អតិថិជនរបស់មីក្រូហិរញ្ញវត្ថុប្រមាណ ៦០ ភាគរយគឺមកពីវិស័យកសិកម្ម។ photo BY HONG MENEA
ដោយទទួលបានការគាំទ្រខ្លាំងពីអតិថិជននៅតាមជនបទ គ្រឹះស្ថានមីក្រូហិរញ្ញវត្ថុ (MFIs) បានបង្កើនឲ្យមានការប្រើប្រាស់ប្រាក់រៀលកាន់តែទូលំទូលាយ ហើយអត្រាប្រើប្រាស់ប្រាក់រៀលនៅតាមជនបទគឺខ្ពស់ជាងការប្រើប្រាស់នៅក្នុងទីក្រុង។
.jpg)
គ្រឹះស្ថានមីក្រូហិរញ្ញវត្ថុមានចំនួនប្រមាណ ៨០ កំពុងប្រតិបត្តិការនៅទូទាំងប្រទេសជាមួយអតិថិជនដែលមានចំណូលទាបតាមរយៈការផ្តល់នូវសេវាកម្មជាច្រើនដូចជាផ្តល់ប្រាក់កម្ចីខ្នាតតូចទទួលប្រាក់បញ្ញើផ្តល់ប្រាក់កម្ចីកែលម្អផ្ទះ ផ្តល់ប្រាក់កម្ចីទិញម៉ូតូ និងសេវាផ្ទេរប្រាក់ជាដើម។
គ្រឹះស្ថានមីក្រូហិរញ្ញវត្ថុទាំងនោះបានដើរតួយ៉ាងសំខាន់ក្នុងការផ្តល់ប្រាក់កម្ចីសមរម្យដល់ប្រជាពលរដ្ឋនៅតាមជនបទជាពិសេសសម្រាប់ប្រជាពលរដ្ឋដែលមានប្រាក់ចំណូលទាប។
មានតម្រូវការប្រាក់រៀលច្រើននៅតំបន់ជនបទ។ photo BY VOUN DARA
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា (CMA) បានឲ្យកាសែតភ្នំពេញប៉ុស្តិ៍ដឹងថា៖ «ប្រាក់រៀលដើរតួយ៉ាងសំខាន់នៅក្នុងវិស័យមីក្រូហិរញ្ញវត្ថុពីព្រោះយើងធ្វើការជាមួយប្រជាពលរដ្ឋដែលមានប្រាក់ចំណូលទាប យើងបានបញ្ជ្រាបចូលទៅដល់បណ្តាខេត្តនានា និងតាមជនបទជាតំបន់ដែលប្រាក់រៀលគ្របដណ្តប់ខ្លាំង ហើយប្រមាណ ៦០ ភាគរយនៃអតិថិជនរបស់យើងគឺមកពីវិស័យកសិកម្ម»។
លោកបន្តថា៖ «គ្រឹះស្ថានមីក្រូហិរញ្ញវត្ថុទទួលប្រាក់បញ្ញើសន្សំ ដែលប្រតិបត្តិការនៅតាមតំបន់ជនបទ ហើយប្រាក់បញ្ញើរបស់យើងប្រមាណជា ៦០ ភាគរយគឺជាប្រាក់រៀល»។
ការផ្តោតសំខាន់របស់គ្រឹះស្ថានមីក្រូហិរញ្ញវត្ថុគឺអតិថិជនដែលមានប្រាក់ចំណូលទាប និងសហគមន៍នៅតាមជនបទដែលពាក់ព័ន្ធនឹងវិស័យកសិកម្មដូចជាដំណាំស្រូវ ដំឡូងមី សណ្តែក និងការចិញ្ចឹមសត្វជាដើម។
លោក បូរាណ បានបន្ថែមថា៖ «ប៉ុន្តែនៅក្នុងរយៈពេល ១០ ឆ្នាំចុងក្រោយ និន្នាការនេះក៏ត្រូវបានផ្លាស់ប្តូរផងដែរ ខណៈគ្រឹះស្ថានមីក្រូហិរញ្ញវត្ថុកាន់តែច្រើនងាកទៅផ្តោតលើអតិថិជនដែលជាសហគ្រាសខ្នាតតូចនឹងមធ្យម (SMEs) ដូចជាផ្តល់កម្ចីទិញផ្ទះ និងកម្ចីផ្ទាល់ខ្លួនជាដើម ដែលភាគច្រើនអតិថិជនត្រូវការជាប្រាក់ដុល្លារអាមេរិក។
លោកថ្លែងថា៖ «យ៉ាងហោចណាស់ ៥០ ភាគរយនៃគ្រឹះស្ថានមីក្រូហិរញ្ញវត្ថុកំពុងជួបការលំបាកក្នុងការសម្រេចឲ្យបាននូវឥណទានជារូបិយវត្ថុជាតិយ៉ាងតិច ១០ ភាគរយនៃសំពៀតឥណទានសរុបរបស់ខ្លួនដែលតម្រូវដោយធនាគារជាតិ (NBC)។ គេអាចសម្រេចបានត្រឹមតែ ៧ ទៅ ៨ ភាគរយប៉ុណ្ណោះ។ សមាគមកំពុងធ្វើការជិតស្និទ្ធជាមួយសមាជិកដើម្បីរកដំណោះស្រាយក្នុងការសម្រេចបានតាមគោលដៅនៅចុងឆ្នាំនេះ»។
មានតម្រូវការប្រាក់រៀលច្រើននៅតំបន់ជនបទ។ photo BY VOUN DARA
នៅចុងខែធ្នូឆ្នាំ ២០១៦ ធនាគារជាតិនៃកម្ពុជាបានចេញសេចក្តីប្រកាសមួយឱ្យស្ថាប័នហិរញ្ញវត្ថុទាំងអស់ត្រូវមានឥណទានជារូបិយវត្ថុជាតិយ៉ាងតិច ១០ ភាគរយនៃកម្ចីឥណទានសរុបរបស់ខ្លួនដែលជាផ្នែកមួយនៃកិច្ចខិតខំប្រឹងប្រែងរបស់ធនាគារជាតិក្នុងការលើកកម្ពស់ការប្រើប្រាស់រូបិយវត្ថុជាតិ។
ការប្រើប្រាស់ប្រាក់ដុល្លារនៅមានកម្រិតខ្ពស់ គឺដោយសារតែអាកប្បកិរិយារបស់អតិថិជន និងទំនោរទីផ្សារ។ ប្រជាជនកម្ពុជាហាក់ស៊ាំជាមួយប្រាក់ដុល្លារជាងប្រាក់រៀល ម្យ៉ាងវិញទៀតអត្រាការប្រាក់កម្ចីជាប្រាក់ដុល្លារមានតម្លៃទាបជាងប្រាក់រៀលដែលក៏ជាកត្តារួមផ្សំធើ្វឲ្យអ្នកប្រើប្រាស់យកប្រាក់ដុល្លារផងដែរ។
លោកបន្ថែមថា៖ «បើនិយាយអំពីចំណាយប្រតិបត្តិការវិញ គឺគ្រឹះស្ថានមីក្រូហិរញ្ញវត្ថុដែលមានប្រាក់រៀលច្រើនត្រូវចំណាយខ្ពស់ដោយសារតម្រូវការបុគ្គលិកបន្ថែមសម្រាប់រាប់លុយ ការដឹកជញ្ជូន និងបញ្ហានៃការទុកដាក់ជាដើម។ ជាងនេះទៅទៀតអត្រាការប្រាក់រៀលដែលគ្រឹះស្ថានខ្ចីពីអ្នកវិនិយោគក៏មានអត្រាខ្ពស់ជាងការខ្ចីជាប្រាក់ដុល្លារហើយព្រមទាំងមានការលំបាកក្នុងការខ្ចីបុលផងដែរ»។
អ្វីដែលកាន់តែគួរឱ្យចាប់អារម្មណ៍ទៀតនោះគឺថាកម្មវិធីសូហ្វវែរ (software) ដែលប្រើប្រាស់ដោយគ្រឹះស្ថានមីក្រូហិរញ្ញវត្ថុមួយចំនួនគឺស្គាល់តែប្រព័ន្ធរូបិយប័ណ្ណ ២ ប៉ុណ្ណោះហើយស្ថាប័នទាំងនេះត្រូវដំឡើងប្រព័ន្ធកុំព្យូទ័ររបស់ពួកគេដើម្បីអាចបន្ថែមប្រាក់រៀលដែលអាចត្រូវចំណាយពេលច្រើនរួមនឹងការចំណាយធនធានសម្រាប់ប្រតិបត្តិករជាដើម។
លោក បូរាណ បន្តថា៖ «ដើម្បីជំរុញការប្រើប្រាស់ប្រាក់រៀលយើងត្រូវជំរុញឲ្យការទូទាត់ការចំណាយប្រចាំថ្ងៃជាប្រាក់រៀលឲ្យបានច្រើនជាងពេលបច្ចុប្បន្នដែលអាចជួយជំរុញឲ្យមានការផ្លាស់ប្តូរផ្នត់គំនិត និងទម្លាប់របស់ប្រជាជនទូទៅឲ្យស៊ាំជាមួយប្រាក់រៀល។
លោក បូរាណ បញ្ជាក់ថា៖ «ដើម្បីសម្រេចបាននូវគោលដៅប្រាក់រៀលវាមិនមែនគ្រាន់តែជាតួនាទីរបស់ធនាគារជាតិ និងគ្រឹះស្ថានធនាគារ និងហិរញ្ញវត្ថុប៉ុណ្ណោះទេ តែទាមទារឲ្យមានការចូលរួមពីគ្រប់ភាគីដែលពាក់ព័ន្ធ ទាំងរដ្ឋាភិបាល និងវិស័យឯកជន បើមិនដូច្នេះទេវាពិបាកនឹងសម្រេចបានណាស់»៕
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា (CMA)។ photo supplied
