម្បីបង្កើតការងារបន្ថែមសម្រាប់និស្សិតទើបបញ្ចប់ការសិក្សាដែលទទួលបានការបណ្តុះបណ្តាលល្អ។
លោកវេជ្ជបណ្ឌិតបញ្ជាក់ថា និស្សិតសាកលវិទ្យាល័យគួរផ្តោតទៅលើការសិក្សាជំនាញមួយឲ្យបានច្បាស់លាស់មុនពេលពិចារណាចាប់យកការសិក្សាលើជំនាញណាមួយផ្សេងទៀត។
លោកថ្លែងប្រាប់កាសែតភ្នំពេញប៉ុស្តិ៍ថា៖ «និស្សិតមួយចំនួនសិក្សាជំនាញ ២ ដែលអាចរារាំងពួកគេមិនឱ្យពូកែនៅក្នុងជំនាញជាក់លាក់ណាមួយ ពីព្រោះវាពិបាកក្នុងការរៀនជំនាញ ២ ក្នុងពេលតែមួយ។ យើងត្រូវការអ្នកជំនាញច្បាស់លាស់»។
បច្ចុប្បន្នកម្លាំងពលកម្មភាគច្រើននៅក្នុងប្រទេសកម្ពុជាគឺជាកម្លាំងពលកម្មដែលមានជំនាញទាប ប៉ុន្តែប្រទេសកម្ពុជាត្រូវការផ្លាស់ប្តូរ និងបង្កើតកម្លាំងពលកម្មដែលមានជំនាញខ្ពស់ ដើម្បីឈានទៅរកកម្រិតអភិវឌ្ឍន៍សេដ្ឋកិច្ចឲ្យកាន់តែខ្ពស់។
ដោយមើលឃើញពីតម្រូវការនេះទើបក្រុមហ៊ុន MJQE បានខិតខំប្រឹងប្រែងដើម្បីពង្រឹងចំណាប់អារម្មណ៍ និងជំនាញរបស់សិស្សលើផ្នែកគណិតវិទ្យា ដោយសហការជាមួយសមាគមគណិតវិទ្យាអន្តរជាតិ (IAMA) ដើម្បីបន្ថែមមុខវិជ្ជាគិតលេខរហ័សជាជម្រើសមុខវិជ្ជាសិក្សាមួយនៅក្នុងសាលា។
មុខវិជ្ជាគិតលេខរហ័សគឺដើម្បីបង្ហាញឱ្យឃើញអំពីសក្តានុពលខួរក្បាលរបស់យើង។ សិស្សត្រូវបានគេសង្កេតលើការផ្តោតអារម្មណ៍ការមានទំនុកចិត្តលើខ្លួនឯង និងការចងចាំក៏ដូចជាការគិតលេខរហ័សជាដើម។ លោកវេជ្ជបណ្ឌិត គួច ម៉េងលី ថ្លែងថាមុខវិជ្ជាគិតលេខរហ័សនឹងបង្រៀនសិស្សានុសិស្សអំពីវិធីអនុវត្តជំនាញគណិតវិទ្យារបស់ពួកគេដែលអាចជួយពួកគេបានច្រើននៅពេលបន្តនៅថ្នាក់ឧត្តមសិក្សា។
បច្ចុប្បន្នក្រុមហ៊ុន MJQE មានសិស្សានុសិស្សកំពុងសិក្សាចំនួន ១១ ៥០០ នាក់ គ្រូបង្រៀន និងបុគ្គលិកចំនួន ១ ៤០០ នាក់។ ក្រុមហ៊ុនមានសាលារៀន អន្តរទ្វីបអាមេរិកាំង (AIS) ដែលផ្តល់ការអប់រំទូទៅចាប់ពីថ្នាក់ក្រោមមត្តេយ្យរហូតដល់ថ្នាក់ទី ១២ និងមជ្ឈមណ្ឌលភាសា អេ អាយ អាយ (Aii) ដែលផ្តល់ជូនវគ្គបណ្តុះបណ្តាលភាសាអង់គ្លេស ចិន ថៃ និងថ្នាក់ TOEFL។
លោកវេជ្ជបណ្ឌិត គួច ម៉េងលី ថ្លែងថា៖ «យើងក៏បានចុះហត្ថលេខាលើអនុស្សរណៈនៃការយោគយល់ជាមួយក្រុមហ៊ុន Auswin International Group Co Ltd (អ្នកផ្តល់ប្រឹក្សាអប់រំ) ដើម្បីផ្តល់នូវសេវាកម្មមួយដែលរួមបញ្ចូលការពិគ្រោះយោបល់អំពីការសិក្សានៅក្រៅប្រទេស និងកម្មវិធីផ្តល់ទិដ្ឋាការដើម្បីជួយសិស្សឱ្យបន្តការសិក្សានៅបរទេស»។
លោកបន្ថែមថាក្រុមហ៊ុន MJQE បានទទួលសំណើយ៉ាងច្រើនឲ្យបង្កើតសាខានៅតាមបណ្តាខេត្ត ប៉ុន្តែផែនការដើម្បីបំពេញតាមតម្រូវការបច្ចុប្បន្ននេះគឺត្រូវបានរារាំងដោយឧបសគ្គចម្បងគឺថវិកា។ លោកបានអំពាវនាវដល់មូលនិធិអន្តរជាតិក៏ដូចជាអង្គការក្រៅរដ្ឋាភិបាលជួយផ្តល់ការគាំទ្រ និងផ្តល់មូលនិធិយូរអង្វែងសម្រាប់សាលាឯកជននៅក្នុងប្រទេសកម្ពុជា។
លោកលើកឡើងថា៖ «យើងកំពុងផ្តល់ការអប់រំដែលមានគុណភាពខ្ពស់នៅក្នុងរាជធានីភ្នំពេញ ប៉ុន្តែយើងសង្ឃឹមថានឹងមានការផ្តល់មូលនិធិបន្ថែមទៀត ដើម្បីពង្រីកលទ្ធភាពរបស់យើងទៅកាន់បណ្តាខេត្តឆ្ងាយៗ»។
និយាយអំពីវិស័យនានាដើម្បីធ្វើឱ្យប្រសើរ ឡើងនូវប្រព័ន្ធអប់រំលោកវេជ្ជបណ្ឌិត គួច ម៉េងលី បានគូសបញ្ជាក់ថាគួរតែមានរចនាសម្ព័ន្ធបណ្តុះបណ្តាលវិជ្ជាជីវៈសម្រាប់សិស្សដែលប្រឡងធ្លាក់បាក់ឌុប។
លោកបានជំរុញឱ្យវិស័យឯកជនផ្តល់ការលើកទឹកចិត្ដដល់អ្នកដែលមានទេពកោសល្យ និងបង្កើតឱកាសការងារពាក់ព័ន្ធដល់ពួកគេ។ ធ្វើដូច្នេះអាចទប់ស្កាត់និស្សិតដែលទើបបញ្ចប់ការសិក្សាពីមហាវិទ្យាល័យ និងសិស្សទើបបញ្ចប់ថ្នាក់វិទ្យាល័យកុំធ្វើចំណាកស្រុកទៅក្រៅប្រទេស ដូចជាប្រទេសកូរ៉េខាងត្បូង សិង្ហបុរី និងបណ្តាប្រទេសនៅក្នុងតំបន់អាស៊ីអាគ្នេយ៍ដទៃទៀតដើម្បីស្វែងរកការងារធ្វើ។
លោកវេជ្ជបណ្ឌិត គួច ម៉េងលី មានប្រសាសន៍ថាការលើកកម្ពស់ប្រព័ន្ធអប់រំនិងសង្គមគឺជាដំណើរការមួយកំពុងប្រព្រឹត្តទៅនៅក្នុងប្រទេសកម្ពុជា ប៉ុន្តែដើម្បីឲ្យដំណើរការនេះប្រព្រឹត្តិទៅកាន់តែលឿនត្រូវមានកិច្ចសហប្រតិបត្តិការរវាងរដ្ឋាភិបាល និងវិស័យឯកជន។
លោកសង្កត់ធ្ងន់ថាចំណុចសំខាន់មួយគឺត្រូវពិនិត្យមើលគម្លាតនៃគុណភាពអប់រំរវាងរាជធានីភ្នំពេញ និងបណ្តាខេត្តនៅតាមជនបទឆ្ងាយៗ៕
