ឃាត់​ខ្លួន​ជន​បី​នាក់​ពី​បទ​ជួញ​គ្រឿង​ញៀន


ភ្នំពេញៈ បុរស​ពីរ​នាក់​និង​ស្រ្តី​ម្នាក់​ត្រូវ​កម្លាំង​នគរបាល​រាជធានី ឃាត់​ខ្លួន​ក្នុង​គ្លីនិក​មួយ​ក្នុង សង្កាត់​ស្ទឹង​មាន​ជ័យ ខណ្ឌ​មាន​ជ័យ កាល​ពី​ម្សិលមិញ ពី​បទ​ធ្វើ​សកម្មភាព​ជួញ​ដូរ​គ្រឿង​ញៀន និង​ប៉ះ​ទង្គិច​គ្នា​ផ្ទុះ​អាវុធ​រង​របួស​ហើយ​មក​សម្ងំ​ព្យាបាល។

លោក ជួន ណារិន្ទ ស្នងការ​រង​នគរបាល​រាជធានី​ឲ្យ​ដឹង​ថា សមត្ថកិច្ច​ក្រុង​បាន​ស្រាវជ្រាវ​ចាប់​ខ្លួន​បក្ខពួក​ក្រុម​ជួញ​គ្រឿង​ញៀន​បី​នាក់ (ស្រី​ម្នាក់) ខណៈ​ជន​ម្នាក់​មក​សម្ងំ​លាក់​ខ្លួន​ព្យាបាល​របួស។

លោក​បន្ត​ថា មុខ​សញ្ញា​នេះ​ត្រូវ​បាន​សមត្ថកិច្ច​ធ្វើ​ការ​ស្រាវជ្រាវ​យ៉ាង​សកម្ម ក្នុង​សំណុំ​រឿង​ផ្ទុះ​អាវុធ​នៅ​មុខ​ក្រសួង ព័ត៌មាន ដែល​បាញ់​ស្លាប់​មនុស្ស​ម្នាក់​និង​របួស​ពីរ​នាក់​កាល​ពី​ថ្ងៃ ទី​២៣ ខែ​មីនា។

លោក​បញ្ជាក់​ថា៖ «ពួក​គេ​ត្រូវ​បាន​ឃុំ​ខ្លួន​សួរ​ចម្លើយ​នៅ​ស្នងការដ្ឋាន​ដើម្បី​កសាង​សំណុំ​រឿង និង​ស្រាវជ្រាវ​រក​បក្ខពួក​បន្ថែម​ទៀត»។

លោក​ស្នងការ​រង​បាន​ឲ្យ​ដឹង​ថា ជន​សង្ស័យ​មាន​ឈ្មោះ ថន លីន ភេទ​ប្រុស អាយុ​២៨​ឆ្នាំ ស្នាក់​នៅ សង្កាត់​វាលវង់ ខណ្ឌ​៧​មករា និង​ឈ្មោះ ធុល រិទ្ធីយ៉ា ភេទ​ប្រុស អាយុ​២៥​ឆ្នាំ ស្នាក់​នៅ សង្កាត់​វាលស្បូវ ខណ្ឌ​មាន​ជ័យ ត្រូវ​ចាប់​ខ្លួន​ក្នុង​គ្លីនិក មនោរម្យ​ក្នុង ភូមិ​ដំណាក់​ធំ ១ សង្កាត់​ស្ទឹង​មាន​ជ័យ ខណ្ឌ​មាន​ជ័យ និង​រក​ឃើញ​ថ្នាំ​ញៀន​ម៉ា​ទឹកកក​ជាង​កន្លះ​គីឡូក្រាម (ប្រភេទ​ថ្នាំ​គ្រាប់) និង​កាំភ្លើង​ខ្លី​ម៉ាក​កា ៥៤ មួយ​ដើម និង​ម៉ាក​កា-៥៩ មួយ​ដើម។

សមត្ថកិច្ច​បញ្ជាក់​ថា ជន​ទាំង ៣ នាក់​ដែល​សមត្ថកិច្ច​ចាប់​ខ្លួន​បាន​គឺ​ពាក់​ព័ន្ធ​ករណី​បាញ់​ប្រហារ​នៅ​មុខ​ក្រសួង ព័ត៌មាន កាល​ពី​ថ្ងៃ ទី​២៣ ខែ​មីនា ដែល​ជន​មួយ​ក្រុម​ទៀត ជិះ​ម៉ូតូ​ដេញ​បាញ់​ទៅ​លើ​ពួក​គេ​ទាំង ៣​នាក់ នេះ​ខណៈ​កំពុង​ជិះ​ម៉ូតូ​ធំ​ឌុប​គ្នា ដែល​ជន​ម្នាក់​បាន​ស្លាប់ និង ២​នាក់ រង​របួស​ធ្ងន់​ស្រាល៕

ព័ត៌មានថ្មីៗ