ជន​ជាតិ​ថៃ​ពីរ​នាក់​ត្រូវ​តុលាការ​ខេត្ត​បន្ទាយ​មាន​ជ័យ​ឃុំ​ខ្លួន


20140325_10B
អាវុធ និងវត្ថុតាងផ្សេងទៀតដែលសមត្ថកិច្ចរឹបអូសបាន សហការី

បន្ទាយ​មាន​ជ័យៈ បុរស​ជនជាតិ ថៃ ពីរ​នាក់​ត្រូវ​សាលា​ដំបូង ខេត្ត​បន្ទាយ​មាន​ជ័យ បញ្ជូន​ទៅ​ឃុំ​ខ្លួន​បណ្តោះ​អាសន្ន​នៅ​ពន្ធនាគារ​ខេត្ត កាល​ពី​ល្ងាច​ថ្ងៃ​ចន្ទ ពាក់ព័ន្ធ​ការ​ប្រើ​ប្រាស់​អាវុធ​ខុស​ច្បាប់​បន្ទាប់​ពី​កម្លាំង​កង​រាជ​អាវុធហត្ថ​ខេត្ត​ឆែក​ឃើញ​និង​ចាប់​ឃាត់​ខ្លួន​នៅ​ក្នុង​កាស៊ីណូ​នៅ​តំបន់​ជាយដែន កម្ពុជា-ថៃ នេះ​កាល​ពី​ចុង​សប្តាហ៍​មុន។

លោក ផាន់ ភីរម្យ ព្រះ​រាជអាជ្ញា​រង​អម​សាលា​ដំបូង ខេត្ត​បន្ទាយ​មាន​ជ័យ បាន​ឲ្យ​ដឹង​ថា ជន​សង្ស័យ​ជាតិ ថៃ ២​នាក់ ដែល​កង​រាជ​អាវុធហត្ថ​បញ្ជូន​មក​ពី​ព្រឹក​ថ្ងៃ​ចន្ទ​នោះ​កំពុង​តែ​រៀបចំ​ដំណើរការ​សាកសួរ​តាម​នីតិវិធី។ លោក​បន្ត​ថា៖ «គេ​ទើប​បញ្ជូន​ជន​សង្ស័យ​មក​តុលាការ ហើយ​មិន​ទាន់​សាកសួរ​ចប់​ទេ»។

លោក ម៉ែន ភីរម្យ មេ​បញ្ជាការ​រង​កង​រាជ​អាវុធហត្ថ​ខេត្ត​បាន​ប្រាប់​ថា ជនជាតិ ថៃ ឈ្មោះ តាន់ សំណាង ហៅ ដាំ អាយុ ៤២​ឆ្នាំ និង​ឈ្មោះ ឈិតា សាវង់ចក្រី អាយុ ៣៦​ឆ្នាំ មាន​ទីលំនៅ​ក្នុង ប្រទេស​ថៃ ត្រូវ​សមត្ថកិច្ច​ចាប់​ខ្លួន​នៅ​ក្នុង​បរិវេណ​កាស៊ីណូ ស្តារវីហ្គាស ក្នុង​ទីក្រុង​ប៉ោយប៉ែត ខេត្ត​បន្ទាយ​មាន​ជ័យ បន្ទាប់​ពី​ឆែក​ឃើញ​មាន​លាក់​អាវុធ​ខ្លី​ម៉ាក​ប៉េ​អាកុល​មួយ​ដើម និង​គ្រាប់ ៣ បង់​ពេញ​នៅ​ក្នុង​កាបូប​យួរ​ដៃ។

លោក​ប្រាប់​ថា៖ «យើង​បាន​ចោទ​ពួក​គេ​ពី​បទ​កាន់​កាប់​អាវុធ​គ្មាន​លិខិត​អនុញ្ញាត»។ លោក​បន្ត​ថា យើង​មិន​ដឹង​ថា ពួកគេ​មាន​មុខ​របរ​អ្វី​ទេ ប៉ុន្តែ ពួក​គេ​ធ្លាប់​ចេញ​ចូល​ឆ្លង​ដែន​មក ប៉ោយប៉ែត លេង​ល្បែង​ក្នុង​កាស៊ីណូ​ស្ទើរ​រាល់​ថ្ងៃ។

លោក ទៀ ចាង ប្រធាន​សន្តិសុខ​នៅ​កាស៊ីណូ ស្តារវីហ្គាស ប្រាប់​ថា ជនជាតិ ថៃ ទាំង​ពីរ​នាក់​មិន​មែន​ជា​ភ្ញៀវ​នៅ​កាស៊ីណូ​នេះ​ទេ តែ​ថា ពួកគេ​បាន​រត់​គេច​ពី​សមត្ថកិច្ច សំដៅ​មក​រក​លាក់​ខ្លួន​ក្នុង​កាស៊ីណូ ស្តារវើហ្គាស នៅ​ថ្ងៃ​នោះ។

បើ​តាម​សមត្ថកិច្ច​សុំ​មិន​ឲ្យ​បញ្ចេញ​ឈ្មោះ​ថា ជនជាតិ ថៃ ទាំង ២​នាក់ ចេញ ចូល​មក​លេង​ល្បែង​នៅ​កាស៊ីណូ​រាល់​ថ្ងៃ​ស្រួល​បែប​នេះ គឺ​ពួកគេ​ឆ្លង​តាម​ច្រក​របៀង​ដើម​ស្រល់ ដែល​នគរបាល​ការពារ​ព្រំដែន ៩១១ ឈរ​ជើង​នៅ​ទី​នោះ៕

ព័ត៌មានថ្មីៗ