សិស្សចូលប្រឡងបាក់ឌុបនៅវិទ្យាល័យទួលទំពូងពីឆ្នាំមុន។ ហេង ជីវ័ន
ដោយសារតែជំងឺកូវីដ ១៩ ញាំញី ឆ្លងចូលពីខាងក្រៅផង និងឆ្លងចូលសហគមន៍ឥតស្រាកស្រាន្តផង ដែលក្រសួងសុខាភិបាល និងស្ថាប័នពាក់ព័ន្ធពីថ្នាក់ជាតិរហូតដល់ថ្នាក់ក្រោមជាតិ កំពុងតែរុករកអ្នកពាក់ព័ន្ធក្នុងព្រឹត្តិការណ៍ថ្ងៃទី ២៨ វិច្ឆិកា បន្ថែមទៀត ដើម្បីកុំឱ្យមានការរីករាលដាលជំងឺកូវីដ ១៩ មានលក្ខណៈទ្រង់ទ្រាយធំនៅក្នុងសហគមន៍។
.jpg)
បើទោះបីជាមិនទាន់មានអ្នកស្លាប់ដោយសារតែជំងឺកូវីដ ១៩ នៅឡើយ ដែលមកទល់ពេលនេះមានអ្នកជំងឺសរុបចំនួន ៣៦៣ នាក់ ហើយក្នុងនោះមាន ៣៥១ នាក់ ត្រូវបានព្យាបាលជាសះស្បើយ ក៏រាជរដ្ឋាភិបាលមិនមើលរំលងសភាពការណ៍នៃការរីករាលដាលនៃជំងឺកូវីដ ១៩ នេះឡើយ ហើយជាមួយគ្នានេះដែរ រាជរដ្ឋាភិបាលបានសម្រេចឱ្យសិស្សានុសិស្សដែលគ្រោងប្រឡងបាក់ឌុបនៅថ្ងៃទី ១១ ខែ មករា ឆ្នាំ ២០២១ ទាំងអស់ ទាំងសិស្សរដ្ឋ និងសិស្សឯកជន ជាប់ជាស្ថាពរចំនួន ១២១ ១០៨ នាក់ សម្រាប់ឆ្នាំសិក្សា ២០១៩-២០២០ កាលពីថ្ងៃទី ១៥ ខែ ធ្នូ ២០២០ កន្លងទៅនេះ ដោយមិនចាំបាច់បន់ស្រន់ឱ្យប្រឡងជាប់ ឬក៏ស្រោចទឹកដើម្បីជម្រះកាយាមានអារម្មណ៍ល្អក្នុងការប្រឡងឱ្យជាប់ដូចលើកមុនៗនោះទេ។
បន្ទាប់ពីបានប្រឡងជាប់ដោយស្វ័យប្រវត្តិនេះហើយ តើប្អូនៗនឹងត្រៀមខ្លួនធ្វើអ្វីទៀត ដើម្បីឈោងចាប់ការសិក្សាបន្តនៅថ្នាក់ឧត្តមសិក្សា ឬក៏សាលាមធ្យមបចេ្ចកទេស?
បច្ចុប្បន្នប្រសិននិយាយពីទូរស័ព្ទស្មាតហ្វូនសម្រាប់សិស្សថ្នាក់ទី ១២ មានសឹងតែគ្រប់ដៃសម្រាប់ការសិក្សាតាមអនឡាញដែលក្រសួងអប់រំ យុវជន និងកីឡា បានធ្វើបទបង្ហាញ និងមានសំណួរចម្លើយសម្រាប់ត្រៀមប្រឡងបាក់ឌុបកន្លងមក។ តែជាក់ស្តែងអ្វីដែលគួរឱ្យព្រួយបារម្ភ ចំពោះការចូលរួមសិក្សារបស់ប្អូនៗយុវសិស្សក្នុងការសិក្សាតាមអនឡាញសម្រាប់ថ្នាក់បាក់ឌុបនៅមានកម្រិតទាបនៅឡើយគ្រាន់តែលើកឧទាហរណ៍ក្នុងអំឡុងកូវីដ ១៩កន្លងមក លោករដ្ឋមន្ត្រីក្រសួងអប់រំបានធ្វើបទបង្ហាញមេរៀនគណិតវិទ្យា និងការយកទ្រឹស្តីទៅប្រើប្រាស់ជាក់ស្តែង គឺមានអ្នកចូលមើលការផ្សាយបន្តផ្ទាល់បានតែជាង ១ ៣០០ នាក់ទេ ក្នុងចំណោមបេក្ខជនជាង ១២ ម៉ឺននាក់ បើប្រៀបធៀបជាមួយនឹងអ្នកលក់ឡេឈ្លោះគ្នាប្តីប្រពន្ធ ឬក៏អ្នកលក់អនឡាញឈ្លោះគ្នាវិញមានដល់ទៅជិត ១០ ម៉ឺននាក់ ចូលមើលបន្តផ្ទាល់។ នេះហើយគឺការប្រើប្រាស់អនឡាញមិនត្រឹមត្រូវ បើសួរប្អូនថា ចេះរៀនតាមអនឡាញទេ ចម្លើយគឺថា ពិបាកសាំញ៉ាំហើយ តែសុខចិត្តយកពេលមើលហ្វេសប៊ុក ឬក៏ឆាតគ្នាលេងអត់ប្រយោជន៍ហ្នឹងចេះជាង។
បើប្រៀបធៀបជាមួយអ្នកសិក្សាកាលពីជំនាន់ទសវត្សរ៍ឆ្នាំ ៨០ និង ៩០ វិញ ឃើញថា ខុសគ្នាស្រឡះកាលពីសម័យនោះ កូនសិស្សភាគច្រើនរៀននៅផ្ទះតែជាមួយភ្លើងចង្កៀង ឬក៏អំពូលដងគោមតាមផ្លូវទេ មិនមានអគ្គិសនីគ្រប់គ្រាន់ទេ ហើយក៏មានម៉ោងកំណត់ដែរ។ សួរថា ម៉េចបានជាពួកគាត់ជំនាន់នោះគាត់រៀនចេះ ពូកែខ្លះឡើងធ្វើជាមន្ត្រីជាន់ខ្ពស់ ថ្នាក់ដឹកនាំក្នុងជួររាជរដ្ឋាភិបាល ប្រធានអង្គការមិនមែនរដ្ឋាភិបាល ប្រធានក្រុមហ៊ុន យ៉ាងហោចណាស់ប្រធានអង្គភាព ឬក៏ទីប្រឹក្សាផងដែរ?
ចុះប្អូនៗសព្វថ្ងៃវិញ បើនិយាយអំពីអគ្គិសនីផ្ទះណាក៏មានដែរ ទូរស័ព្ទស្មាតហ្វូនយ៉ាងហោចណាស់ផ្ទះ ១ ក៏មាន ១ ដែរ តម្លៃថោកល្មម អាចរកទិញបានយកមកសិក្សាតាមអនឡាញបានការភ្ជាប់សេវា WiFi តាមកន្លែងហាងកាហ្វេ ឬក៏ប្រើទូរស័ព្ទខ្លួនឯងផ្ទាល់ ដើម្បីឱ្យដំណើរការប្រព័ន្ធអ៊ីនធឺណិតសម្រាប់ការសិក្សាប្រព័ន្ធអនឡាញដូចជាកម្មវិធី Zoom, Google classroom, Telegram និង Facebook ជាដើម។ ចុះហេតុអ្វីបានជានៅមានប្អូនៗមួយចំនួននៅតែទោរទន់ ស្ពឹកស្រពន់ក្នុងការព្យាយាមសិក្សាទៀត?
ចំពោះការសិក្សាតាមអនឡាញសម្រាប់ថ្នាក់បាក់ឌុបឆ្នាំនេះសុទ្ធតែមានឯកសារសេចក្តីណែនាំសម្រាប់ការភ្ជាប់ទៅនឹងកម្មវិធីនីមួយៗ ហើយកម្មវិធីនីមួយៗដែលត្រូវភ្ជាប់នោះ មានការលំបាកតែដំបូងទេ នៅពេលដែលផ្សាំនឹងការប្រើរាល់ថ្ងៃទៅ គឺលែងលំបាកហើយ។ ដូច្នេះប្អូនៗសិស្សានុសិស្ស បើមិនអាចធ្វើបាន សួរគ្នីគ្នាមិត្តភក្តិដែលចេះពួកគេនឹងជួយហើយឱ្យតែប្អូនៗមានចិត្តចង់រៀន ឬក៏សួរទៅនឹងលោកគ្រូ-អ្នកគ្រូដែលជាអ្នកបង្កើតកម្មវិធីសម្រាប់សិក្សាអនឡាញនោះ។
សង្ឃឹមថា ហ្វេសប៊ុករបស់ក្រសួងអប់រំនឹងជួយបំប៉នបណ្តុះបណ្តាលប្អូនៗសិស្សានុសិស្សបន្ថែមដើម្បីត្រៀមខ្លួនប្រឡងចូលសាកលវិទ្យាល័យ និងសាលាបច្ចេកទេសជំនាញតាមរយៈសំណួរ-ចម្លើយទៅតាមមេរៀន និងលំហាត់ដែលត្រៀមប្រឡងដូចកាលពីត្រៀមប្រឡងបាក់ឌុបដែរ ហើយប្អូនៗ អាចសួរសំណួរនៅពេលកំពុងបង្រៀនបន្តផ្ទាល់បាន។
ជាងនេះទៅទៀតការប្រឡងចូលសាកលវិទ្យាល័យ មានលក្ខណៈប្រកួតប្រជែងជាងប្រឡងបាក់ឌុប វាចង្អៀតណាស់ព្រោះនៅតាមមហាវិទ្យាល័យនីមួយៗចម្រាញ់យកតែចំនួនតិច ដូចនៅវិទ្យាស្ថានបច្ចេកវិទ្យាកម្ពុជាសាខាខេត្តត្បូងឃ្មុំ ទើបតែចាប់ផ្តើមប្រកាសថ្មីៗនេះនៅលើហ្វេសប៊ុក ក្រសួងអប់រំយកតែចំនួន ១២០ នាក់ទេ។
ជាមួយគ្នានោះដែរ ក៏មានវិទ្យាស្ថានបច្ចេកវិទ្យាកម្ពុជានៅភ្នំពេញ និងសាកលវិទ្យាល័យជាតិគ្រប់គ្រងក៏ប្រកាសឱ្យប្អូនៗសិស្សានុសិស្សដាក់ប្រឡងតាមអនឡាញផងនៅខែមករាខាងមុខនេះ។ ម្យ៉ាងវិញទៀត កម្មវិធីត្រីវិស័យរបស់ក្រសួងអប់រំអាចជួយប្អូនៗសិស្សានុសិស្សបាន៖ ១- ការផ្ដល់ការប្រឹក្សាយោបល់, ២- ការតម្រង់ទិសសិស្សានុសិស្សចាប់ពីថ្នាក់ទី ៩ ដល់ថ្នាក់ទី ១២, ៣-ការស្វែងយល់អំពីខ្លួនឯង និង ៤- ការជ្រើសរើសអាជីពត្រឹមត្រូវនាពេលអនាគតដោយទាញយកកម្មវិធីត្រីវិស័យ៖ AppStore: apple.co/2mtZeRj និង PlayStore: bit.ly/2ntRXkC។
អំណឹះតទៅ ប្អូនៗសិស្សានុសិស្សមិនអាចកាប់បំពង់រង់ចាំទឹកភ្លៀងដូចកាលពីមុនចាំជួបតែលោកគ្រូ និងអ្នកគ្រូពន្យល់ផ្ទាល់មាត់បានទៀតទេ គឺអ្វីៗបត់បែនមកការសិក្សាតាមអនឡាញបណ្តើរៗហើយ។ រីឯការសិក្សាតាមអនឡាញនេះទៀតសោធ គឺសាកលវិទ្យាល័យនៅលើពិភពលោក គេមានយូរហើយ គេដាក់លក់ការសិក្សាតាមអនឡាញ និងការរៀនតាមយកសញ្ញាបត្រតាមអនឡាញដែរ។
អ៊ីចឹងហើយប្អូនៗមិនអាចទោរទន់ ឬក៏ទម្លាក់កំហុសមិនចេះបចេ្ចកវិទ្យាថ្មីៗការសិក្សាតាមអនឡាញនេះទេ។ សួរខ្លួនឯងថា បានបើកសៀវភៅអាននៅផ្ទះ ឬក៏ដកស្រង់ឯកសារចេញពីអ៊ីនធឺណិតមករៀនហើយ ឬនៅ? មានដែលឆ្ងល់សួរលោកគ្រូ អ្នកគ្រូ ឬក៏មិត្តភក្តិដែលរៀនពូកែជាងហើយឬនៅ? បើមិនទាន់បានធ្វើផង បើកភ្នែកឡើងគិតតែពីត្អូញត្អែរ ឬក៏រិះគន់ការសិក្សាតាមប្រព័ន្ធអនឡាញនេះ។
សរុបមកវិញគឺប្អូនៗសិស្សានុសិស្សប្រឹងប្រែងរៀនស្វ័យសិក្សាខ្លួនដោយខ្លួនឯងសិន ថាតើខ្លួនឯងមានចំណុចខ្វះខាតអ្វីខ្លះ និងខំបំពេញបន្ថែមទៀតទៅ រួចហើយត្រូវតែមានសង្ឃឹមថា ចប់កូវីដ ១៩ អ្វីៗនឹងត្រឡប់មកដូចដើមវិញហើយជាមួយនឹងការសិក្សាអនឡាញផងដែរ៕
ចូលរួមផ្តល់យោបល់តាមរយៈ soprach.tong@phnompenhpost.com
