ស្ពានឆ្លងកាត់ទន្លេមេគង្គតភ្ជាប់ស្រុកក្រូចឆ្មារ និងស្រុកស្ទឹងត្រង់ ក្នុងប្រទេស កម្ពុជា ដែលមានទីតាំងស្ថិតនៅចម្ងាយប្រមាណ ៣០ គីឡូម៉ែត្រ ភាគខាងជើងទីរួមខេត្តកំពង់ចាម គឺជាស្ពានឆ្លងកាត់ទន្លេមេគង្គដ៏ធំ ដែលមាន (ប្រវែង ១ ១៣១ ម៉ែត្រ និងទទឹង ១៣,៥ ម៉ែត្រ) និងផ្លូវតភ្ជាប់តាមបច្ចេកវិទ្យាផ្លូវហាយវ៉េ Class II ដែលមានចែងនៅក្នុងស្តង់ដាបច្ចេកទេសវិស្វកម្មផ្លូវ ហាយវ៉េ ចេញដោយក្រសួងដឹកជញ្ជូននៃសាធារណរដ្ឋប្រជាមានិតចិន។
គម្រោងចំណាយសម្រាប់ការសាងសង់ស្ពាននេះ ជាហិរញ្ញប្បទានសម្បទានពីរដ្ឋាភិបាលចិន អនុវត្តគម្រោងសម្រាប់ក្រសួងសាធារណការ និងដឹកជញ្ជូនកម្ពុជា និងទទួលការសាងសង់ដោយក្រុមហ៊ុន Shanghai Construction Group Co., Ltd។
ទន្លេមេគង្គ គឺជាទន្លេធំជាងគេនៅតំបន់អាស៊ីអាគ្នេយ៍ ហើយប្រវែងទន្លេមេគង្គនៅក្នុងខេត្តកំពង់ចាម ក្រចេះ និងខេត្តស្ទឹងត្រែង ភាគខាងជើងប្រទេស កម្ពុជា មានប្រវែងជាង ៣០០ គីឡូម៉ែត្រ ប៉ុន្តែមានស្ពានឆ្លងកាត់ទន្លេដ៏ធំនេះតែ ២ ប៉ុណ្ណោះ។
ស្ពានឆ្លងកាត់ទន្លេមេគង្គថ្មីនេះ មានទីតាំងស្ថិតនៅចន្លោះស្ពានឆ្លងកាត់ទន្លេចំនួន ២ ដែលមានស្រាប់ ដែលភ្ជាប់ខេត្តត្បូងឃ្មុំ និងខេត្តកំពង់ចាម។ នៅពេលសាងសង់រួច វាអាចភ្ជាប់បណ្តាញផ្លូវ នៃច្រាំងទន្លេទាំង ២ និងកាត់បន្ថយចម្ងាយធ្វើដំណើរពីតំបន់កណ្តាល និងតំបន់ភាគខាងជើង ទៅតំបន់ភាគខាងកើតនៃប្រទេស កម្ពុជា។
ស្ពាននេះពិតជាមានសារៈសំខាន់ខ្លាំងណាស់ សម្រាប់ការធ្វើដំណើររបស់ប្រជាជនក្នុងតំបន់ និងការអភិវឌ្ឍសេដ្ឋកិច្ចនៅភាគកណ្តាល និងភាគខាងជើងប្រទេស កម្ពុជា។
ពិធីបើកការដ្ឋានសាងសង់ត្រូវបានធ្វើឡើងកាលពីថ្ងៃទី ៩ ខែ កុម្ភៈ ឆ្នាំ ២០១៨ ក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន សែន និងឯកអគ្គរដ្ឋទូតចិនប្រចាំកម្ពុជា រួមនឹងប្រជាពលរដ្ឋក្នុងតំបន់ប្រមាណជាង ៦ ៥០០ នាក់ផ្សេងទៀត។
នៅក្នុងពិធីដ៏អធិកអធមនោះលោកនាយករដ្ឋមន្ត្រី ហ៊ុន សែន មានប្រសាសន៍ថា គម្រោងនេះគឺជាស្ពានទី ៣ ឆ្លងកាត់ទន្លេមេគង្គ ដែលត្រូវបានសាងសង់នៅក្នុងប្រទេស កម្ពុជា ជាមួយនឹងជំនួយរបស់ចិន។ ស្ពាននីមួយៗ គឺជាសក្ខីភាពនៃចំណងមិត្តភាពរវាងចិន និងកម្ពុជា។
ចំណងមិត្តភាព និងកិច្ចសហប្រតិបត្តិការរវាងកម្ពុជាចិននឹងនាំមកនូវផ្លែផ្កាដ៏ធំសម្រាប់ការអភិវឌ្ឍ សេដ្ឋកិច្ចនៃប្រទេសទាំងពីរ និងរួមចំណែកដល់ការកសាងសហគមន៍រីកចម្រើន និងសុខដុមរមនាសម្រាប់ប្រជាពលរដ្ឋ។
កាលពីខែ មេសា ឆ្នាំ ២០១៩ អ្នកកាសែតរបស់ទូរទស្សន៍ CCTV ចិនបានធ្វើបទសម្ភាសអំពីគម្រោងនេះ ដោយបានផលិតកម្មវិធីពិសេសមួយដែលមានឈ្មោះថា៖ «ស្ពានក្រូចឆ្មារ៖ កសាងស្ពានមិត្តភាពរវាងចិន និងកម្ពុជា»។
កម្មវិធីនេះត្រូវបានចាក់ផ្សាយនៅលើកញ្ចក់ទូរទស្សន៍ CCTV ដែលជាផ្នែកមួយនៃគំនិតផ្តួចផ្តើមគម្រោងខ្សែក្រវាត និងផ្លូវ ដែលទទួលបានការគាំទ្រយ៉ាងខ្លាំងពីគ្រប់វិស័យនៃសង្គមចិន និងសង្គមកម្ពុជា។
គិតត្រឹមចុងខែ សីហា ឆ្នាំ ២០១៩ ការងារសរុបនៃគម្រោងនេះត្រូវបានបញ្ចប់ប្រមាណ ៧០ ភាគរយ ហើយរំពឹងថាបញ្ចប់ និងបើកឲ្យធ្វើចរាចរណ៍នៅចុងឆ្នាំ ២០២០ ខាងមុខ។ ប្រទេស កម្ពុជា គឺជាចំណុចដ៏សំខាន់នៃផ្លូវសូត្រសមុទ្រក៏ដូចជាចំណុចដ៏សំខាន់សម្រាប់ការកសាងវិថីសូត្រសមុទ្រសតវត្សរ៍ទី ២១ (21st-Century Maritime Silk Road) ផងដែរ។
ការស្ថាបនាគម្រោងនេះនឹងជួយលើកកម្ពស់គំនិតផ្តួចផ្តើមខ្សែក្រវាត់ និងផ្លូវ ដែលចាប់ផ្តើមនៅក្នុងតំបន់អាស៊ីអាគ្នេយ៍។ ប្រជាជនកម្ពុជាបានហៅគម្រោងនេះថា «ស្ពានសុបិន» (Dream Bridge) នៃការអភិវឌ្ឍ នៅតំបន់កណ្តាល និងខាងជើងនៃប្រទេស កម្ពុជា។ ស្ពានក្រូចឆ្មារឆ្លងកាត់ទន្លេមេគង្គនេះបានធ្វើឲ្យចំណងមិត្តភាពរវាងប្រជាជនចិន និងប្រជាជនកម្ពុជាកាន់តែស៊ីជម្រៅមួយកម្រិតថែមទៀត៕