ការ​សុំ​នៅ​ក្រៅ​ឃុំ​របស់​អ្នក​ចម្រៀង​ស្រី អូ រស្មី ត្រូវ​ឧទ្ធរណ៍​ច្រាន​ចោល


20140408_10b
ជនជាប់ចោទ អូ រស្មី ឡើងសវនាការឧទ្ធរណ៍ពីម្សិលមិញ សារុំ

ភ្នំពេញៈ សំណុំ​រឿង​របស់​ជន​ជាប់​ចោទ​ជា​តារា​ចម្រៀង អូ រស្មី ដែល​ប្តឹង​ទាស់​នឹង​ការ​បដិសេធ​ការ​សុំ​នៅ​ក្រៅ​ឃុំ​របស់​សាលា​ដំបូង​ភ្នំពេញ ពាក់ព័ន្ធ​នឹង​ករណី​នាំ​ក្មេង​ស្រី​មិន​ទាន់​គ្រប់​អាយុ​ទៅ​លក់​ខ្លួន​ឲ្យ​អ្នក​មាន​ទ្រព្យ​ត្រូវ​សភា​ស៊ើបសួរ​សាលា​ឧទ្ធរណ៍​លើក​មក​ជំនុំ​ជម្រះ កាល​ពី​ព្រឹក​ថ្ងៃ​ចន្ទ និង​ច្រាន​ចោល​ការ​ទាមទារ​នោះ។

បើ​តាម​មន្ត្រី​អនុរក្ស​ពន្ធនាគារ​ម្នាក់​ឲ្យ​ដឹង​បន្ទាប់​ពី​ការ​ជំនុំ​ជម្រះ​បិទ​ទ្វារ​ដែល​មាន​លោក ឃុន លាងម៉េង ជា​ប្រធាន​ក្រុម​ប្រឹក្សា​សភា​ស៊ើប​សួរ​ថា សំណុំ​រឿង​តារា​ចម្រៀង អូ រស្មី សុំ​នៅ​ក្រៅ​ឃុំ​ត្រូវ​សភា​ស៊ើបសួរ​បដិសេធ និង​មិន​អនុញ្ញាត​ឲ្យ​ជន​ជាប់​ចោទ​នៅ​ក្រៅ​ឃុំ​ទេ។

នៅ​ក្រៅ​បន្ទប់​សវនាការ អូ រស្មី បាន​ត្អូញត្អែរ​ពី​ការ​ប្រព្រឹត្ត​ល្មើស​ច្បាប់​និង​អយុត្តិធម៌​លើ​នាង​ថា៖ «ខ្ញុំ​មិន​បាន​យក​ក្មេង​ស្រី​នោះ​ទៅ​លក់​ឲ្យ​នរណា​ទេ​តែ​ខ្ញុំ និង​ម្តាយ​នាង​ស្គាល់​រាប់​អាន​គ្នា។ ខ្ញុំ​កំពុង​ដេក​ជាមួយ​កូន​ខ្ញុំ​លើ​ពូក​គ្មាន​ក្មេង​ស្រី​នោះ​នៅ​ទេ​ហើយ​ប៉ូលិស​ស្រាប់​តែ​ចូល​មក​ចាប់​ខ្ញុំ​តែ​ម្តង។ ខ្ញុំ​សុំ​ពាក់​អាវ​ក៏​មិន​ឲ្យ​ខ្ញុំ​ពាក់​ស្រួល​បួល​ផង ហើយ​ដាក់​ខ្នោះ​ដៃ​ខ្ញុំ​ទៀត។ បន្ទាប់​មក​ទើប​ប៉ូលិស​បាន​នាំ​ក្មេង​ដែល​ថា ជា​ជន​រងគ្រោះ​មក​ថត​រូប​ធ្វើ​ជា​ភ័ស្តុតាង»។

មិន​អាច​ទាក់ទង​លោក សោម សុគង មេធាវី​ជន​ជាប់​ចោទ​បាន​ទេ តែ អូ រស្មី ប្រាប់​ថា នាង​នឹង​ដាក់​ពាក្យ​ប្តឹង​សារ​ទុក្ខ​មក​តុលាការ​កំពូល​បន្ត​ទៀត។

តាម​អង្គហេតុ អូ រស្មី ត្រូវ​សមត្ថកិច្ច​ឃាត់​ខ្លួន​កាល​ពី​ថ្ងៃ ទី​១៨ ខែ​មករា នៅ​ចំណុច​ផ្ទះ​លេខ ៨៨ E០ ក្នុង​បុរី​ពិភព​ថ្មី​ក្នុង ភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍​សែន​ជ័យ បន្ទាប់​ពី​មាន​បណ្តឹង​ចោទ​ថា នាង​បាន​នាំ​កុមារី​មិន​ទាន់​គ្រប់​អាយុ​លក់​ព្រហ្មចារី​ឲ្យ​ពួក​អ្នក​មាន​ទ្រព្យ។

សមត្ថកិច្ច​ប្រឆាំង​ការ​ជួញ​ដូរ​មនុស្ស​និង​ការពារ​អនីតិជន​រាជធានី​អះអាង​ក្រោយ​ការ​ឃាត់​ខ្លួន​តារា​រូប​នេះ​ថា អូ រស្មី បាន​ល្បួង​កុមារី​អាយុ ១៤ឆ្នាំ ម្នាក់​ទៅ​លក់​ឲ្យ​បុរស​ចំណាស់​ម្នាក់​ដេក​នៅ​រួមភេទ ២ យប់ ២ ថ្ងៃ ដោយ​សន្យា​ថា នឹង​នាំ​នាង​ទៅ​ច្រៀង​តាម​ស្ថានីយ​ទូរទស្សន៍​ឲ្យ​ល្បី។ ប៉ុន្តែ បន្ទាប់​ពី​ដេក​ជាមួយ​បុរស​ចំណាស់​ម្នាក់​មក អូ រស្មី មិន​បាន​ធ្វើ​តាម​ការ​សន្យា​ទេ​ទើប​ម្តាយ​ក្មេង​រងគ្រោះ​ដាក់​ពាក្យ​ប្តឹង​នគរបាល​ប្រឆាំង​ការ​ជួញ​ដូរ មនុស្ស​និង​ការពារ​អនីតិជន​រាជធានី​ឲ្យ​ឃាត់​ខ្លួន។

ជន​ជាប់​ចោទ អូ រស្មី គឺជា​ស្រ្តី​មេម៉ាយ និង​កំព្រា​ឪពុក​ម្តាយ មាន​ស្រុក​កំណើត​នៅ ភូមិ​សូនសា ឃុំ​យាង ស្រុក​ពួក ខេត្ត​សៀមរាប មាន​កូន​ប្រុស​ម្នាក់​អាយុ ១៨​ខែ។ ជា​ញឹក​ញាប់​គេ​ឃើញ​នាង អូ រស្មី ឡើង​បង្ហើរ​សំនៀង​នៅ​ស្ថានីយ​ទូរទស្សន៍​បាយ័ន។ តាម​សមត្ថកិច្ច នាង​ក៏​ជា​មុខ​សញ្ញា​ដែល​ប៉ូលិស​តាម​ស៊ើប​ជា​យូរ​មក​ហើយ​ដែរ។ អូ រស្មី មាន​រថយន្ត​ឡិចស៊ីស ៤៧០ ទំនើប​ថ្មី​សន្លាង​ជិះ​និង​មាន​ផ្ទះ​ល្វែង​ដ៏​ស្កឹម​ស្កៃ​មួយ ស្ថិត​ក្នុង​បុរី​ពិភព​ថ្មី ក្បែរ​ផ្លូវ វេងស្រេង។

នេះ​ជា​ករណី ទី​២ បន្ទាប់​ពី​ឆ្នាំ​មុន​សមត្ថកិច្ច​និង​តុលាការ​បាន​ចាប់​ខ្លួន​ដាក់​ទោស​ថៅកែ​ហាង​កែ​សម្ផស្ស មីកាហ្សា ដ៏​ពេញ​និយម​របស់​អ្នក​សិល្បៈ​នាង ជិន ស្រីមុច ហៅ ចែ មុំ ពី​បទ​នាំ​ស្រី​ក្មេងៗ​ទៅ​ជួញ​ដូរ​ផ្លូវ​ភេទ​ឲ្យ​ពួក​អ្នក​មាន​ទ្រព្យ៕

ព័ត៌មានថ្មីៗ