ជន​បី​នាក់​វាយ​យុវជន​ម្នាក់​របួស​ដេរ ៦០ ថ្នេរ​ត្រូវ​ប៉ូលិស​ឃាត់​ខ្លួន


ភ្នំពេញៈ យុវជន​សង្ស័យ ៣ នាក់​ដែល​វាយ​យុវជន​រងគ្រោះ​ម្នាក់​ឲ្យ​របួស​ធ្ងន់​ដេរ​ដល់ ៦០ ថ្នេរ ព្រោះ​តែ​ខឹង​ទៅ​ប្រាប់​កុំ​ឲ្យ​ផឹក​ស៊ី​ឡូឡា ក្នុង ភូមិ​បាយាប សង្កាត់​ភ្នំពេញ​ថ្មី កាល​ពី​យប់​ថ្ងៃ​ចន្ទ ត្រូវ​សមត្ថកិច្ច​ខណ្ឌ​ចាប់​ឃុំ​ខ្លួន​និង​កំពុង​ស៊ើបសួរ។

លោក ម៉ក់ ហុង អធិការ​នគរបាល ខណ្ឌ​សែនសុខ ឲ្យ​ដឹង​ថា ជន​សង្ស័យ​ដែល​ត្រូវ​ឃាត់​ខ្លួន​ពាក់ព័ន្ធ​ករណី​ជម្លោះ​វាយតប់​គ្នា​រហូត​ធ្វើ​ឲ្យ​ជន​រងគ្រោះ​ម្នាក់​របួស​ធ្ងន់​កាល​ពី​រំលង​អាធ្រាត្រ​ឆ្លង​ចូល​ថ្ងៃ ទី​១២ ឧសភា សមត្ថកិច្ច​កំពុង​ស៊ើប​សួរ​នៅ​ឡើយ។

លោក​ប្រាប់​ថា៖ «ជន​ទាំង ៣​នាក់ សមត្ថកិច្ច​ទើប​តែ​ឃាត់​ខ្លួន​ភ្លាមៗ​មិន​ទាន់​សម្រេច​យ៉ាង​ណា​ទេ​កំពុង​សាកសួរ»។

សមត្ថកិច្ច ខណ្ឌ​សែនសុខ ឲ្យ​ដឹង​ថា ជន​សង្ស័យ​ទាំង ៣​នាក់ ឈ្មោះ អ៊ិត សុខជា អាយុ ១៩​ឆ្នាំ ខឿន ពិសី អាយុ ២១​ឆ្នាំ និង​ឈ្មោះ ហ៊ុន សារឿត អាយុ ២០​ឆ្នាំ នៅ ភូមិ​បាយាប សង្កាត់​ភ្នំពេញ​ថ្មី ខណ្ឌ​សែន​សុខ។

សមត្ថកិច្ច​បន្ត​ថា ក្រុម​ជន​សង្ស័យ​បាន​ផឹក​ស្រា​ពី​ក្បាល​ព្រលប់​រហូត​រំលង​អាធ្រាត្រ​ឆ្លង​ថ្ងៃ​ស្រែក​ឡូឡា​ខ្លាំងៗ​រំខាន​អ្នក​ជិត​ខាង។ ជន​រងគ្រោះ​ជា​កម្មករ​សំណង់ ងួន រចនា អាយុ ២០​ឆ្នាំ ដេក​មិន​លក់​ក៏​ចេញ​ទៅ​ប្រាប់​កុំ​ឲ្យ​ឡូឡា​ពេក តែ​ក៏​ត្រូវ​ពួក​គេ​ស្ទុះ​មក​វាយ​នឹង​ដំបង​ឈើ និង​ដុំ​ថ្ម មិន​ដក​ដៃ​ធ្វើ​ឲ្យ​រង​របួស​បែក​ក្បាល​ឈាម​ស្រោច​ខ្លួន។​ភ្លាមៗ​ក្រុម​គ្រួសារ​ជន​រងគ្រោះ​បាន​ស្ទុះ​មក​ឃាត់​និង​ដឹក​ជន​រងគ្រោះ​ទៅ​មន្ទីរពេទ្យ ព្រះ​កុសុមៈ ដេរ​របួស​ដល់ ៦០ ថ្នេរ​ឯ​ក្រុម​ជន​ដៃដល់​ត្រូវ​សមត្ថកិច្ច​ចុះ​អន្តរាគមន៍​ឃាត់​ខ្លួន​មក​សាកសួរ៕

ព័ត៌មានថ្មីៗ