លោកបណ្ឌិត ឃឹម លាង នាយកមជ្ឈមណ្ឌលសហប្រតិបត្តិការកម្ពុជា-ជប៉ុន។
នៅពេលមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ត្រូវបានបង្កើតឡើងក្នុងឆ្នាំ ២០០៤ គោលបំណងចម្បងរបស់មជ្ឈមណ្ឌលនេះ គឺដើម្បីលើកកម្ពស់ទំនាក់ទំនងរវាងប្រទេសទាំង ២ តាមរយៈការបណ្តុះបណ្តាលផ្នែកគ្រប់គ្រងធុរកិច្ចការបណ្តុះបណ្តាលភាសាជប៉ុន និងសកម្មភាពផ្លាស់ប្តូរវប្បធម៌។
.jpg)
អស់រយៈពេលជិត ២ ទសវត្សមកនេះ មជ្ឈមណ្ឌល CJCC ដែលត្រូវបានផ្តល់មូលនិធិដោយរដ្ឋាភិបាលជប៉ុនមានមោទនភាពក្នុងនាមជាមជ្ឈមណ្ឌលឈានមុខគេ ដោយប្រជាជនកម្ពុជាអាចមកបង្កើនជំនាញអាជីវកម្មរបស់ពួកគេដោយផ្អែកលើចំណេះដឹង និងបទពិសោធស្តង់ដាជប៉ុន និងជួយក្នុងការតភ្ជាប់ទំនាក់ទំនងផ្នែកអាជីវកម្មរវាងប្រទេសទាំង ២។
មជ្ឈមណ្ឌល CJCC មានទីតាំងស្ថិតនៅបរិវេណសាកលវិទ្យាល័យភូមិន្ទភ្នំពេញមានផ្តល់ជូនវគ្គសិក្សាជាច្រើន និងមានសារៈសំខាន់សម្រាប់ការអភិវឌ្ឍសេដ្ឋកិច្ចកម្ពុជា ដែលកំពុងមានការរីកចម្រើន ដោយវគ្គបណ្តុះបណ្តាលទាំងនោះមានដូចជាវគ្គសហគ្រិនភាព វគ្គអភិវឌ្ឍ និងគ្រប់គ្រងសាជីវកម្ម និងមានរហូតដល់វគ្គគ្រប់គ្រងក្រុមហ៊ុនជាដើម។
លោកបណ្ឌិត ឃឹម លាង នាយកមជ្ឈមណ្ឌល CJCC មានប្រសាសន៍ប្រាប់កាសែតភ្នំពេញប៉ុស្តិ៍ថា៖ «ចាប់តាំងពីឆ្នាំ ២០០៤ មក CJCC បានបណ្តុះបណ្តាលសិក្ខាកាមបានចំនួន ២៥ ៣៧៩ នាក់ ទាំងតាមរយៈវគ្គបណ្តុះបណ្តាលរយៈពេលវែង និងវគ្គខ្លី ដោយក្នុងនោះមានជិត ៧០០ នាក់ដែលបានបញ្ចប់វគ្គសហគ្រិនភាព ហើយ ២២ ភាគរយ នៃពួកគេបានបើកអាជីវកម្មផ្ទាល់ខ្លួន»។
«យើងក៏ផ្តោតទៅលើមីក្រូសហគ្រាស សហគ្រាសធុនតូច និងមធ្យម (MSMEs) ផងដែរ ហើយចំពោះផ្នែកសេវាវិញ យើងក៏មានប្រធានបទផ្សេងៗនៅក្នុងវគ្គបណ្តុះបណ្តាលនោះ ដូចជាវគ្គស្តីពីការពេញចិត្តរបស់អតិថិជនវគ្គគ្រប់គ្រងប្រតិបត្តិការប្រចាំថ្ងៃ វគ្គយុទ្ធសាស្ត្រគ្រប់គ្រងក្រុមហ៊ុន និងវគ្គគ្រប់គ្រងធនធានមនុស្សជាដើម»។
លោកបណ្ឌិត ឃឹម លាង បន្ថែមទៀតថា៖ «គោលបំណងនៃវគ្គបណ្តុះបណ្តាល់ទាំងនេះ គឺមានលក្ខណៈខុសៗទៅតាមប្រធានបទនីមួយៗ។ ឧទាហរណ៍ វគ្គសហគ្រិនភាព គោលបំណង គឺជួយដល់អ្នកដែលចង់បើកអាជីវកម្ម ហើយបើអាជីវកម្មនោះជាលក្ខណៈគ្រួសារ ឲ្យគាត់កែលម្អប្រព័ន្ធប្រតិបត្តិការ ពីព្រោះអាជីវកម្មលក្ខណៈគ្រួសារភាគច្រើនមិនមានជាប្រព័ន្ធច្បាស់លាស់ទេ»។
លើសពីនេះទៀត CJCC ក៏ផ្តល់ជូនការជួបជុំបណ្តាញធុរកិច្ច និងផ្គូផ្គងអាជីវកម្មរវាងសហគមន៍ពាណិជ្ជកម្មជប៉ុន និងកម្ពុជាផងដែរ ហើយសម្រាប់យុវជនកម្ពុជាដែលចង់ចូល ប្រឡូកក្នុងពិភពជំនួញពួកគេអាចមកទទួលការបណ្តុះបណ្តាលពិសេសៗនៅមជ្ឈមណ្ឌលនេះបាន។
«ចំពោះកម្មវិធី CJCC Accelerator Program (CJAP) គឺសម្រាប់អ្នកដែលគាត់ទើបចាប់ផ្តើមអាជីវកម្មថ្មីៗ ឬមានវ័យក្មេងខ្ចីក្នុងផ្នែកអាជីវកម្ម។ យើងបណ្តុះបណ្តាល និងបង្កើនសមត្ថភាពរបស់ពួកគាត់។ ចំពោះអ្នកដែលគាត់បានចាប់ផ្តើមហើយ ប៉ុន្តែខ្វះទុនដើម្បីពង្រីកអាជីវកម្ម គឺយើងជួយរកប្រភពហិរញ្ញវត្ថុឲ្យគាត់»។
លោកបណ្ឌិត ឃឹម លាង បញ្ជាក់ថា៖ «ម្យ៉ាងវិញទៀត តាមរយៈសមាគមពាណិជ្ជកម្មនិង វិនិយោគកម្ពុជា-ជប៉ុន (CJBI) គឺសមាគមនេះមានសារៈសំខាន់ណាស់នៅក្នុងការជំរុញឲ្យមានភាពជាដៃគួរវាងកម្ពុជា-ជប៉ុន ហើយតាមរយៈសមាគមនេះយើងផ្គូផ្គងអ្នកវិនិយោគជប៉ុន ដែលគាត់ចង់មករកស៊ីនៅស្រុកខ្មែរ ហើយខ្មែរនៅក្នុងស្រុកដែលចង់ចាប់ដៃរកស៊ីជាមួយជនជាតិជប៉ុន។ គោលបំណង គឺយើងចង់ឲ្យពួកគាត់ក្លាយជាដៃគូ»។
មជ្ឈមណ្ឌល CJCC កំពុងបន្តចូលរួមចំណែកដល់ការធ្វើឱ្យប្រសើរឡើងនូវចំណងមិត្តភាពទ្វេភាគីរវាងកម្ពុជា-ជប៉ុន ទាំងផ្នែកទំនាក់ទំនងរវាងប្រជាជន និងប្រជាជន ក៏ដូចជាសកម្មភាពពាណិជ្ជកម្ម។
បច្ចុប្បន្នមានក្រុមហ៊ុនជប៉ុនជិត ៣០០ ក្រុមហ៊ុន ដែលបានចុះបញ្ជី និងកំពុងប្រតិបត្តិការនៅក្នុងព្រះរាជាណាចក្រកម្ពុជា។ លើសពីនេះទៀត មានប្រជាជនជប៉ុនប្រមាណ ២៥០ ០០០ នាក់ បានមកទស្សនាប្រទេស កម្ពុជា កាលពីឆ្នាំមុន៕
