កំពូល​ជំនុំ​ជម្រះ​បណ្តឹង​សុំ​នៅ​ក្រៅ​ឃុំ​ជន​ជាប់​ចោទ​នាំ​ស្ត្រី​ខ្មែរ​ទៅ​រក​ប្តី​ចិន


20140328_09b
ជនជាប់ចោទពីបទជួញដូរមនុស្សទៅចិនឡើងសវនាការ សារុំ

ភ្នំពេញៈ តុលាការ​កំពូល​បាន​លើក​យក​បណ្តឹង​សារទុក្ខ​សុំ​នៅ​ក្រៅ​ឃុំ​របស់​ជន​ជាប់​ចោទ​ប្តី​ចិន​ប្រពន្ធ​ខ្មែរ ពី​បទ​ជួញ​ដូរ​មនុស្ស​ឆ្លង​ដែន​មក​ជំនុំ​ជម្រះ​ពី​ថ្ងៃ​ពុធ ប៉ុន្តែ បាន​លើក​ការ​ប្រកាស​សាលដីកា​ទៅ​ថ្ងៃ ២៣ មេសា។

លោក ទី ណេង ចៅក្រម​របាយ​ការណ៍​ថ្លែង​ថា ស្រ្តី​ជាប់​ចោទ ណេង ឆេងលី អាយុ ៣២​ឆ្នាំ ជនជាតិ ខ្មែរ ស្រុក​កំណើត​នៅ ស្រុក​ពាមរក៍ ខេត្ត​ព្រៃវែង និង​ប្តី​ឈ្មោះ តៅ អេងហុង ជនជាតិ ចិន ជាប់​សង្ស័យ​ជា​មេខ្យល់​នាំ​ស្រ្តី​ពីរ​នាក់​ទៅ​ការ​ប្តី​នៅ​ស្រុក ចិន។ ឯ​ស្រ្តី​រងគ្រោះ​ឈ្មោះ អេង ហៃសុភា និង ហៃ ឌីណា ជា​ដើម​បណ្តឹង​រស់​នៅ ខេត្ត​កំពង់ចាម។

លោក​បន្ត​ ជន​ជាប់​ចោទ​ប្តី​ប្រពន្ធ​បាន​នាំ​ស្រ្តី​រងគ្រោះ​ទៅ ទីក្រុង​សៀងហៃ ប្រទេស​ចិន និង​នាំ​ទៅ​ឲ្យ​បុរស ចិន មើល​ក៏​ត្រូវ​រ៉ូវ​គ្នា​រស់​នៅ​បាន ១០​ថ្ងៃ។ ក្រោយ​មក​ក៏​នាំ​ពួក​គេ​ទៅ​ឲ្យ​បុរស ចិន ម្នាក់​ទៀត​នៅ​ជាមួយ​គ្នា​បាន ១៥​ថ្ងៃ ក៏​ត្រូវ​បញ្ជូន​មក​វិញ​ថ្ងៃ ទី​៥ ខែ​កក្កដា ឆ្នាំ​២០១៣ បន្ទាប់​ពី​ម្តាយ​ដាក់​ពាក្យ​ប្តឹង​មក​ក្រសួង ការបរទេស នៅ កម្ពុជា។ ចំណែក​ជន​ជាប់​ចោទ​ក៏​ត្រូវ​ចាប់​ខ្លួន​នៅ​ព្រលាន​យន្តហោះ​ភ្នំពេញ ក្នុង ខែ​កក្កដា ឆ្នាំ​២០១៣ ដែរ។

សំណុំ​រឿង​នេះ​សាលា​ដំបូង​ភ្នំពេញ​ជំនុំ​ជម្រះ​នៅ​ដើម ខែ​មីនា បដិសេធ​ការ​សុំ​នៅ​ក្រៅ​ឃុំ ប៉ុន្តែ​មេធាវី​ជន​ជាប់​ចោទ​ប្តឹង​ទាស់​មក​ឧទ្ធរណ៍​មិន​សម្រេច​ក៏​បន្ត​ប្តឹង​សារទុក្ខ​មក​កំពូល​ទៀត។

ជន​ជាប់​ចោទ​ពីរ​នាក់​ប្តី​ប្រពន្ធ​បាន​បដិសេធ​ការ​ចោទ​និង​ស្នើ​សុំ​តុលាការ​ឲ្យ​បាន​នៅ​ក្រៅ​ឃុំ​ទៅ​ថែរក្សា​កូន​អាយុ ៣​ឆ្នាំ ផង។

លោក ហ៊ីង ធីឫទ្ធិ តំណាង​មហា​អយ្យការ​ថ្លែង​ថា ឆ្លង​តាម​ការ​ពិនិត្យ​ទៅ​លើ​អង្គហេតុ​ក្រុមប្រឹក្សា​គួរ​ពិនិត្យ​លើ​ដំណើរ​រឿង​នេះ ថា​តើ​ពួកគេ​សម​ធ្វើ​ជា​មេខ្យល់​ដូច​ការ​ចោទ​ទេ? បើ​និយាយ​ពី​បាប​និង​បុណ្យ​ត្រូវ​គិត​ថា​មនុស្ស​ពេល​បាន​ស្រណុក​សុខស្រួល ហេតុ​អ្វី​មិន​មក​រក​រឿង​អ្នក​នាំ​ទៅ​តែ​ខ្លួន​ឯង​ផ្លាស់​ប្តូរ​ប្តី​ពី​មួយ​ទៅ​មួយ​រក​តែ​អ្នក​មាន​លុយ នេះ​ជា​ធម្មជាតិ​របស់​មនុស្ស។

លោក​ថា៖ «ខ្ញុំ​សូម​ឲ្យ​ក្រុម​ប្រឹក្សា​មេត្តា​ពិនិត្យ​ទៅ​លើ​ធាតុផ្សំ​នៃ​អង្គហេតុ​នេះ​ផង»។

លោក លឹម អេងរតនៈ ជា​មេធាវី​ជន​ជាប់​ចោទ​បាន​ថ្លែង​ថា កូន​ក្តី​របស់​លោក​មិន​មាន​រឿង​ដូច​ការ​ចោទ​ទេ ពីព្រោះ​ពួក​គេ​ទៅ​រស់​នៅ​និង​ការ​ស្រប​ច្បាប់​នៅ ប្រទេស​ចិន យូរ​ឆ្នាំ​ហើយ ហើយ​ក៏​មិន​ស្គាល់​ស្រ្តី​ពីរ​នាក់​នេះ​ដែរ។ ប៉ុន្តែ មុន​មក​ស្រុក ខ្មែរ ពួក​គេ​ត្រូវ​ស្រ្តី​ទាំង​ពីរ​នាក់​ពឹង​ពាក់​ឲ្យ​ជួយ​បកប្រែ​ភាសា ចិន និង​ជួយ​ជូន​ទៅ​ធ្វើ​វីសា​នៅ​ស្ថានទូត។ លោក​បន្ត​ថា បើ​កូន​ក្តី​លោក​ពាក់ព័ន្ធ​នាំ​មនុស្ស​ឆ្លង​ដែន​ប្រហែល​ជា​ខាង ចិន និង​ស្ថានកុងស៊ុល ខ្មែរ មិន​អនុញ្ញាត​ឲ្យ​មក​ស្រុក ខ្មែរ ទេ​ហើយ​អាច​ត្រូវ​ចាប់​ខ្លួន​នៅ​ទី​នោះ​ផង។

បន្ទាប់​ពី​បញ្ចប់​ការ​សួរ​ដេញ​ដោល​លោក​ចៅក្រម​ប្រកាស​ថា សាលដីកា​នឹង​ប្រកាស​នៅ​ថ្ងៃ ទី​២៣ ខែ​មេសា៕

ព័ត៌មានថ្មីៗ