សាលាអន្តរជាតិសិង្ហបុរី SCIA បានខិតខំប្រឹងប្រែងអនុវត្តពាក្យស្លោក «បំប៉នសិស្សដើម្បីត្រៀមខ្លួនសម្រាប់កម្លាំងការងារពេលអនាគតដែលកំពុងរីកចម្រើនយ៉ាងឆាប់រហ័ស»។
ជាងមួយឆ្នាំកន្លងមកនេះគ្រូបង្រៀននៅសាលា SCIA បានខិតខំបង្រៀននៅក្នុងកម្រិតផ្សេងៗគ្នាក្នុងព្រះរាជាណាចក្រកម្ពុជាដោយបានកែច្នៃរចនាប័ទ្មសិក្សាបែបចាស់ទៅជាការបង្រៀនបែបសម័យទំនើបដែលអនុញ្ញាតឱ្យសិស្សានុសិស្សអាចចាប់យកជំនាញច្រើនមុខមុនពេលពួកគេចេញទៅធ្វើការងារ។
ក្រៅពីកម្មវិធីសិក្សាដែលមានលក្ខណពិសេស លោកគ្រូអ្នកគ្រូដែលជាអ្នកត្រួសត្រាយផ្លូវបានបង្រៀនដល់សិស្សានុសិស្សនូវជំនាញពាក់ព័ន្ធផ្សេងៗរាប់ចាប់តាំងពីជំនាញភាពជាអ្នកដឹកនាំរហូតដល់ជំនាញជាសហគ្រិនវ័យក្មេងនៅសាលា SCIA ក្នុងរាជធានីភ្នំពេញ។ ការផ្លាស់ប្តូរគឺត្រូវការយ៉ាងឆាប់រហ័សហើយ SCIA កំពុងធ្វើវានៅក្នុងថ្នាក់រៀន។
ការផ្លាស់ប្តូរគឺតែងតែកើតឡើងនៅកន្លែងធ្វើការ ខណៈអាជីវកម្មមានការផ្លាស់ប្តូរយ៉ាងឆាប់រហ័សនៅក្រោមរលកនៃបច្ចេកវិទ្យាថ្មីៗអភិវឌ្ឍទៅមុខមិនចេះឈប់ឈរដែលនាំមកនូវឥទ្ធិពលដ៏ខ្លាំងក្លាទៅលើការងារ និងកម្លាំងពលកម្មដែលមានស្រាប់។ ជំនាញថ្មីៗជាច្រើនដែលអាចបង្កើនគុណភាពជីវិត និងបង្កើនផលិតភាពចាំបាច់គឺត្រូវចូលមកជំនួសប្រព័ន្ធអេកូឡូស៊ី ការងារបែបប្រពៃណីនៅពេលដែលនិយោជក និងនិយោជិតអាចត្រូវបង្ខំចិត្តកែប្រែរបៀបធ្វើការដើម្បីដើរឲ្យទាន់បច្ចេកវិទ្យាដែលកំពុងជឿនលឿននេះ។ ហេតុដូច្នេះទស្សនវិស័យឆ្ពោះទៅរកការអភិវឌ្ឍប្រព័ន្ធអប់រំ និងធនធានមនុស្សគឺត្រូវបានគេមើលឃើញតាមទស្សនវិស័យផ្សេងៗគ្នា។
ក្រៅពីការអភិវឌ្ឍជំនាញរឹងដើម្បីបំពេញតាមតម្រូវការជាច្រើននាពេលបច្ចុប្បន្ននេះនិស្សិតដែលទើបបញ្ចប់ការសិក្សាក៏ត្រូវការជំនាញទន់ជាចាំបាច់ដែរ។ សមត្ថភាពទេពកោសល្យក្នុងការប្រាស្រ័យទាក់ទងប្រកបដោយប្រសិទ្ធភាព ការគិតស៊ីជម្រៅការដោះស្រាយបញ្ហា និងការធ្វើការងារជាក្រុម គឺជាជំនាញទន់ដែលមានតម្រូវការខ្ពស់ពីនិយោជកនៅក្នុងឧស្សាហកម្មនៃយុគសម័យនេះ។
លោក Anselm Chu នាយកគ្រប់គ្រងសាលាអន្តរជាតិ SCIA បានឲ្យកាសែតភ្នំពេញប៉ុស្តិ៍ដឹងថា «ពិភពលោកកំពុងផ្តោតទៅលើជំនាញនៅក្នុងសតវត្សរ៍ទី ២១ នេះ។ យើងលែងនៅក្នុងដំណើរការបដិវត្តន៍តាមបែបប្រពៃណីទៀតហើយ។ បច្ចុប្បន្នគឺបដិវត្តន៍ឧស្សាហកម្មជំនាន់ទី ៤.០ ខណៈក្រុមហ៊ុននានាបានប្រកាសអំពីបណ្តាញ 5G (បណ្តាញទូរគមនាគមន៍ជំនាន់ទី ៥)»។
គាត់យល់ស្របថា យោងតាមរបាយការណ៍របស់វេទិកាសេដ្ឋកិច្ចពិភពលោកឆ្នាំ ២០១៦ ស្តីពី «អនាគតការងារ និងជំនាញ» បានព្រមានអំពីការផ្លាស់ប្តូរយ៉ាងខ្លាំងក្លានេះ។ របាយការណ៍នោះបានឱ្យដឹងថា៖ «យោងតាមការប៉ាន់ប្រមាណក្មេងប្រមាណ ៦៥ ភាគរយដែលកំពុងសិក្សានៅថ្នាក់បឋមសិក្សាសព្វថ្ងៃនេះពួកគេនឹងធ្វើការនៅក្នុងប្រភេទការងារថ្មីទាំងស្រុងដែលមិនទាន់មាននៅឡើយ»។
ប៉ុន្តែតើស្ថាប័នអប់រំនៅកម្ពុជាបានត្រៀមខ្លួនរួចហើយឬនៅដើម្បីឆ្លើយតបនឹងបញ្ហាប្រឈមថ្មីនេះ?
ខណៈប្រព័ន្ធអប់រំរបស់កម្ពុជាត្រូវបានគេមើលថាមានភាពប្រសើរឡើងនារយៈពេលជាច្រើនឆ្នាំកន្លងមកនេះ ប៉ុន្តែយើងនៅត្រូវការគ្រូបង្រៀនដើម្បីរៀបចំសិស្សសម្រាប់ទីផ្សារការងារដែលកំពុងផ្លាស់ប្តូរយ៉ាងឆាប់រហ័សនេះ។ លោក Chu បានបន្ថែមថា៖ «ឧស្សាហកម្មគឺកំពុងផ្លាស់ប្តូរយ៉ាងឆាប់រហ័សដែលធ្វើឲ្យមានគម្លាតជំនាញ។ និស្សិតដែលទើបបញ្ចប់ការសិក្សានៅទូទាំងពិភពលោកកំពុងប្រឈមនឹងបញ្ហានេះដូច្នេះក្រុមហ៊ុននានាចាំបាច់ត្រូវវិនិយោគដើម្បីបណ្តុះបណ្តាលពួកគេ។ [យើង] ត្រូវការជំនាញច្រើនបន្ថែមទៀត។ ជាទូទៅគ្រប់ប្រទេសគឺប្រឈមនឹងបញ្ហានេះ [មិនអាចផ្តល់ជំនាញដល់និស្សិតដែលឧស្សាហកម្មត្រូវការ]។ ដូច្នេះហើយសាលារៀនត្រូវសម្លឹងមើលបរិបទឲ្យបានធំទូលាយមិនគ្រាន់តែសំដៅលើចំណាត់ថ្នាក់ និងការប្រឡងនោះទេ»។
ជំនាញនៅក្នុងសតវត្សរ៍ទី ២១ នេះគឺគ្មានអ្វីស្មុគស្មាញទេគឺវាត្រឡប់ទៅកម្រិតមូលដ្ឋានវិញ។ សាលាអាចផ្តល់នូវវេទិកាសម្រាប់ទំនាក់ទំនង ការសហការ និងការកសាងសមត្ថភាព។ លោក Chu បានពន្យល់ថា៖ «ទំនាក់ទំនងគឺមានសារៈសំខាន់ណាស់។ ប្រសិនបើអ្នកមិនអាចទាក់ទងគេបានទេនោះគ្មាននរណាម្នាក់អាចយល់ពីអ្នកបានឡើយ។ សម្រាប់កិច្ចសហការគម្រោងការងារជាក្រុម និងសកម្មភាពកម្មវិធីសិក្សារួមផ្សំ (CCAs) ផ្តល់ឱកាសដល់សិស្សឲ្យចេះសហការគ្នា។ មានន័យថាសិក្សាលើសពីនៅថ្នាក់រៀន។ ហើយចំណុចទីបីគឺសមត្ថភាព។ គ្រូបង្រៀន និងអ្នកផ្តល់ការអប់រំទាំងអស់ត្រូវតែដឹងថាតើសមត្ថភាពអ្វីដែលចាំបាច់ដើម្បីត្រៀមសម្រាប់ពេលអនាគត»។
លោក Chu បានសរុបថា៖ «ជាមួយកម្មវិធីសិក្សាជំនាញ STEM (វិទ្យាសាស្ត្របច្ចេកវិទ្យា វិស្វកម្ម និងគណិតវិទ្យា) សាលាអន្តរជាតិ SCIA បានរួមបញ្ចូលភាពជាអ្នកដឹកនាំ និងសហគ្រិនភាពជាចាំបាច់នៅក្នុងកម្មវិធីសិក្សារបស់ខ្លួន។ អ្នកត្រូវការទាំងជំនាញភាពជាអ្នកដឹកនាំ និងផ្នត់គំនិតជាសហគ្រិនដើម្បីដោះស្រាយជាមួយស្ថានភាព និងបញ្ហាប្រឈមនានា។ សាលារៀនមិនអាចផ្អែកតែទៅលើសៀវភៅ និងការដាក់ពិន្ទុលើការសិក្សានោះទេ ប៉ុន្តែត្រូវសម្លឹងមើលរូបភាពធំជាងនេះគឺការអភិវឌ្ឍជារួមដល់សិស្សានុសិស្ស ឬនៅសាលាអន្តរជាតិ SCIA គំរូរៀនសូត្រតាមបែបការសិក្សារួមគ្នា (HELM) ដែលរួមបញ្ចូលក្នុងកម្មវិធីសិក្សាដែលជួយអភិវឌ្ឍទាំងជំនាញទន់ និងជំនាញរឹងដល់សិស្សានុសិស្សរបស់ខ្លួន»៕