លោក Danish Siddiqui នាយកក្រុមហ៊ុន TechAdwiser បានចែករំលែកផែនការក្រុមហ៊ុនរបស់លោកជាមួយកាសែតភ្នំពេញ ប៉ុស្តិ៍ អំពីវិធីសាស្ត្របង្កើនប្រសិទ្ធភាពលើវិស័យធនាគារ និងហិរញ្ញវត្ថុ។
ក្នុងនាមជាក្រុមហ៊ុនសូហ្វវែរ តើក្រុមហ៊ុនរបស់លោកបានរួមចំណែកដល់សេដ្ឋកិច្ចកម្ពុជាយ៉ាងដូចម្តេច?
យើងជួយអាជីវកម្មឱ្យប្រើប្រាស់បច្ចេកវិទ្យាកាន់តែឆ្លាតវៃនៅក្នុងវិស័យធនាគារ និងហិរញ្ញវត្ថុបែបឌីជីថល។ រាប់ចាប់ពីការកំណត់បច្ចេកវិទ្យាឲ្យបានត្រឹមត្រូវសម្រាប់អាជីវកម្មរបស់ពួកគេរហូតដល់ការអនុវត្ត និងបណ្តុះបណ្តាលកម្លាំងពលកម្ម។ យើងក៏គាំទ្រដល់អតិថិជនរបស់យើងនៅគ្រប់ដំណាក់កាល ដើម្បីឱ្យពួកគេអាចទទួលបាននូវបច្ចេកវិទ្យាទំនើបប្រកបដោយទំនុកចិត្ត។
ជាមួយក្រុមហ៊ុន TPS Worldwide ដែលដៃគូរបស់យើង យើងជួយដល់អាជីវកម្មកម្ពុជាឲ្យអនុវត្តនូវបច្ចេកវិទ្យាឈានមុខគេ ដូចជាបច្ចេកវិទ្យា Tokenisation បច្ចេកវិទ្យា Big Data បច្ចេកវិទ្យា Artificial Intelligence, process automation និង block chain ជាដើម។
យើងនាំអ្នកជំនាញអន្តរជាតិមកកាន់ប្រទេស កម្ពុជា សំរាប់គម្រោងបច្ចេកទេសជាក់លាក់ ហើយលើកទឹកចិត្តបុគ្គលិករបស់ក្រុមហ៊ុនដែលជាអតិថិជនយើងឲ្យធ្វើការជិតស្និទ្ធជាមួយអ្នកជំនាញរបស់យើង និងរៀនសូត្រពីពួកគេក្នុងកំឡុងពេលអនុវត្តគម្រោងនេះ។ វិធីសាស្ត្រនេះនឹងផ្តល់ឱ្យអតិថិជនរបស់យើងនូវទំនុកចិត្តកាន់តែខ្លាំងលើបច្ចេកវិទ្យា ហើយក្នុងរយៈពេលវែងវានឹងជួយបង្កើនជំនាញដល់កម្លាំងពលកម្មរបស់ប្រទេស កម្ពុជា។
តើអ្វីដែលជាការផ្តោតសំខាន់របស់ក្រុមហ៊ុន TechAdwiser នៅកម្ពុជា?
យើងផ្តោតលើវិស័យធនាគារ និងហិរញ្ញវត្ថុនៅកម្ពុជា។ យើងក៏ចាប់អារម្មណ៍ជួយដល់វិស័យធានារ៉ាប់រងដែលកំពុងរីកចម្រើន និងវិស័យទូរគមនាគមន៍ ជាមួយនឹងតម្រូវការបច្ចេកវិទ្យារបស់ពួកគេផងដែរ។ ប្រទេស កម្ពុជា មានធនាគារ និងគ្រឹះស្ថានមីក្រូហិរញ្ញវត្ថុ [MFIs] ច្រើន ដូច្នេះបច្ចេកវិទ្យា គឺមានសារៈសំខាន់ណាស់សម្រាប់ពួកគេសម្រាប់ការប្រកួតប្រជែង។
វិស័យធនាគារ និងមីក្រូហិរញ្ញវត្ថុនៅកម្ពុជាមានហេដ្ឋារចនាសម្ព័ន្ធទំនើបរួចហើយដែលធ្វើឱ្យមានភាពងាយស្រួលក្នុងការទទួលយកបច្ចេកវិទ្យាថ្មីៗ។ ជាមួយនឹងដៃគូរបស់យើង គឺក្រុមហ៊ុន TPS យើងមានជំនាញលើប្រព័ន្ធទូទាត់ ដែលភាគច្រើនពាក់ព័ន្ធនឹងធនាគារ មីក្រូហិរញ្ញវត្ថុ និងទូរគមនាគមន៍ [បង់តាមទូរស័ព្ទ]។
តើក្រុមហ៊ុនរបស់លោក មានផ្តល់ជូនសេវាកម្មអ្វីខ្លះទៀត?
យើងបានមកកាន់ប្រទេសនេះអស់រយៈពេលជាង ៤ ឆ្នាំមកហើយ។ បច្ចុប្បន្នយើងកំពុងបើកដំណើរការសេវាកម្មក្លោដ (cloud based services) ដើម្បីធ្វើឱ្យធនាគារ និងមីក្រូហិរញ្ញវត្ថុតូចៗអាចប្រើប្រាស់កម្មវិធីលំដាប់ពិភពលោកបាន។
សេវាកម្មសូហ្វវែរនឹងត្រូវបញ្ជូនចេញពីមជ្ឈមណ្ឌលទិន្នន័យមួយនៅកម្ពុជា។ សេវាកម្មនេះរួមបញ្ចូលទាំងការឃ្លាំមើលហេដ្ឋារចនាសម្ព័ន្ធព័ត៌មានវិទ្យាពីចម្ងាយ ការត្រួតពិនិត្យការអនុវត្តកម្មវិធី និងការវិភាគទិន្នន័យទំហំធំ គ្រប់ប្រភេទទិន្នន័យ ដូចជាការវិភាគឥរិយាបទរបស់អតិថិជនជាដើម។ ហើយរំពឹងថានឹងចាប់ផ្តើមនៅពាក់កណ្តាលខែតុលា។
តើ TechAdwiser អាចជួយក្រុមហ៊ុនកម្ពុជាដូចម្តេច ដើម្បីបង្កើនប្រសិទ្ធភាព ឬផលិតភាព?
នេះគឺជាការផ្តោតសំខាន់របស់យើង។ បច្ចេកវិទ្យាអាចមានតម្លៃថ្លៃហើយពេលខ្លះអាជីវកម្មអាចទិញសូហ្វវែរ ប៉ុន្តែមិនបានប្រើប្រាស់ឲ្យអស់លក្ខណពិសេសរបស់វានោះទេ។
នៅកម្រិតយុទ្ធសាស្ត្រ ដំបូងយើងជួយអាជីវកម្មឲ្យជ្រើសរើសយកបច្ចេកវិទ្យាណាដែលសមស្របសម្រាប់ពួកគេ បន្ទាប់មកយើងជួយពួកគេអភិវឌ្ឍជំនាញដើម្បីធានាថា បច្ចេកវិទ្យានោះត្រូវបានប្រើប្រាស់យ៉ាងពេញលេញ ដើម្បីឱ្យអាជីវកម្មទទួលបានផលចំណេញខ្ពស់ចំពោះការវិនិយោគលើបច្ចេកវិទ្យា។
នៅកម្រិតប្រតិបត្ដិការ យើងផ្តល់ជូននូវ «ដំណើរការស្វ័យប្រវត្តិកម្ម» ដែលកំពុងពេញនិយមនៅចក្រភពអង់គ្លេស និងសហរដ្ឋអាមេរិក ពីព្រោះវាអាចជួយសន្សំសំចៃពេលវេលា និងកិច្ចខិតខំប្រឹងប្រែងដែលធ្វើឱ្យការងាររបស់មនុស្សកាន់តែគួរឱ្យចាប់អារម្មណ៍។
តើប្រទេស កម្ពុជា ត្រៀមខ្លួនទទួលយកបច្ចេកវិទ្យាកម្រិតខ្ពស់ដូចជាបច្ចេកវិទ្យា artificial intelligence, big data ឬបច្ចេកវិទ្យា internet of small things (IoT) ហើយឬនៅ?
ប្រទេស កម្ពុជា ហាក់មានភាពយឺតយ៉ាវបន្តិចនៅក្នុងការទទួលយកបច្ចេកវិទ្យាចុងបំផុតបែបនេះ ដោយសារតែគម្លាតជំនាញនៅក្នុងទីផ្សារ ។ បច្ចេកវិទ្យាខ្ពស់បែបនេះទាមទារឱ្យមានអ្នកជំនាញខ្ពស់ក្នុងការអនុវត្ត និងប្រតិបត្តិការលើបច្ចេកវិទ្យាទាំងនោះ។
យើងកំពុងធ្វើការដើម្បីបំពេញចន្លោះនេះ និងជួយប្រទេស កម្ពុជា ឲ្យបង្កើនល្បឿនក្នុងការទទួលយកបច្ចេកវិទ្យាខ្ពស់ទាំងនេះ។ ឧទាហរណ៍ ក្រុមហ៊ុន TPS ជាដៃគូរបស់យើងមានវេទិកាធនាគារឌីជីថលដែលមានសមត្ថភាពក្នុងការសម្គាល់រូបភាព តាមបច្ចេកវិទ្យា artificial intelligence ដែលងាយស្រួលសម្គាល់ភិនភាគអតិថិជន។ យើងក៏កំពុងធ្វើការវិភាគទិន្នន័យធំៗដែលអាចរកបានសម្រាប់អាជីវកម្មខ្នាតតូចតាមរយៈសេវាកម្ម cloud based service របស់យើងផងដែរ។
តើស្ថាប័នអប់រំផលិតបានអ្នកជំនាញគ្រប់គ្រាន់ ដើម្បីធ្វើការជាមួយបច្ចេកវិទ្យាទំនើបចុងក្រោយនេះហើយឬនៅ?
យុវជនកម្ពុជាមានអាកប្បកិរិយា និងក្រមសីលធម៌ខ្ពស់ក្នុងការបំពេញការងារ។ ប៉ុន្តែទោះយ៉ាងណាក៏ដោយ ប្រព័ន្ធអប់រំប្រហែលមិនទាន់បានផ្តល់ឱ្យពួកគេនូវជំនាញបច្ចេកវិទ្យាព័ត៌មានកម្រិតខ្ពស់គ្រប់គ្រាន់នៅឡើយទេ ដូច្នេះវាបានបង្អាក់ឱកាសរបស់ពួកគេ ក្នុងការអភិវឌ្ឍជំនាញដែលត្រូវការសម្រាប់បរិយាកាសការងារបែបនេះ។ សាកលវិទ្យាល័យក្នុងស្រុក គួរសហការឲ្យបានកាន់តែជិតស្និទ្ធជាមួយវិស័យឯកជន ដើម្បីផ្តល់បទពិសោធជាក់ស្តែងបន្ថែមដល់និស្សិត។
តើអ្វីជាបញ្ហាប្រឈមធំបំផុត ដែលវិស័យព័ត៌មានវិទ្យានៅកម្ពុជាកំពុងជួបប្រទះ?
តាមទស្សនៈខ្ញុំ បញ្ហាប្រឈមធំបំផុត គឺកង្វះជំនាញ។ វិស័យព័ត៌មានវិទ្យា ត្រូវការធនធានមនុស្សដែលមានជំនាញខ្ពស់ហើយកង្វះធនធានមនុស្សបែបនេះ គឺជាឧបសគ្គដ៏ធំដែលប៉ះពាល់ដល់ការរីកចម្រើននៃវិស័យនេះនៅកម្ពុជា។
ខណៈដែលធនធានមនុស្សបែបនេះអាចនាំយកមកពីក្រៅប្រទេសបានសម្រាប់ដំណោះស្រាយរយៈពេលខ្លី ប៉ុន្តែវាមិនមាននិរន្តរភាពទេសម្រាប់រយៈពេលវែង។ ប្រទេស កម្ពុជា ត្រូវការអភិវឌ្ឍធនធានមនុស្ស និងបណ្តុះបណ្តាលយុវជនរបស់ខ្លួន៕