ជន​ជាប់​ចោទ​ជួញ​គ្រឿង​ញៀន​បី​នាក់​តុលាការ​កំពូល​តម្កល់​ទោស


ភ្នំពេញៈ ជន​ជាប់​ចោទ​បី​នាក់​ដែល​តុលាការ​ថ្នាក់​ទាប​សម្រេច​ដាក់​គុក​ម្នាក់ៗ ៨​ឆ្នាំ និង​ឲ្យ​បង់​ប្រាក់​សរុប ១៥ លាន​រៀល​ពី​បទ​ជួញ​ដូរ​គ្រឿង​ញៀន​កាល​ពី​ម្សិលមិញ​ត្រូវ​តុលាការ​កំពូល​ប្រកាស​រក្សា​ការ​សម្រេច​នេះ​ទុក​នៅ​ដដែល​បន្ទាប់​លើក​មក​ជំនុំ​ជម្រះ​បណ្តឹង​សារទុក្ខ​កាល​ពី​ពាក់​កណ្តាល​ខែ​មុន។

ចៅក្រម​របាយ​ការណ៍​លោក​ស្រី គឹម សត្ថវី នៃ​តុលាការ​កំពូល​បាន​ប្រកាស​សាលដីកា​ពី​ម្សិលមិញ​ថា សំណុំ​រឿង​ជន​ជាប់​ចោទ​បី​នាក់​ពាក់ព័ន្ធ​ការ​ជួញ​ដូរ​គ្រឿង​ញៀន ៧០០ ក្រាម ដែល​តុលាការ​កំពូល​លើក​យក​មក​ជំនុំ​ជម្រះ​កាល​ពី​ថ្ងៃ ទី​១៩ ខែ​មីនា ត្រូវ​ក្រុម​ប្រឹក្សា​ជំនុំ​ជម្រះ​សម្រេច​តម្កល់​សាលដីកា​របស់​តុលាការ​ឧទ្ធរណ៍​ទុក​ជា​បាន​ការ​ដដែល។

លោក​ស្រី​បញ្ជាក់​ថា៖ «ក្រោយ​ពី​បាន​ពិចារណា​លើ​អង្គហេតុ​តុលាការ​យល់​ឃើញ​ថា ការ​សម្រេច​សេចក្តី​របស់​សាលា​ឧទ្ធរណ៍​ពិត​ជា​ត្រឹម​ត្រូវ​ទៅ​តាម​ទម្រង់​ច្បាប់ និង​សម្រេច​តម្កល់​សំណុំ​រឿង​ទុក​នៅ​ដដែល​ហើយ​បដិសេធ​បណ្តឹង​សារទុក្ខ​របស់​ជន​ជាប់​ចោទ»។

តាម​កំណត់​ហេតុ​តុលាការ​បុរស​ជាប់​ចោទ សម្បត្តិ តូនី សុភ័ន្ត ហ៊រ និង គៀង ប៊ុណ្ណា ត្រូវ​នគរបាល​យុត្តិធម៌​ចាប់​ខ្លួន​នៅ​សួនច្បារ​នាគ​បាញ់​ទឹក ជិត​វិមាន​ឯករាជ្យ កាល​ពី​ថ្ងៃ ទី​៤ ខែ​តុលា ឆ្នាំ​២០១០ ជាមួយ​នឹង​ការ​រក​ឃើញ​គ្រឿង​ញៀន ៧០០ ក្រាម​ជាប់​នឹង​ខ្លួន។ សំណុំ​រឿង​នេះ​សាលា​ដំបូង​រាជធានី​បាន​សម្រេច​ផ្តន្ទាទោស​ម្នាក់ៗ ៨​ឆ្នាំ និង​ពិន័យ​ប្រាក់ ១៥ លាន​រៀល​តាម​សាលក្រម​ចុះ​ថ្ងៃ ទី​២២ មិថុនា ឆ្នាំ​២០១១ តែ​ជន​ជាប់​ចោទ​ប្តឹង​ទាស់​ហើយ​សាលា​ឧទ្ធរណ៍​តម្កល់​សាលក្រម​សាលា​ដំបូង​តាម​សាល​ដីកា​ចុះ​ថ្ងៃ ទី​២០ មីនា ឆ្នាំ​២០១២ ទើប​ជន​ជាប់​ចោទ​ប្តឹង​សារទុក្ខ៕

ព័ត៌មានថ្មីៗ