សមាជិក AmCham ចូលរួមកិច្ចប្រជុំប្រចាំឆ្នាំកាលពីឆ្នាំ ២០១៩ ក្នុងរាជធានីភ្នំពេញ។
បច្ចុប្បន្នសភាពាណិជ្ជកម្មសហរដ្ឋអាមេរិក (AmCham) នៅកម្ពុជា គឺជាស្ថាប័នមួយដែលមានការរីកចម្រើនជាលំដាប់ ដែលបានរួមចំណែកដល់កំណើនសេដ្ឋកិច្ច និងពង្រឹងទំនាក់ទំនងរវាងអាមេរិក និងកម្ពុជា។
.jpg)
បង្កើតឡើងអស់រយៈពេលជាង ២០ ឆ្នាំមកនេះ AmCham តំណាងឱ្យជនជាតិអាមេរិកាំងមួយក្រុមតូច ដែលកំពុងធ្វើការនៅកម្ពុជា។ ទោះបីខ្ញុំធ្លាប់ជាសមាជិកក្រុមប្រឹក្សាភិបាល ដូចលោក Michael Hayes ដែលជាស្ថាបនិកកាសែតភ្នំពេញប៉ុស្តិ៍ក៏ដោយ ក៏ការបង្កើត AmCham គឺគំនិតរបស់លោក Kevin Whitcraft ដែលជាសមាជិកនៃគ្រួសារសហគ្រិនដ៏ល្បីល្បាញម្នាក់នៅទីក្រុងបាងកក។
លោក Kevin បានបង្កើតក្រុមហ៊ុន RMA ដែលជាអ្នកដើរតួយ៉ាងសំខាន់នៅក្នុងសហគមន៍ធុរកិច្ចនៅទីនេះ ដែលមានផលិតផលរបស់អាមេរិកជាច្រើនដូចជា Ford, John Deere, Pizza Company, Krispy Crème Donuts ក្នុងចំណោមផលិតផលជាច្រើនទៀត។ លោកដឹងថា មានសភាពាណិជ្ជកម្មសហរដ្ឋអាមេរិកនៅប្រទេសថៃ ដូច្នេះលោកគិតថា វាគួរតែមាននៅទីនេះដែរ។
លោក Kevin បានផ្លាស់ទៅរកឱកាសផ្សេងទៀត នៅពេលនោះខ្ញុំបានក្លាយជាប្រធាន ប្រហែលដោយសារគ្មាននរណាម្នាក់ផ្សេងទៀតចង់ធ្វើការងារនេះ! ពីមុន AmCham ត្រូវបានគេស្គាល់ថាជាក្រុមប្រឹក្សាធុរកិច្ចកម្ពុជាអាមេរិក ដោយសារក្រសួងពាណិជ្ជកម្មមិនអនុញ្ញាតឲ្យប្រើពាក្យសភាពាណិជ្ជកម្ម ពីព្រោះក្រសួងទទួលស្គាល់តែសភាពាណិជ្ជកម្មកម្ពុជាតែប៉ុណ្ណោះ។ ក្រោយមកទើបក្រសួងពាណិជ្ជកម្មបានអនុញ្ញាតឱ្យសមាគមធុរកិច្ចប្រើពាក្យនេះ ដូច្នេះយើងដូរពី AmCam ទៅ AmCham។
ជាច្រើនឆ្នាំមកនេះ AmCham ទទួលបានអត្ថប្រយោជន៍យ៉ាងច្រើនពីភាពជាដៃគូរបស់ខ្លួនជាមួយស្ថានទូតអាមេរិក ដែលត្រូវបានបង្ហាញតាមរយៈការរៀបចំកិច្ចប្រជុំ និងព្រឹត្តិការណ៍ផ្សេងៗជាច្រើន។
យើងបានចូលរួមជាមួយឯកអគ្គរដ្ឋទូតអាមេរិកជាបន្តបន្ទាប់សម្រាប់បេសកកម្មធុរកិច្ចទៅកាន់គោលដៅជាច្រើន រួមមានសិង្ហបុរី បាងកក និងសហរដ្ឋអាមេរិក។ បេសកកម្មថ្មីៗបំផុតគឺគណៈប្រតិភូដែលដឹកនាំដោយឯកអគ្គរដ្ឋទូតអាមេរិកលោក Patrick Murphy ទៅចូលរួមវេទិកាធុរកិច្ចឥណ្ឌូ-ប៉ាស៊ីហ្វិក នៅទីក្រុងបាងកកកាលពីខែវិច្ឆិកា ឆ្នាំ ២០១៩ ភ្ជាប់ជាមួយកិច្ចប្រជុំកំពូលអាស៊ាន។
ភាពជាដៃគូរបស់ AmCham ជាមួយស្ថានទូតអាមេរិកត្រូវបានបង្ហាញតាមរយៈក្រុមប្រឹក្សាផ្តល់យោបល់សន្តិសុខបរទេស (OSAC)។ ជាស្ថាប័នមួយដែលដឹកនាំដោយមន្ត្រី Regional Security Officer របស់ស្ថានទូត។ AmCham ក៏បានចូលរួមនៅក្នុងក្រុមធុរកិច្ចក្នុងតំបន់ និងអន្តរជាតិផងដែរ។ យើងជាសមាជិកសមាគម AmChams នៅក្នុងតំបន់ជាយូរមកហើយ ដែលគេស្គាល់ថា APCAC ។
យើងក៏បានទៅចូលរួមកម្មវិធី Operation Doorknock ដែលប្រារព្ធឡើងនៅទីក្រុងវ៉ាស៊ីនតោន ឌីស៊ី រៀងរាល់រដូវក្តៅផងដែរ។ លើសពីនេះទៀត យើងបញ្ជូននាយកប្រតិបត្តិរបស់យើងទៅចូលរួមកិច្ចប្រជុំប្រចាំតំបន់របស់ EDs នៃ AmChams ក្នុងតំបន់។ យើងថែមទាំងបានរៀបចំកិច្ចប្រជុំបែបនេះកាលពីប៉ុន្មានឆ្នាំមុននៅខេត្តសៀមរាបផងដែរ។
AmCham នៅកម្ពុជាក៏បានចូលជាសមាជិកសភាពាណិជ្ជកម្មអាមេរិកនៅទីក្រុង Washington D.C។ យើងបានធ្វើទស្សនកិច្ចទៅកាន់សភាពាណិជ្ជកម្មសហរដ្ឋអាមេរិកជាច្រើនដងក្នុងរយៈពេលប៉ុន្មានឆ្នាំចុងក្រោយនេះ ហើយថ្មីៗនេះក៏មានអ្នកតំណាងជាន់ខ្ពស់បានមកទស្សនកិច្ចនៅកម្ពុជាដែរ។
យើងក៏មានកិច្ចសហការរឹងមាំជាមួយក្រុមប្រឹក្សាធុរកិច្ច US–ASEAN Business Council ជាសមាគមអាជីវកម្មដែលមានសាជីវកម្មធំៗជាច្រើន។ មានបេសកកម្មធុរកិច្ចមកកាន់ប្រទេសកម្ពុជាស្ទើរតែរៀងរាល់ឆ្នាំ។
ក្នុងចំណោមសាជីវកម្មធំៗដែលតំណាងនៅទីនេះរួមមាន កូកាកូឡា Chevron, Ford, GE, Dupont និងសាជីវកម្មជាច្រើនទៀត។
ក្រៅពីសហការជាមួយសហគមន៍ធុរកិច្ចជាតិក្នុងតំបន់ និងអន្ដរជាតិ AmCham ក៏មានកម្មវិធីសកម្មធ្វើការជាមួយរាជរដ្ឋាភិបាលកម្ពុជាផងដែរ ដើម្បីលើកកម្ពស់សេដ្ឋកិច្ច និងទំនាក់ទំនងរវាងកម្ពុជា-អាមេរិក។
ប៉ុន្មានឆ្នាំចុងក្រោយនេះ យើងបានរៀបចំកម្មពិធីជាច្រើនសម្រាប់មន្ត្រីរដ្ឋាភិបាល រួមមានមន្ត្រីមកពីក្រសួងពាណិជ្ជកម្ម អប់រំ ការងារ សាធារណៈការ និងសហការីក៏ដូចជាសមាជិករដ្ឋសភា និងអង្គភាពប្រឆាំងអំពើពុករលួយ ជាដើម។
AmCham ក៏ធ្វើការជាមួយសហគមន៍អាមេរិកទូទៅផងដែរ។ យើងចូលរួមក្នុងសកម្មភាពជាច្រើនរបស់សហរដ្ឋអាមេរិក ដូចជាពិធីជប់លៀងថ្ងៃទី ៤ ខែកក្កដា ពិធី Memorial Day, ពិធីបុណ្យ Thanksgiving, ពិធី Marine Corps Ball ព្រមទាំងព្រឹត្តិការណ៍ប្រចាំឆ្នាំដទៃទៀត។
ស្ថិតនៅក្រោមការដឹកនាំប្រកបដោយភាពឈ្លាសវៃ និងរឹងមាំរបស់ AmCham បច្ចុប្បន្ន ដែលដឹកនាំដោយលោក Allen Tan និងនាយកប្រតិបត្តិលោក Erich Phillips យើងបានមើលឃើញនូវការរីកចម្រើនយ៉ាងខ្លាំងជាមួយសមាជិក គណៈកម្មាធិការ និងសកម្មភាពផ្សេងៗ។
យើងបានទទួលការជួយជ្រោមជ្រែងពីសំណាក់គណៈអភិបាល និងបុគ្គលិកដែលមានសមត្ថភាព។ ដូច្នេះការរួមចំណែករបស់ AmCham ចំពោះទំនាក់ទំនងរវាងកម្ពុជា-អាមេរិកនឹងបន្តកាន់តែរឹងមាំថែមទៀតទៅថ្ងៃអនាគត៕
Bretton G. Sciaroni (ប្រធាន AmCham)
