សមត្ថកិច្ចខេត្តកំពង់ឆ្នាំងប្រមូលស្រាស បន្ទាប់ពីមានពុលស្លាប់។ រូបថត នគរបាល
ខណៈម្នាក់ៗព្រួយបារម្ភ និងមានការភ័យខ្លាចនូវការឆ្លងជំងឺកូវីដ ១៩ ចូលក្នុងសហគមន៍នៃព្រឹត្តិការណ៍សហគមន៍ថ្ងៃ ២៨ វិច្ឆិកា ហើយក្រសួងសុខាភិបាលកោះហៅអ្នកពាក់ព័ន្ធដែលប៉ះពាល់ផ្ទាល់ និងមិនផ្ទាល់នៃអ្នកឆ្លងជំងឺកូវីដ១៩ទាំងអស់ ដើម្បីមកធ្វើតេស្តរកមេរោគកូវីដ ១៩ និងធ្វើចត្តាឡីស័ក ១៤ ថ្ងៃ ដើម្បីទប់ស្កាត់ការរីករាលដាលនៃជំងឺនេះឆ្លងចូលសហគមន៍។ មកទល់ពេលនេះលទ្ធផលរកឃើញ ៤១ ករណី ឆ្លងជំងឺកូវីដ ១៩ នៅក្នុងព្រឹតិ្តការណ៍នេះ។
.jpg)
ស្របពេលជាមួយគ្នានេះដែរ ក៏មានព្រឹត្តិការណ៍ផ្ទុះករណីពុលស្រា «ស» នៅថ្ងៃទី ២៨ ខែវិច្ឆិកា ដូចគ្នានៅស្រុកទឹកផុសខេត្តកំពង់ឆ្នាំងដែលបណ្តាលឲ្យមនុស្សស្លាប់ ៨ នាក់ ហើយ ១២០ នាក់ផ្សេងទៀតធ្លាក់ខ្លួនឈឺជាទម្ងន់។ មន្ត្រីជំនាញពីក្រសួងពាណិជ្ជកម្មបានធ្វើតេស្តស្រាសនោះឃើញមានកំហាប់សារជាតិមេតាណុលខ្ពស់ដែលបណ្តាលឱ្យមនុស្សស្លាប់បាន ហើយសមត្ថកិច្ចបានបិទទីតាំងផលិតស្រាសទាំងអស់នៅស្រុកទឹកផុសជិត ៥១៧ កន្លែង និងកន្លែងលក់ជាង ១ ពាន់តូប ហើយចាប់បានមនុស្សពាក់ព័ន្ធក្នុងករណីពុលស្រានេះចំនួនជាង ១០ នាក់ ហើយសមត្ថកិច្ចកសាងសំណុំរឿងបញ្ជូនទៅតុលាការ ដោយចោទពីបទករណីព្រហ្មទណ្ឌការបំពុលចំណីអាហារ សម្លាប់មនុស្សដោយអចេតនា។ នេះបើតាមសារព័ត៌មានក្នុងស្រុកបានចុះផ្សាយកន្លងមក។
ខេត្តកំពង់ឆ្នាំងមានការស្លាប់ដោយសារតែផឹកស្រាសហ្នឹងមិនមែនកើតឡើងជាលើកទី១ នោះទេហើយខេត្តដែលកើតឡើងញឹកញាប់ជាងគេដោយសារតែពុលស្រា និងស្លាប់ដោយសារផឹកស្រា គឺនៅខេត្តក្រចេះម្តងៗពី ១០ ទៅជាង ១០ នាក់ រហូតដល់មន្ត្រីមកពីក្រសួងឧស្សាហកម្មវិទ្យាសាស្ត្រ បច្ចេកវិទ្យា និងនវានុវត្តន៍ចុះទៅបង្រៀនប្រជាពលរដ្ឋដែលប្រកបមុខរបរបិតស្រាស តាមស្រុកចំនួន ៥ នៅខេត្តក្រចេះកាលពីឆ្នាំ ២០១៨។
ការដែលអ្នកលក់ ឬក៏អ្នកផលិតចេះតែនាំគ្នាលួចបន្ថែមសារធាតុគីមីមេតាណុលនៅក្នុងស្រាសធ្វើឱ្យអ្នកផឹកស្រាសឆាប់ស្រវឹង ហើយស្រវឹងខ្លាំងងំល្អ ដែលជាតម្រូវការរបស់អ្នកទិញយកទៅផឹក អ៊ីចឹងហើយបានជាមានទំនាក់ទំនងគ្នារវាង អ្នកតម្រូវការ និងអ្នកផ្គត់ផ្គង់ ព្រោះអ្នកតម្រូវការចង់បានស្រាសខ្លាំងផឹកឆាប់ស្រវឹង។ តាមពិតទៅបើទទួលទានស្រាសដែលបិតទៅតាមមេដំបែតាមប្រពៃណីតាំងពីដើមមក កម្រមានបញ្ហាពុលណាស់ ព្រោះបិតយកតែចំហាយស្រាសមានបំពង់បង្ហូរចំហាយមកចេញជាស្រាសនោះ តែការធ្វើដូច្នេះគឺទិន្នផលតិចណាស់ យឺត មិនគ្រប់គ្រាន់ទៅនឹងតម្រូវការទីផ្សាររបស់អ្នកផឹក។
ដូច្នេះហើយដើម្បីបម្រើបានទៅតាមតម្រូវការទីផ្សារ គឺអ្នកលក់អាចច្នៃលួចលាយជាមួយហ្នឹងមេតាណុល ដើម្បីឱ្យមានសារជាតិខ្លាំង។ បើមិនដូច្នេះទេ មានតែលាយជាមួយស្រាសនាំចូលពីប្រទេសជិតខាងទាំងកានៗ ១ កានស្មើ ៣០ លីត្រ ដើម្បីយកមកលាយជាមួយស្រាសដែលខ្លួនបានផលិតដើម្បីយកក្លិនដំបែខ្លះ រួចហើយចាក់លាយជាមួយស្រាសនាំចូលពីប្រទេសជិតខាង ហើយថែមសារធាតុមេតាណុលទៀត ដើម្បីឱ្យបានចំណុះច្រើនចំណេញច្រើន ហើយខ្លាំងសម្រាប់ផ្គត់ផ្គង់ទីផ្សារអ្នកផឹកបានទាន់ពេល ហើយត្រូវចិត្តទៀត។
វិធីសាស្ត្រលាយនេះកន្លងមកសមត្ថកិច្ចធ្លាប់រឹបអូសយកទាំងកានៗស្តុកទុកលាយបែបនេះរបស់ទីតាំងផលិតស្រាស ពេលករណីពុល ឬក៏ស្លាប់កើតឡើងហ្នឹងហើយដើម្បីឱ្យគេជឿថា ខ្លួនរកស៊ីលក់ស្រាស ទាល់តែបង្កើតកន្លែងបិតស្រាស តែជាក់ស្តែងគ្រាន់តែយកលេសមកលាយស្រាសច្រើនជាងដោយមិនខ្វល់ពីសុខភាពរបស់អ្នកប្រើប្រាស់នោះទេ។ អ្វីដែលទទួលផលពីស្រាសនាំចូលមែនទែននោះ គឺមន្ត្រីនៅប្រចាំការនៅច្រកព្រំដែនដែលអនុញ្ញាតឲ្យនាំទំនិញស្រាសចូលមកទាំងកានៗ ចែកចាយពេញទីផ្សារប្រទេសកម្ពុជា។
សម័យនេះហើយមិនគួរឱ្យមនុស្សស្លាប់ងាយៗពេកទេជាពិសេសរឿងមិនគួរកើតតែម្តងដោយសារតែឥរិយាបថរបស់អ្នកផលិតស្រាសមានចិត្តលោភលន់ ដោយមិនគិតពីសុខភាពរបស់អ្នកប្រើប្រាស់។ នៅពេលដែលអ្នកផលិតស្រាស ដែលមានជាតិអាល់កុលហើយនាំគ្នាលាយមេតាណុលទៀតវាក៏ធ្វើឱ្យប៉ះពាល់សុខភាពអ្នកប្រើប្រាស់ផ្សេងៗទៀតក្រៅពីអ្នកផឹក អ្នកលក់ខ្លះនៅតែមានចរិតកេងប្រវ័ញ្ចយកស្រាដែលមានជាតិមេតាណុលមកលក់ធ្វើជាអាល់កុលសម្រាប់លាងដៃកុំឱ្យឆ្លងមេរោគកូវីដ ១៩។
នៅពេលអ្នកលក់អាល់កុលនាំគ្នាយកស្រាសមកលក់ជំនួសអាល់កុលធ្វើក្លែងក្លាយបែបនេះ គឺអាចធ្វើទុក្ខទោសពុលដល់កុមារ ឬក៏អ្នកដែលមានសុខភាពខ្សោយនៅពេលពួកគេលាងដៃនឹងស្រាសដែលមានជាតិមេតាណុល ដើម្បីកម្ចាត់កូវីដ ១៩។ កន្លងមកសមត្ថកិច្ចចាប់ផាកពិន័យ និងរឹបអូសយកអាល់កុលក្លែងក្លាយដែលមានជាតិមេតាណុលបែបនេះច្រើនគួរសមដែរ តែបញ្ហានេះនៅតែមិនរាងចាលសោះ។
ជាផលវិបាករយៈពេលវែង បើកាលណាអ្នកផឹកស្រាស ដែលមានសារធាតុមេតាណុលរាល់ថ្ងៃ ចាស់ខែឆ្នាំទៅក៏ក្លាយទៅជាជំងឺរ៉ាំរ៉ៃដូចជារលាកថ្លើម រលាកក្រពះទឹកនោមផ្អែម ឡើងសម្ពាធឈាម លើសឈាមមហារីក និងសុខភាពទ្រុឌទ្រោមស្លាប់មុនអាយុ។ ហេតុដូច្នេះហើយសមត្ថកិច្ចដែលគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក ) ថ្នាក់រាជធានី-ខេត្ត គួរតែផ្លាស់ប្តូរយុទ្ធសាស្ត្រក្នុងការរឹតបន្តឹងការអនុវត្តចំពោះបញ្ហាស្រាសទៅលើគុណភាពដែលមានសារធាតុមេតាណុល ជាពិសេសចំពោះការនាំចូលស្រាសទាំងកានៗតាមច្រកព្រំដែន ដែលគ្មានគុណភាពមិនត្រូវអនុញ្ញាតឱ្យនាំចូលទេ។
ប្រសិនបើនៅតែមានកើតឡើងករណីពុលស្រាសរប៉េះរប៉ោះគឺបិទទីតាំងកន្លែងផលិតស្រាសទូទាំងប្រទេសបណ្តោះអាសន្នសិន ដើម្បីជាការព្រមាននូវការក្លែងបន្លំដាក់បន្ថែមសារធាតុមេតាណុលនៅក្នុងស្រាសនោះ គឺមិនត្រឹមតែប៉ះពាល់អ្នកផឹកទេ គឺប៉ះពាល់ដល់អ្នកប្រើប្រាស់ដែលអ្នកលក់បន្លំធ្វើជាអាល់កុលយកមកលាងដៃកម្ចាត់មេរោគកូវីដ ១៩ ផងដែរ។ ចំណុចដែលសំខាន់នោះគឺតម្រូវឱ្យទីតាំងកន្លែងបើកផលិតស្រា ត្រូវតែចុះបញ្ជីជាមួយមន្ទីរពាណិជ្ជកម្ម និងមន្ទីរឧស្សាហកម្មរាជធានី-ខេត្ត ត្រឹមត្រូវ ហើយទទួលខុសត្រូវចំពោះមុខច្បាប់ ប្រសិនបើក្លែងក្លាយលាយសារធាតុមេតាណុលក្នុងស្រាស៕
ចូលរួមផ្តល់យោបល់តាមរយៈ soprach.tong@phnompenhpost.com
