ទស្សនីយភាពប្រាសាទនៅសៀមរាប។ (រូបថត សហការី)
ឧទ្យានបុរាណអង្គរនៅតែបន្តស្វែងរកចំណូលទេសចរណ៍បានយ៉ាងសន្ធឹកសន្ធាប់ប្រមាណក្បែរ ១០០ លានដុល្លារសម្រាប់ប្រទេស កម្ពុជា តាមរយៈការសំបុត្រចូលទស្សនារបស់វាទោះបីជាមានការដំឡើងថ្លៃសំបុត្រកាលពីឆ្នាំទៅដោយសារតែជនបរទេសយ៉ាងច្រើនកុះករនៅតែបន្តមកទស្សនាប្រាសាទដ៏ល្អមួយនេះ។
.jpg)
អាជ្ញាធរមូលដ្ឋានដែលគ្រប់គ្រងបណ្ដុំប្រាសាទនោះបានប៉ាន់ប្រមាណថាតួលេខអាចនឹងកើនដល់ ១១៧ លានដុល្លារនៅចុងឆ្នាំជាមួយនឹងចំនួនអ្នកទេសចរបរទេសប្រហែលជា ២.៦ លាននាក់ដែលមកទស្សនាប្រាសាទអង្គរវត្តក្នុងខេត្ត សៀមរាប នៃប្រទេស កម្ពុជា។
អង្គរវត្ត នៅតែជាប្រាសាទបុរាណដែលរកប្រាក់ចំណូលបានច្រើនជាងគេបើយើងប្រៀបធៀបជាមួយនឹងតំបន់សម្បតិ្តបេតិកភណ្ឌពិភពលោកល្បី ២ ផ្សេងទៀតគឺប្រាសាទព្រះវិហារដែលស្ថិតក្នុងខេត្តព្រះវិហារ និងតំបន់បុរាណវិទ្យាប្រាសាទសំបូរព្រៃគុកដែលស្ថិតនៅក្នុងខេត្តកំពង់ធំ។
«ចំនួនអ្នកទេសចរបានកើនឡើង ៧ ភាគរយនៅក្នុងឆ្នាំនេះ ហើយអ្នកទេសចរមកពីប្រទេសចំនួន ១៩៣ បានធ្វើដំណើរមកទស្សនាប្រាសាទនេះដោយ ៤៣ ភាគរយនៃចំនួនអ្នកទេសចរសរុបមានប្រភពមកពីប្រទេស ចិន»។
លោក លី សែ ដែលជានាយកប្រតិបត្តិនៃអង្គរអិនធឺប្រាយបានប្រាប់កាសែតភ្នំពេញប៉ុស្តិ៍ថា៖ «អ្នកទេសចរបរទេសនៅតែបន្តធ្វើដំណើរមកទស្សនាប្រាសាទបេតិកភណ្ឌមួយនេះហើយបើនៅក្នុងអំឡុងពេលមានអ្នកទេសចរច្រើនវិញនោះកន្លែងនោះគឺមានសភាពពេញណែនតែម្ដង។ សូម្បីតែយើងចង់ធ្វើការកក់បន្ទប់សណ្ឋាគារក៏វាពិបាកដែរ»។
លី សែ: យើងត្រូវការហេដ្ឋារចនាសម្ព័ន្ធបន្ថែមទៀត
កាលពីខែកុម្ភៈឆ្នាំទៅ អាជ្ញាធរបានដំឡើងថ្លៃចូលទស្សនានៅក្នុងតំបន់បេតិកភណ្ឌពិភពលោកយូណេស្កូសម្រាប់អ្នកទេសចរបរទេសរហូតដល់ ៣៧ ដុល្លារសម្រាប់ការចូលទស្សនា ១ ថ្ងៃ ៦២ ដុល្លារសម្រាប់សំបុត្រចូលទស្សនាចំនួន ៣ ថ្ងៃ និង ៧២ ដុល្លារសម្រាប់ការចូលទស្សនាពេញ ១ សប្ដាហ៍។ដោយមុនពេលដំឡើងថ្ងៃចូលទស្សនាថ្លៃចូលទស្សនាសម្រាប់ ១ ថ្ងៃគឺ ២០ ដុល្លារ ហើយ ៤០ ដុល្លារសម្រាប់ការចូលទស្សនាចំនួន ៣ ថ្ងៃនិង ៦០ ដុល្លារសម្រាប់ការចូលទស្សនាពេញ ១ សប្ដាហ៍។
ខណៈពេលដែលចំណូលបានពីភ្ញៀវទេសចរនៅតែបន្តហូរចូល ដូច្នេះអ្នកបង្កើតគោលនយោបាយកំពុងតែសិក្សាលើយុទ្ធសាស្ត្រផ្សេងៗទៀតដើម្បីទាក់ទាញទេសចរបរទេសឲ្យបានច្រើនបន្ថែមទៀតនៅពេលដែលវិស័យទេសចរណ៍ក្នុងតំបន់កំពុងតែមានការប្រកួតប្រជែងខ្លាំង ហើយប្រទេសជិតខាងមានដូចជាប្រទេស ថៃ ឥណ្ឌូនេស៊ី និងហ្វីលីពីនកំពុងតែដុតដៃដុតជើងផ្សព្វផ្សាយពីផលិតផលទេសចរណ៍របស់ពួកគេ។
ការមកដល់នៃភ្ញៀវទេសចរដែលមកទស្សនាប្រាសាទនេះបានបង្ហាញពីសញ្ញានៃការធ្លាក់ចុះនៅក្នុងឆ្នាំជាមួយនឹងកំណើនប្រហែលជា ៧ ភាគរយ បើប្រៀបធៀបជាមួយនឹងកំណើន ១២ ភាគរយកាលពីឆ្នាំទៅ។ នៅឆ្នាំនេះគិតរហូតដល់ថ្ងៃទី ២០ ខែធ្នូ មានភ្ញៀវទេសចរចំនួន ២.៥៥ លាននាក់បានធ្វើដំណើរមកទស្សនាប្រាសាទនេះ។
ភ្ញៀវទេសចរទិញសំបុត្រនៅ Angkor Enterprise Complex ។ (រូបថត សហការី)
លោកបានបន្ថែមថា៖ «វាពិតជាពិបាកសម្រាប់ពួកយើងក្នុងការរក្សាកំណើន ២ ខ្ទង់ជារៀងរាល់ឆ្នាំ ព្រោះថា អ្នកទេសចរទាំងអស់នោះពួកគេមកទស្សនាប្រាសាទ ហើយវាមិនដូចជាការទៅដើរទិញអីវ៉ាន់ដូចនៅក្នុងប្រទេស សិង្ហបុរី ឬក៏នៅប្រទេស ម៉ាឡេស៊ី នោះទេ។ យើងត្រូវតែរំពឹងថានឹងមានអ្នកថ្មីមកទស្សនា»។
អាជ្ញាធរកំពុងតែព្យាយាមងាកទៅលើកម្លាំងរបស់បច្ចេកវិទ្យា ជាពិសេសសម្រាប់ការលក់សំបុត្រចូលទស្សនាប្រាសាទ និងការរក្សានូវលំហូរថេរនៃចំនួនអ្នកទេសចរជារៀងរាល់ឆ្នាំ។
លោកបានថ្លែងថា ចំណុចមួយក្នុងចំណោមចំណុចសំខាន់ៗនៃការយកចិត្តទុកដាក់នោះគឺ ការសម្រួលដល់ការលក់សំបុត្រចូលទស្សនាអង្គរវត្ត តាមរយៈការអនុញ្ញាតឲ្យសណ្ឋាគារជាអ្នកលក់សំបុត្រ និងជួយផ្សព្វផ្សាយអំពីការកក់តាមប្រព័ន្ធអនឡាញ ហើយការធ្វើតេស្តសាកល្បងក៏ត្រូវប្រព្រឹត្តទៅមុនពេលប្រព័ន្ធទាំងអស់នេះត្រូវបានដាក់ឲ្យអនុវត្តពេញលេញ។
នាពេលបច្ចុប្បន្ននេះ អ្នកទេសចរត្រូវទិញសំបុត្ររបស់ពួកគេនៅឯ Angkor Enterprise ស្ថិតនៅក្នុងខេត្តសៀមរាប មានចម្ងាយប្រហែលជា ៥ គីឡូម៉ែត្រពីទីតាំងប្រាសាទ ដែលអាចនឹងមានសភាពមមាញឹកបន្តិច នៅម៉ោងដែលបញ្ជរលក់សំបុត្រមានមនុស្សច្រើន។
អាជ្ញាធរមានគម្រោងលក់សំបុត្រតាម Online ដើម្បីសម្រួលការរង់ចាំ។
រដ្ឋាភិបាលក៏កំពុងតែអនុវត្តគម្រោងយុទ្ធសាស្ត្រអភិវឌ្ឍន៍វិស័យទេសចរណ៍ឆ្នាំ ២០១២ ដល់ ២០២០ ដើម្បីធ្វើការអភិវឌ្ឍឧស្សាហកម្មទេសចរណ៍ និងទាក់ទាញវិនិយោគទុនបន្ថែមទៀត ធ្វើយ៉ាងណាធ្វើឲ្យប្រសើរឡើងនូវហេដ្ឋារចនាសម្ព័ន្ធ និងបង្កើតផលិតផលទេសចរណ៍ថ្មីៗនៅក្នុងប្រទេស។
វិស័យទេសចរណ៍កម្ពុជាកំពុងតែស្គាល់រសជាតិនៃកំណើនគួរឲ្យកត់សម្គាល់ ខណៈដែលជនបរទេសកំពុងតែសម្រុកចូលមកទស្សនាសម្រស់ធម្មជាតិ និងតំបន់ទេសចរណ៍វប្បធម៌របស់កម្ពុជា។ បើតាមក្រសួងទេសចរណ៍កាលពីឆ្នាំទៅ ព្រះរាជាណាចក្រកម្ពុជារកចំណូលទេសចរណ៍បាន ៣.៦៣ ពាន់លានដុល្លារ ដែលបានកើនឡើង ១៣ ភាគរយបើធៀបជាមួយឆ្នាំកន្លងទៅ។
មានអ្នកទេសចរបរទេសច្រើនជាង ៣ លាននាក់បានមកទស្សនាប្រាសាទ នៅក្នុងឆមាសទី ១ នៃឆ្នាំនេះហើយរដ្ឋាភិបាលកំពុងតែដាក់គោលដៅធ្វើយ៉ាងណាអាចទទួលអ្នកទេសចរបរទេសឲ្យបានរហូតដល់ ៦.២ លាននាក់នៅឆ្នាំ ២០១៨ ហើយនឹងកើនដល់ ៧ លាននាក់នៅឆ្នាំ ២០២០។
អ្នកទេសចរជនជាតិចិនគឺឈរនៅលំដាប់ទី ១ តែម្ដង តាមពីក្រោមដោយអ្នកទេសចរមកពីប្រទេស វៀតណាម ឡាវ ថៃ និងកូរ៉េខាងត្បូង។
កាលពីឆ្នាំមុន ចំណូលសរុបនៃវិស័យការធ្វើដំណើរ និងទេសចរណ៍មានចំនួនរហូតទៅដល់ ៧ ពាន់លានដុល្លារឬក៏ស្មើនឹង ៣២.៤ ភាគរយនៃផលិតផលក្នុងស្រុកសរុប ហើយវិស័យនេះទៀតសោតបានជួយបង្កើតការងារចំនួន ២.៦៧ លានការងារឲ្យប្រជាពលរដ្ឋកម្ពុជា៕
ភ្ញៀវទេសចរជាង២ពាន់នាក់នឹងមកទស្សនាអង្គរវត្ត. (រូបថត សហការី)
