មជ្ឈមណ្ឌលសហប្រតិបត្តិការកម្ពុជា - ជប៉ុន (CJCC) បានដើរតួនាទីយ៉ាងសំខាន់នៅក្នុងការអភិវឌ្ឍធនធានមនុស្សដើម្បីឆ្លើយតបទៅនឹងកំណើនសេដ្ឋកិច្ចលូតលាស់ដ៏ឆាប់រហ័សរបស់កម្ពុជា ហើយគិតចាប់តាំងពីឆ្នាំ ២០០៤ រហូតដល់បច្ចុប្បន្ន CJCC បណ្តុះបណ្តាលសិក្ខាកាមបានប្រមាណ ២៥ ០០០ នាក់។
«តាមរយៈសកម្មភាពរបស់យើងដែលមានដូចជាការអភិវឌ្ឍធនធានមនុស្សគឺយើងបានបណ្តុះបណ្តាល (ពលរដ្ឋកម្ពុជា) ជាច្រើននាក់ ហើយពួកគាត់មួយចំនួនបានចូលរួមយ៉ាងសកម្មនៅក្នុងវិស័យអាជីវកម្ម»។
លោកបណ្ឌិត ឃឹម លាង នាយក មជ្ឈមណ្ឌលសហប្រតិបត្តិការកម្ពុជា - ជប៉ុន (CJCC) បានឲ្យកាសែតភ្នំពេញប៉ុស្តិ៍ដឹងថា៖ «ក្រៅពីផ្តល់ការបណ្តុះបណ្តាលយើងក៏បានធ្វើការរួមគ្នាជាមួយក្រុមហ៊ុនផ្សេងៗតាមរយៈវគ្គបណ្តុះបណ្តាល និងបានអញ្ជើញពួកគាត់ឱ្យមកចែករំលែកបទពិសោធអាជីវកម្មជាមួយសិក្ខាកាមរបស់យើងដែរ។ អ្នកដែលបានបញ្ចប់វគ្គបណ្តុះបណ្តាលនៅទីនេះមួយចំនួនពួកគេបានចាប់ផ្តើមបង្កើតអាជីវកម្មផ្ទាល់ខ្លួន»។
មជ្ឈមណ្ឌលសហប្រតិបត្តិការកម្ពុជា - ជប៉ុន CJCC ផ្តោតលើចំណុចសំខាន់ៗចំនួន ៣ គឺការអភិវឌ្ឍធនធានមនុស្ស កម្មវិធីបណ្តុះបណ្តាលភាសាជប៉ុន និងកម្មវិធីផ្លាស់ប្តូរវប្បធម៌ និងកម្មវិធីសិក្សាដែលជាផ្នែកមួយនៃតួនាទីរបស់ខ្លួននៅក្នុងការលើកកម្ពស់ទំនាក់ទំទងទ្វេភាគីរវាងកម្ពុជា-ជប៉ុន។
អង្គការនេះត្រូវបានគាំទ្រដោយរាជរដ្ឋាភិបាលកម្ពុជាតាមរយៈក្រសួងអប់រំ យុវជន និងកីឡា និងទទួលបានការគាំទ្រពីរដ្ឋាភិបាលជប៉ុនដែលតំណាងដោយទីភ្នាក់ងារសហប្រតិបត្តិការអន្តរជាតិជប៉ុន (JICA) និង មូលនិធិជប៉ុន (JF)។
លោក បណ្ឌិត ឃឹម លាង ថ្លែងថា៖ «ចំពោះវគ្គបណ្តុះបណ្តាលអាជីវកម្ម CJCC បានបណ្តុះបណ្តាលសិក្ខាកាមបានប្រមាណ ២៥ ០០០ នាក់ហើយសិស្សដែលបានបញ្ចប់វគ្គសិក្សាភាសាជប៉ុនមានប្រមាណ ១០ ០០០ នាក់។ ចំពោះកម្មវិធីផ្លាស់ប្តូរវប្បធម៌ និងកម្មវិធីសិក្សាគឺយើងបានទទួលនិស្សិតជាច្រើននាក់មកពីជប៉ុន។ និស្សិតទាំងនោះផ្តោតលើកម្មវិធីអប់រំ និងវប្បធម៌។
ពួកគេបានចុះបំពេញទស្សនកិច្ចសិក្សានៅតាមសាកលវិទ្យាល័យ និងវិទ្យាល័យជាច្រើនក្នុងប្រទេសកម្ពុជា។ ចំពោះវគ្គបណ្តុះបណ្តាលអាជីវកម្មយើងមានប្រធានបទជាច្រើនដូចជាវគ្គបណ្តុះបណ្តាលជំនាញភាពជាអ្នកដឹកនាំ និងសហគ្រិនភាពជាដើមដែលជាវគ្គសិក្សាសំខាន់នៅមជ្ឈមណ្ឌល CJCC»។
លោកបានបន្ថែមថាលើសពីនេះទៀតមជ្ឈមណ្ឌល CJCC ក៏ផ្តល់ជូនទីកន្លែងសម្រាប់ការពិភាក្សា និងចែករំលែកបទពិសោធ ដើម្បីចាប់ផ្តើមសហគ្រាសធុនតូច និងមធ្យម (SMEs) ផងដែរ។
លោកបណ្ឌិតថ្លែងថា៖ «ចាប់តាំងពីបង្កើតមជ្ឈមណ្ឌលនេះមក CJCC មានការរីកចម្រើនជាលំដាប់ដែលជាកម្លាំងចលករមួយដ៏សំខាន់ជួយជំរុញដល់កំណើនសហគ្រិនភាព និងសហគ្រាសធុនតូច និងមធ្យមនៅកម្ពុជាតាមតាមរយៈការអភិវឌ្ឍធនធានមនុស្សឲ្យមានជំនាញច្បាស់លាស់ស្របតាមស្តង់ដាទីផ្សារ»។
លោកបន្ថែមថាវគ្គបណ្តុះបណ្តាលសហគ្រិនរួមមានការគ្រប់គ្រងបែបស្តង់ដាជប៉ុនក្នុងនោះមានដូចជាភាពជាអ្នកដឹកនាំ ការគ្រប់គ្រងពេលវេលា ការគ្រប់គ្រងហិរញ្ញវត្ថុ និងសាជីវកម្មដែលទាំងអស់នេះគឺពាក់ព័ន្ធទៅនឹងសេដ្ឋកិច្ចកម្ពុជាដែលកំពុងរីកលូតលាស់។
លោកបានឲ្យដឹងទៀតថា៖ «នៅក្នុងប្រទេសកម្ពុជាជាពិសេសនៅក្នុងឧស្សាហកម្មផលិតកម្មគឺយើងនៅខ្វះខាតអ្នកជំនាញ។
ដូច្នេះដើម្បីជំរុញដល់កំណើនសេដ្ឋកិច្ចជាដំបូងគឺយើងត្រូវមានធនធានមនុស្សរឹងមាំជាពិសេសសម្រាប់សហគ្រាសធុនតូច និងមធ្យម និងវិស័យសហគ្រិន»។
លោកបណ្ឌិត ឃឹម លាង បានបន្ថែមថា៖ «នៅកម្ពុជាយើងមានសហគ្រាសធុនតូច និងមធ្យម (SMEs) ប៉ុន្តែជាទូទៅប្រតិបត្តិការអាជីវកម្មជាលក្ខណៈគ្រួសារ ហើយពួកគេមិនមានរចនាសម្ព័ន្ធអាជីវកម្មត្រឹមត្រូវនោះទេ។ ដូច្នេះហើយទើបមជ្ឈមណ្ឌល CJCC បានដើរតួនាទីយ៉ាងសំខាន់នៅក្នុងការអភិវឌ្ឍធនធានមនុស្សជាពិសេសសហគ្រិនភាព។ សិក្ខាកាមមួយចំនួនបានបង្កើតស្ថាប័នបណ្តុះបណ្តាលស្រដៀងគ្នាទៅនឹងមជ្ឈមណ្ឌល CJCC នេះដែរ»។
លោកលើកឡើងថាបញ្ហាប្រឈមដែល CJCC ជួបប្រទះគឺការទាក់ទាញសិក្ខាកាមឲ្យមកចូលរួមវគ្គបណ្តុះបណ្តាលរបស់ខ្លួនពីព្រោះថាបច្ចុប្បន្នមានស្ថាប័នបណ្តុះបណ្តាលជាច្រើនត្រូវបានបង្កើតឡើងដូច្នេះសិក្ខាកាមពួកគាត់មានជម្រើសច្រើន។
ក្រៅពីវគ្គបណ្ដុះបណ្ដាលទាំងនេះ CJCC ក៏ព្យាយាមធ្វើឲ្យមានទំនាក់ទំនងរវាងពាណិជ្ជករកម្ពុជា និងជប៉ុនផងដែរ ខណៈដែលវិនិយោគិនមកពីជប៉ុនស្វែងរកឱកាសអាជីវកម្មនៅកម្ពុជាកាន់តែកើនឡើង។
លោកបន្តថា៖ «យើងក៏បានបង្កើតសមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) ផងដែរ។ សមាគមនេះបង្កើតឡើងក្នុងគោលបំណងចង់ឲ្យពាណិជ្ជករកម្ពុជា និងជប៉ុនបានរៀនសូត្រពីគ្នា និងដើម្បីបង្កើនសមត្ថភាពអាជីវកម្មតាមរយៈបណ្តាញ»។
ដើម្បីលើកកម្ពស់វប្បធម៌ និងភាសាជប៉ុនមជ្ឈមណ្ឌល CJCC បានរៀបចំព្រឹត្តិការណ៍ចំនួន ២ ជារៀងរាល់ឆ្នាំក្នុងនោះមានមហោស្រពគីហ្សូណា (Kizuna) និងពិធីបុណ្យតាណាបាតា (Tanabata)។
មហោស្រពគីហ្សូណាជាព្រឹត្តិការណ៍ធំបំផុតប្រចាំឆ្នាំគោលបំណងគឺបង្ហាញអំពីវប្បធម៌ និងប្រពៃណីបែបបុរាណ និងសម័យរបស់ជប៉ុន និងកម្ពុជាហើយក៏ដើម្បីលើកកម្ពស់ការផ្លាស់ប្តូរវប្បធម៌រវាងប្រជាជននៃប្រទេសទាំង ២ ផងដែរ។
ចំពោះមហោស្រពគីហ្សូណានៅក្នុងឆ្នាំនេះនឹងប្រព្រឹត្តទៅចាប់ពីថ្ងៃទី ២១ ដល់ ២៤ ខែកុម្ភៈ ឆ្នាំ ២០១៩ ក្រោមប្រធានបទ «បទពិសោធរួមគ្នា»។
ខណៈពិធីបុណ្យតាណាបាតា (Tanabata) ភាគច្រើនគឺផ្តោតលើវប្បធម៌ជប៉ុនមានដូចជាការបង្ហាញក្បាច់គុន ការ៉ាតេ ការរៀបចំផ្កា ការតាំងបង្ហាញនឹងភ្លក់ម្ហូបជប៉ុននឹងការស្លៀកសម្លៀកបំពាក់ប្រពៃណីជប៉ុន Yukata ជាដើម។
មជ្ឈមណ្ឌល CJCC មានទីតាំងស្ថិតនៅក្នុងបរិវេណសាកលវិទ្យាល័យភូមិន្ទភ្នំពេញមានបុគ្គលិកសរុបប្រមាណ ៧០ នាក់ក្នុងនោះក៏មានបុគ្គលិកជាជនជាតិជប៉ុនចំនួន ៧ នាក់ផងដែរ។
បច្ចុប្បន្នមានក្រុមហ៊ុនជប៉ុនជាង ៣០០ ដែលបានចុះបញ្ជីនៅក្នុងព្រះរាជាណាចក្រកម្ពុជាហើយមានពលរដ្ឋជប៉ុនប្រមាណ ២០០០ នាក់កំពុងធ្វើការនៅក្នុងប្រទេសកម្ពុជា៕