ជារៀងរាល់ឆ្នាំមានស្ត្រីចំនួន 500 000 នាក់កើតជំងឺមហារីកមាត់ស្បូននៅទូទាំងពិភពលោក 80%នៃពួកគេមកពីប្រទេសកំពុងអភិវឌ្ឍន៍។ យ៉ាងហោចណាស់ស្ត្រីចំនួន 200 000 នាក់នឹងប្រឈមមុខការបាត់បង់ជីវិត ហើយ 75% នៃអ្នកបានបាត់បង់ជីវិតនេះដោយសារតែស្ត្រីទាំងនោះមិនទទួលបានការថែទាំសុខភាពអ្វីទាំងអស់សម្រាប់ជំងឺមហារីករបស់ពួកគេ។
ជាមួយនឹងកំណើនសេដ្ឋកិច្ចដ៏ឆាប់រហ័សរបស់ប្រទេសកម្ពុជា កម្រិតជីវភាពរស់នៅកាន់តែល្អប្រសើរងាយស្រួលឡើង ហើយប្រជាជនកម្ពុជាកំពុងទទួលបានប្រាក់ចំណូលខ្ពស់ និងឱកាសកាន់តែមានច្រើនឡើងៗ។ ប៉ុន្តែខ្វះការយកចិត្តទុកដាក់លើការថែទាំសុខភាពដោយជំនួសមកវិញលើការចំណាយប្រាក់លើការព្យាបាលវិញ។
មានប្រជាជនកម្ពុជាដ៏តិចតួចគឺកំពុងចំណាយប្រាក់សម្រាប់សេវាបង្ការ និងការពិនិត្យសុខភាព។ លោកវេជ្ជបណ្ឌិត ព្រាប ឡី ប្រធានផ្នែកវះកាត់នៅមន្ទីរពេទ្យព្រះសីហនុ មណ្ឌលនៃក្តីសង្ឃឹម សង្ឃឹមថានឹងមានការផ្លាស់ប្តូរមករកភាពប្រសើរឡើងវិញចំពោះបញ្ហានេះ។
ជារៀងរាល់ឆ្នាំមន្ទីរពេទ្យព្រះសីហនុ មណ្ឌលនៃក្តីសង្ឃឹមទទួលអ្នកជំងឺជាង 45 000នាក់ ហើយនៅត្រឹមខែធ្នូចុងឆ្នាំ 2018 មន្ទីរពេទ្យនេះបានផ្តល់សេវាថែទាំសុខភាពដល់មនុស្សច្រើនជាង 1.4 លាននាក់។
លោកវេជ្ជបណ្ឌិត ព្រាប ឡី បានបញ្ជាក់យ៉ាងខ្លីថា ភាគច្រើននៃអ្នកជំងឺដែលបានមកទទួលសេវាព្យាបាលនៅមន្ទីរពេទ្យរបស់យើងកំពុងស្ថិតនៅដំណាក់កាលចុងក្រោយនៃជំងឺនេះទៅហើយ។ នេះមានន័យថាឱកាសនៃការរស់រានមានជីវិតរបស់ពួកគេគឺតិចតួចណាស់ ហើយតម្លៃនៃការព្យាបាលគឺរឹតតែខ្ពស់ទៅទៀត។ ជាមួយនឹងការរកឃើញ និងការព្យាបាលទាន់ពេលវេលាពីដំណាក់កាលដំបូង អ្នកជំងឺទំនងអាចមានសង្ឃឹមជាសះស្បើយឡើងវិញដើម្បីបន្តរស់នៅបានយូរជាមួយជីវិតមានសុខភាពល្អទៅមុខទៀត។
លោកវេជ្ជបណ្ឌិតបានបន្ថែមថា “វាជាការពិតនៃជំងឺមហារីកមាត់ស្បូនគឺជាកំពូលឃាតករដែលបានសម្លាប់ស្ត្រីកម្ពុជាយ៉ាងច្រើន ប៉ុន្តែជំងឺនេះអាចព្យាបាលបានយ៉ាងងាយស្រួលនៅដំណាក់កាលដំបូង ហើយក្នុងករណីជាច្រើនវាអាចត្រូវបានទប់ស្កាត់បានជាមួយនឹងការចាក់ថ្នាំវ៉ាក់សាំងការពារ។
លោកវេជ្ជបណ្ឌិត ព្រាប ឡី បានចែករំលែកថា "ផ្អែកលើអ្នកជំងឺដែលយើងសង្កេតឃើញនៅមន្ទីរពេទ្យព្រះសីហនុ មណ្ឌលនៃក្តីសង្ឃឹមចំនួនករណីជំងឺមហារីកមាត់ស្បូននៅកម្ពុជាកំពុងតែកើនឡើង។ ប្រសិនបើជំងឺមហារីកមាត់ស្បូនស្ថិតក្នុងដំណាក់កាលទី 1 យើងអាចធ្វើការវះកាត់តាមវិធីដ៏សាមញ្ញ ដើម្បីព្យាបាលវាដែលអាចផ្តល់ឱកាសរស់រានមានជីវិតខ្ពស់។ ទោះបីជាយ៉ាងណាក៏ដោយអ្នកជំងឺភាគច្រើនរបស់យើងបានមករកការព្យាបាល ឬពិនិត្យរកមើលជំងឺនេះយឺតពេលនៅពេលដែលជំងឺមហារីកប្រភេទនេះស្ថិតក្នុងដំណាក់កាលទី 3 ឬទី 4 រួចទៅហើយ។
ខ្ញុំពិតជាមានការរន្ធត់ចិត្តយ៉ាងខ្លាំង និងសោកស្តាយនៅពេលឃើញពួកគេដូច្នោះ។
ជម្រើសនៃការព្យាបាលនៅមានកម្រិតហើយរួមបញ្ចូលការបញ្ជូនទៅព្យាបាលបន្តដោយគីមីនៅមន្ទីរពេទ្យមិត្តភាពខ្មែរ-សូវៀត។"
លោកវេជ្ជបណ្ឌិត ឡី បានពន្យល់ថា "ជំងឺមហារីកមាត់ស្បូនជារឿយៗបណ្តាលមកពីវីរុស HPV ដែលជាការចម្លងរោគតាមរយៈការរួមភេទ"។ អ្នកដែលមានហានិភ័យខ្ពស់នៃការឆ្លងវីរុស HPV និងការវិវត្តទៅជាជំងឺមហារីកមាត់ស្បូនគឺជាស្ត្រីដែលមានការរួមភេទយ៉ាងសកម្មចាប់ពីអាយុ 20 ទៅ 30 ឆ្នាំ។ លោកវេជ្ជបណ្ឌិតបានជំរុញឱ្យស្ត្រីទាំងអស់ពិនិត្យមាត់ស្បូនជារៀងរាល់ 3 ឆ្នាំក្នុងវ័យអាយុចន្លោះនេះដើម្បីអាចការពារទប់ស្កាត់ជំងឺមហារីកមាត់ស្បូននៅដំណាក់កាលដំបូងទាន់ពេល។
បើអ៊ីចឹង តើអ្វីជារឿងដ៏ល្អបំផុតដើម្បីការពារជំងឺមហារីកមាត់ស្បូន? កុមារអាយុ 9 ទៅ 12 ឆ្នាំគួរតែទទួលការចាក់វ៉ាក់សាំង HPV ។
លោកវេជ្ជបណ្ឌិត ឡី បានសរុបថា៖ "មន្ទីរពេទ្យព្រះសីហនុ មណ្ឌលនៃក្តីសង្ឃឹមធ្វើការដើម្បីធានាថាប្រជាជនកម្ពុជាទាំងអស់អាចទទួលបានការថែទាំសុខភាពដែលមានគុណភាព" ។ "យើងមិនអាចសង្កត់ធ្ងន់ឱ្យបានគ្រប់គ្រាន់ថាតើវាមានសារៈសំខាន់យ៉ាងណាសម្រាប់ប្រជាជនរបស់យើងក្នុងការថែទាំសុខភាពរបស់ពួកគេ។ ទទួលការពិនិត្យស្វែងរកជាទៀងទាត់ ស្វះស្វែងរកការព្យាបាលទាន់ពេល ដើម្បីរស់នៅបានយូរជាមួយគ្រួសាររបស់អ្នក។ "
មន្ទីរពេទ្យព្រះសីហនុមណ្ឌលនៃក្តីសង្ឃឹម (SHCH) ត្រូវបានបង្កើតឡើងក្នុងឆ្នាំ 1996 ដោយមានបេសកកម្មផ្តល់ការថែទាំសុខភាពប្រកបដោយគុណភាពខ្ពស់ដល់ប្រជាជនក្រីក្រដែលជួបការលំបាកផ្សេងៗនៅកម្ពុជាស្របជាមួយ និងការបណ្តុះបណ្តាលអ្នកជំនាញសុខភាពកម្ពុជាជំនាន់ក្រោយ។ អ្នកជំងឺដែលមានប្រាក់ចំណូលខ្ពស់អាចបង់ប្រាក់ដើម្បីជ្រើសរើសសេវាកម្មថែទាំសុខភាព ដូចជាការធ្វើតេស្តតាមរយៈមន្ទីរពិសោធន៍ និងទទួលបានឱសថដែលមិនមែនជាការបរិច្ចាគពីម្ចាស់ជំនួយផ្សេងៗ ហើយត្រូវបង់ប្រាក់ចំពោះអ្វីដែលពួកគេអាចមានលទ្ធភាព៕